Builki göstəricilər daha yüksəkdir

Zərdab rayonunun iqtisadiyyatında başlıca yeri aqrar sahə tutur. Dövlətin kənd təsərrüfatı işçilərinə göstərdiyi qayğı, yaratdığı şərait zərdablıları torpağa zəhmətə daha ürəkdən bağlayıb.

Bu ilin yazında havaların həddindən artıq istiləşməsi, sonra isə qeyri-sabit olması taxıl biçini ilə əlaqədar ayrı-ayrı rayonlarda müəyyən çətinliklər yaratsa da, Zərdab biçini itkisiz başa vurdu. Bu isə mövcud vəziyyətə çevik münasibətin və vaxtında görülmüş tədbirlərin nəticəsində mümkün oldu.

Zərdablılar 2013-cü ilin məhsulu üçün 17134 hektar payızlıq taxıl əkmişdilər. Taxıl yetişənədək istər alaq otlarına, ziyanvericilərə qarşı mübarizə, istərsə də digər aqrotexniki tədbirlər yüksək səviyyədə həyata keçirildiyindən çəkilən zəhmət hədər getmədi. 17134 hektar sahədən 47097 ton taxıl yığıldı. Bu isə əvvəlki ildəkindən 8 min tondan artıq məhsul deməkdir.

Rayonda 5 toxumçuluq təsərrüfatı fəaliyyət göstərir. Taxılçıların yüksək reproduksiyalı toxumla təminatında bu təsərrüfatların da özünəməxsus rolu var. Cari mövsümdə 5 toxumçuluq təsərrüfatı ümumilikdə 710,1 ton məhsul istehsal edib. Hektar üzrə orta məhsuldarlıq 36,4 sentner olub.

Bu il "Aqrolizinq" ASC-nin Zərdab "Aqrotexservis" filialı tərəfindən 1 taxıl kombaynı alınıb, fermerlərə isə MTZ-82-2 "Belarus" markalı 3 traktor və 3 kotan satılıb. Filial fermerləri güzəştli şərtlərlə yetərincə azot gübrəsi, amin duzu, pestisid və sair kimyəvi dərmanlarla da təchiz edib.

Kənd təsərrüfatı işlərində vacib məsələlərdən biri də əkin sahələrinin suvarma suyuna olan tələbatının lazımınca ödənilməsidir. Suvarma işinin yüksək səviyyədə təşkili nasosların, mühərriklərin, hidroqurğuların işlək vəziyyətdə olmasından, kanalların təmizliyindən çox asılıdır. Bu baxımdan təmir-bərpa və təmizləmə işləri vaxtında görülüb. Belə ki, 13 nasos, 8 elektrik və 15 dizel mühərrik, 2 hidroqurğu təmir olunub, 203 km uzunluğunda suvarma kanalı lildən təmizlənib.

Rayonun Gödəkqobu, Məlikumudlu, Əlvənd, Otmanoba və digər kəndlərində 21 hidroqurğu təmir olunub, Qoşaoba, Təzəkənd, Yastıyol və İnqilab kəndlərinin nasos stansiyaları təmirdən sonra yeni avadanlıqlarla təmin edilib.

Söhbət zamanı fermerlər suvarma ilə bağlı çətinliyin olmadığını bildirdilər.

Zərdabda pambıq əkini ilə də maraqlandıq. Öyrəndik ki, bu sahəyə maraq ürəkaçan deyil. Bu da pambığın satış qiymətinin maya dəyəri ilə müqayisədə aşağı olması ilə bağlıdır. Ancaq hər halda maraq göstərənlər var - 475 hektar sahəyə çiyid səpilib. Hazırda sahələrdə kompleks yığıma hazırlıq işləri aparılır.

Bu il rayonda kartof, tərəvəz, bostan əkilən sahələr də yaxşı məhsul verib. Satış normal olduğundan əkib-becərməyə həvəs çoxdur. Bunu da kənd təsərrüfatı məhsulları istehsalçıları bildirdilər.

Zərdabda maldarlıq və quşçuluq da əhəmiyyətli sahələrdən sayılır. Hazırda 54 min baş qaramal, 12 min baş davar bəslənilir. Bu isə əvvəlki ilin eyni dövrü ilə müqayisədə çoxdur.

Rayonda ət, süd, yumurta, yun istehsalında da yüksək göstəricilərə nail olunub. Ətlik və südlük istiqamətində maldarlığın inkişaf etdirilməsi məqsədilə 558 baş mal süni yolla mayalandırılıb. Əvvəl mayalanmış heyvanlardan 372 baş sağlam bala alınıb.

Rayon əhalisinin quş ətinə və yumurtaya tələbatını təmin etmək üçün "Turac 2008" MMC tərəfindən ilin ilk yarısı ərzində 10810 baş cücə inkubasiya edilərək satılıb.

Rayon iqtisadiyyatının ümumi inkişafı kənd təsərrüfatının ayrı-ayrı sahələrində qazanılan göstəricilərlə də şərtlənir. Bunu yaxşı bilən Zərdab fermerləri də çalışırlar ki, hər məhsul dövrünü yüksək nailiyyətlərlə başa vursunlar.

Azərbaycan. - 2013.- 16 avqust.- S. 10.