«YARAT!» Müasir İncəsənət Məkanı «PARTICIPATE» Baku Public Art» festivalı çərçivəsində növbəti layihəni təqdim etmişdir

"YARAT!" Müasir İncəsənət Məkanı "PARTICIPATE" Baku Public Art" festivalı çərçivəsində Dənizkənarı Milli Parkda ABŞ-ın "Rebar" qrupunun və Danimarkanın "N55" art-kampaniyasının birgə hazırladıqları "Parkcycle" ("Səyyar park") layihəsini təqdim etmişdir.

AzərTAc xəbər verir ki, xüsusi olaraq "PARTICIPATE" Baku Public Art" festivalı üçün təqdim olunan "Parkcycle" əsəri paytaxtımızda dövr edən, yalnız bir ağacdan ibarət, bir neçə insan tərəfindən sürülə bilən kiçik səyyar parkdır. Əsərin müəllifləri yaratdıqları işə "ictimai məkanların yenidən bölüşdürülməsi üzrə insan tərəfindən idarə olunan bir sistem" tərifini vermişlər. Dayandığı yerdə "Parkcycle" yerli əhaliyə yaşıl məkanlara birbaşa çıxış imkanlarını bəxş edir.

İlk dəfə bu əsər ictimaiyyətə 2007-ci ildə ABŞ-ın San-Fransisko şəhərində təqdim olunmuşdur. Əsəri Bakıya daha təkmil formada gətirməklə ABŞ-ın "Rebar" qrupu ictimai heykəltəraşlıq sənətinin funksiyalarını və imkanlarını, habelə bu səpkidə məlumatlılıq səviyyəsini artıraraq yaşıl məkanların əhəmiyyətini vurğulamaq niyyətindədir.

"Parkcycle" layihəsini Bakıda reallaşdıran "Rebar" qrupunun rəhbəri, landşaft memarı Con Bela və memar Mariya Slavnovadır.

"Rebar" qrupu əsası 2005-ci ildə Con Bela tərəfindən qoyulan və hazırda idarə edilən ABŞ kollektividir. Con Belanın ictimai incəsənəti, məkanı və icma iştirakını nəzərdə tutan layihələrdə onillərlə təcrübəsi vardır. O, "Park günü", "Dilənçilik səhnəsi", "Qələbə bağı" və "Üçbucaq tamaşa səhnəsi" əsərlərinin yaradılmasına rəhbərlik etmişdir.

Con Bela San-Fransiskodakı Kaliforniya İncəsənət Kollecində baş mühazirəçi və Berklidəki Kaliforniya Universitetinin əməkdar mühazirəçisidir. O, Berkli Kaliforniya Universitetində landşaft memarlığı və mühit dizaynı, Massaçusets Universitetində biologiya və biokimya, Çikaqo İncəsənət İnstitutunda heykəltəraşlıq üzrə təhsil almışdır. Con Bela Kaliforniya ştatında qeydiyyata alınmış memardır.

Layihə avqustun sonunadək davam edəcəkdir.

Azərbaycan. - 2013.- 7 avqust.- S. 8.