«Neft Daşları» üçün yeni özül tikiləcək

"Neft Daşları" yatağı üçün yeni stasionar dəniz özülünün inşası nəzərdə tutulub. ARDNŞ-in "Neftqazelmitədqiqatlayihə" İnstitutunun layihəsi əsasında inşa olunacaq özülün baş podratçısı şirkətin "Neftqaztikinti" Trestidir.

ARDNŞ-in mətbuat xidmətinin yaydığı məlumata görə, 8 istismar quyusunun qazılması üçün nəzərdə tutulan özül dənizin 27 metr dərinliyində yerləşdiriləcək. 7 dayaq bloklu özül 2 hissədən - istehsalat və yaşayış sahələrindən ibarət olacaq və bu sahələr hər birinin uzunluğu 33 metr olan 2 piyada körpüsü ilə əlaqələndiriləcək.

Özül ən müasir qazma avadanlığı, vertolyot meydançası, çirkab və məişət sularının yığılması üçün xüsusi çənlər, 6 yanalma meydançası, 4 minik meydançası, yükqaldırma qabiliyyəti 12,5 ton olan kran, "ASTRA-20" tipli bioloji sutəmizləmə qurğusu və digər zəruri avadanlıqlarla təchiz ediləcək. Bundan başqa, elektrik enerjisi ilə təchizatın etibarlılığını təmin etmək məqsədilə özüldə 3 dizel elektrik aqreqatı, 42 nəfərlik tanker tipli xilasetmə qayığı və hər biri 10 nəfərlik 4 xilasedici sal quraşdırılacaq. Ətraf mühitin və əməyin mühafizəsi bütün müasir norma və tələblərə uyğun şəkildə təmin olunacaq.

Azərbaycan. - 2013.- 3 avqust.- S. 5.