Azərbaycan Respublikası ilə Amerika Birləşmiş Ştatları arasında miqrasiya sahəsində əməkdaşlıq əlaqələri uğurla inkişaf edir

Avqustun 5-də Azərbaycan Respublikası Dövlət Miqrasiya Xidmətinin (DMX) rəisi, III dərəcəli dövlət miqrasiya xidməti müşaviri Firudin Nəbiyev Amerika Birləşmiş Ştatlarının ölkəmizdəki səfiri Riçard Morninqstar və onun rəhbərlik etdiyi nümayəndə heyəti ilə görüşmüşdür.

DMX-dən AzərTAc-a bildirmişlər ki, F.Nəbiyev qonaqlara Xidmətin yaranma tarixi, strukturu, fəaliyyət istiqamətləri barədə məlumat vermiş, miqrasiya sahəsində qanunvericiliyin beynəlxalq normalara və müasir dövrün tələblərinə uyğun təkmilləşdirilməsindən, ölkə ərazisində qanunsuz miqrasiyaya qarşı aparılan mübarizə tədbirlərindən danışmışdır. Həmçinin Azərbaycan Respublikasının Miqrasiya Məcəlləsinin qəbul edilməsi və miqrasiya sahəsində tətbiq edilən yeniliklər barədə qonaqlara ətraflı məlumat vermişdir.

Görüşə görə Xidmət rəisinə minnətdarlığını bildirən səfir R.Morninqstar Azərbaycan iqtisadiyyatının inkişafından bəhs etmiş, həmçinin Heydər Əliyev Beynəlxalq Hava Limanında Bakı Regional Miqrasiya İdarəsinin miqrasiya şöbəsinin yenidən fəaliyyətə başlamasını və ölkəmizdə insan alverinə qarşı aparılan mübarizə tədbirləri nəticəsində ABŞ-ın insan alverinə dair hesabatında Azərbaycanın bir pillə irəliləməsini müsbət hal kimi dəyərləndirmişdir.

Görüşdə miqrasiya sahəsinə dair fikir mübadiləsi aparılmış, qanunsuz miqrasiyaya qarşı mübarizə istiqamətində birgə əməkdaşlığın perspektivləri müzakirə edilmişdir.

Sonda qonaq Xidmətin Heydər Əliyev Muzeyi ilə tanış olmuş, ulu öndərin həyat və fəaliyyətini əks etdirən fotoşəkillərə baxmış və xatirə kitabına ürək sözlərini yazmışdır.

Azərbaycan. - 2013.- 6 avqust.- S. 6.