Ötən il Səngəçal terminalından 283 milyon barel neft ixrac olunub

Bunun 246,4 milyon bareli Bakı-Tbilisi-Ceyhan (BTC) kəməri ilə, təxminən 29,1 milyon bareli Qərb İxrac Boru Kəməri marşrutu, 6 milyon bareli dəmir yolu, 1,4 milyon bareli isə kondensat ixrac xətti ilə ixrac edilib.

"BP-Azərbaycan" şirkətinin keçən ilin yekunlarına dair açıqladığı hesabatda qeyd olunub ki, 2012-ci ildə terminaldan orta hesabla gündə təxminən 21,1 milyon kubmetr "Şahdəniz" qazı ixrac olunub. Qaz Cənubi Qafqaz Boru Kəməri və terminalın qaz emalı qurğularını "Azəriqaz"ın yerli şəbəkə sisteminə birləşdirən ARDNŞ-nin qaz boru kəməri vasitəsilə ixrac edilib.

Səngəçal terminalı dənizdən çıxarılan nefti və qazı ixracdan əvvəl texnoloji emaldan keçirən mərkəzdir. Terminal Xəzər hövzəsində "BP-Azərbaycan" tərəfindən işlədilən bütün mövcud dəniz yataqlarından hasil edilən məhsulu texnoloji emal etmək üçün nəzərdə tutulub və genişləndirilmək imkanı var. Terminala neft və qazı texnoloji emal edən qurğular, BTC boru kəmərinin birinci nasos stansiyası, Cənubi Qafqaz Boru Kəmərinin kompressor stansiyası və digər qurğular daxildir. Terminal Bakıdan 55 kilometr cənubda (Qaradağ rayonu) yerləşir və ümumi sahəsi 542 hektardır. Onun gündəlik texnoloji emal gücü 1,2 milyon barel neft və 41,5 milyon kubmetr qazdır. Səngəçal terminalının maksimal tutumu 4 milyon, işlək tutumu isə 3,2 milyon bareldir.

Azərbaycan. - 2013.- 3 avqust.- S. 5.