Kseniya Başmet: «Qəbələdə insanların qonaqpərvərliyi və musiqi duyumu məni heyran etdi»

"Qəbələdə insanların qonaqpərvərliyi və musiqi duyumu məni heyran etdi. Belə bir gözəl məkanda səhnəyə çıxmaq mənə unudulmaz anlar yaşatdı. Dağlar, çayların şırıltısı, ucsuz-bucaqsız yaşıllıqlar və klassik musiqidən daha gözəl nə ola bilər?! Festivala dəvət olunduğumdan çox şadam".

Bu sözləri Heydər Əliyev Fondunun təşkilatçılığı ilə keçirilən V Qəbələ Beynəlxalq Musiqi Festivalının iştirakçısı, əfsanəvi musiqiçilər ailəsində dünyaya gəlmiş, bir sıra beynəlxalq musiqi festivallarının qalibi Kseniya Başmet AzərTAc-a müsahibəsində demişdir.

Festivala ilk dəfə qatıldığını diqqətə çatdıran Kseniya Başmet bu möhtəşəm incəsənət bayramının təşkilatçılığını yüksək qiymətləndirmişdir.

Kseniya Başmet demişdir: "Qəbələ Bakıdan uzaqda yerləşsə də, konsertlərə paytaxtdan və bölgələrdən xeyli sayda musiqisevərin gəldiyinin şahidi oldum. Bu da heç şübhəsiz ki, festivalın yüksək səviyyədə təşkilinin və keyfiyyətinin göstəricisidir. Konserti atam Yuri Başmetin tamaşaçı kimi izləməsi məni daha gözəl ifa etməyə ruhlandırırdı. Düşünürəm ki, ifamla fikirlərimi tamaşaçılara ötürə bildim".

Festivalın işinə uğurlar arzu edən musiqiçi gələn il də bu möhtəşəm tədbirə qatılmaq arzusunu etiraf etmişdir.

Azərbaycan. - 2013.- 8 avqust.- S. 12.