Azərbaycan nümayəndə heyəti İran Prezidenti ilə görüşmüşdür

Milli Məclisin Sədri Oqtay Əsədovun rəhbərlik etdiyi Azərbaycan nümayəndə heyəti İranın yeni Prezidenti Həsən Ruhaninin andiçmə mərasimində iştirak etmək üçün Tehrana səfər etmişdir.

Səfər çərçivəsində nümayəndə heyətimiz Prezident Həsən Ruhani ilə görüşmüşdür.

Nümayəndə heyətimizi səmimiyyətlə salamlayan H.Ruhani onun hərarətli salamlarını və xoş arzularını Azərbaycan Prezidenti İlham Əliyevə çatdırmağı xahiş etmişdir. Andiçmə mərasimində iştiraka görə, Azərbaycan tərəfinə minnətdarlığını ifadə edən İran Prezidenti qeyd etmişdir ki, onun dövləti bütün məqamlarda Azərbaycanın ərazi bütövlüyünü dəstəkləmiş və münaqişənin Azərbaycanın suveren sərhəd hüquqlarının qorunması çərçivəsində həlli istiqamətində bundan sonra da səylər göstərməyə hazır olacaqdır.

Azərbaycana səfərləri ilə bağlı xatirələrindən bəhs edən İran Prezidenti ulu öndər Heydər Əliyevi müdrik siyasi lider kimi səciyyələndirərək demişdir: "Azərbaycan sürətlə inkişaf edir. Çox məmnunam ki, Heydər Əliyevin müəyyən etdiyi siyasət Prezident İlham Əliyev tərəfindən uğurla davam etdirilir".

İranda Azərbaycan nümayəndə heyətinə göstərilən diqqətə və səmimi qonaqpərvərliyə görə minnətdarlığını bildirən O.Əsədov H.Ruhanini seçkilərdə qələbə qazanması münasibətilə təbrik etmiş, Prezident İlham Əliyevin səmimi salamlarını və təbrikini çatdırmışdır.

Ermənistan-Azərbaycan, Dağlıq Qarabağ münaqişəsinin sülh yolu ilə həllində İranın imkanlarını diqqətə çatdıran Milli Məclisin Sədri ümidvar olduğunu bildirmişdir ki, H.Ruhani münaqişənin nizamlanmasında ciddi səylər göstərəcəkdir.

İran Prezidentinin andiçmə mərasimindəki çıxışında dövlətlərin ərazi bütövlüyünə və suverenliyinə hörmətlə yanaşdığına yer ayırmasını yüksək qiymətləndirən Azərbaycan parlamentinin rəhbəri, həmçinin ulu öndər Heydər Əliyev barədə xoş ifadələrinə və səmimi sözlərinə görə də Həsən Ruhaniyə minnətdarlığını ifadə etmişdir.

Səmimilik şəraitində başa çatan görüşdə İran-Azərbaycan münasibətlərinin ayrı-ayrı istiqamətlərinə dair səmərəli fikir mübadiləsi aparılmışdır.

Səfər avqustun 5-də başa çatmışdır.

AzərTAc

Azərbaycan. - 2013.- 6 avqust.- S.1.