Rabitə və İnformasiya Texnologiyaları Nazirliyində görüş

Rabitə və İnformasiya Texnologiyaları Nazirliyində "HP Enterprise" qrupunun Mərkəzi və Şərqi Avropa üzrə vitse-prezidenti Herbert Rasrbixler ilə görüş olmuşdur.

Nazirliyin mətbuat xidmətindən AzərTAc-a bildirmişlər ki, görüşdə Azərbaycanın informasiya texnologiyaları sahəsində əldə etdiyi nailiyyətlər, "HP" şirkətinin ölkəmizdə uğurla həyata keçirdiyi layihələr barədə məlumat verilmişdir.

Nazir Əli Abbasov ölkəmizdə informasiya-kommunikasiya texnologiyaları sektorunun inkişafı istiqamətində həyata keçirilən genişmiqyaslı işlər, qlobal və regional layihələrin icrası və bu sahədə perspektiv planlar barədə məlumat vermişdir. Ə.Abbasov dünyanın aparıcı informasiya texnologiyaları şirkəti olan "HP" ilə əməkdaşlıq əlaqələrinin daha da genişlənəcəyinə əminliyini ifadə etmişdir.

H.Rasrbixler qeyd etmişdir ki, "HP" şirkəti gələn il Azərbaycanda irimiqyaslı layihələr həyata keçirməyi nəzərdə tutmuşdur. Qonaq bu ilin dekabrında Bakıda keçiriləcək "Bakutel-2013" Beynəlxalq telekommunikasiya və informasiya texnologiyaları sərgi-konfransında iştirak edəcəyini bildirmişdir.

Azərbaycan. - 2013.- 15 avqust.- S. 8.