Şəmkirin öz iş üslubu var

Ölkənin hər yerində genişmiqyaslı abadlıq-quruculuq işləri gedir, sistemli surətdə sosial problemlər həll edilir. Şəmkir rayonunun öz iş üslubu var, istər quruculuqda, istərsə də iqtisadiyyatın idarə olunmasında. Quruculuq işlərini görmək üçün təkcə yolboyu uzanan ən müasir, orijinal quruluşlu xidmət mərkəzinə baxmaq kifayətdir. Aqrar sahədə isə kütləvi surətdə istixanalarda faraş tərəvəz yetişdirmək, torpağın hər qarışından səmərəli istifadə etmək üzrə Şəmkirin təcrübəsi çoxuna nümunə ola bilər.

Respublikamızın ən böyük rayonlarından sayılan Şəmkir hər sahədə sürətlə inkişaf edir. Cari ilin 6 ayının yekunları və qarşıda duran vəzifələr müzakirə olunarkən bu barədə geniş söhbət getdi. Əvvəlcə rayon icra hakimiyyətinin başçısı Nazim Veysovun məruzəsi dinlənildi. Sonra ayrı-ayrı idarə və müəssisələrin nümayəndələri görülən işlər barədə məlumat verdilər. İstər məruzədə, istərsə də çıxışlarda Nazirlər Kabinetinin 2013-cü ilin altı ayının yekunlarına həsr olunmuş iclasında irəli sürülən vəzifələr baxımından yerlərdəki vəziyyət ətraflı təhlil olundu. Yekdilliklə qeyd edildi ki, Şəmkir rayonunda regionların sosial-iqtisadi inkişafı Dövlət Proqramının tələbləri uğurla yerinə yetirilir.

Cari ilin 6 ayı ərzində rayon üzrə 256 milyon manatlıq məhsul istehsal olunmuşdur ki, bu da ötən ilin müvafiq dövründəkinə nisbətən xeyli çoxdur. Adambaşına düşən ümumi daxili məhsulun həcmi 4,4 faiz artmışdır. Ən fərəhli cəhətlərdən biri də odur ki, ötən müddət ərzində rayon üzrə 121 milyon manatlıq tikinti-quraşdırma işləri görülmüşdür. Rayonda içməli su xətti və kanalizasiya sistemi çəkilir. Sərxan massivində ümumi tutumu 11 min kubmetr olan 4 su anbarı tikilib. Dövlət başçısının tapşırığı ilə Kür qəsəbəsinə 12 kilometrlik yol çəkilib. Şəmkir şəhəri ətrafında Gədəbəy dairəvi avtomobil yolu və Cəyir çayı üzərindən keçən körpü yenidən qurulub. Şəhərin ən baxımlı yerində Bayraq meydanı yaradılır, Heydər Əliyev Mərkəzinin və Gənclər Sarayının ətrafında 14,5 hektar ərazidə yeni park salınır. 80 yerlik mehmanxana binasının, Oksford məktəbi üçün yataqxananın, uşaq bağçasının, abidələr parkının tikintisi və alman kilsəsində əsaslı bərpa işləri başa çatmaq üzrədir. Şəmkir dəryaçasının inşası sürətlə davam edir. Sabirkənd, Seyfəli, Qasım İsmayılov kəndlərində və Zəyəm qəsəbəsində müasir məktəb binaları inşa olunur. "Zəyəmkəndmaş" zavodunda yenidənqurma işləri aparılır. Muxtariyyat, Bayramlı, Qılıncbəyli və Qaralar kəndlərinə qaz xətləri çəkilir.

Şəmkirin iş üslubunun ən önəmli cəhətlərindən biri də budur ki, Dövlət Proqramına uyğun olaraq, bir sıra ərzaq növləri ilə rayon özü özünü təmin edir. Bu yerlərdə əsasən taxıl, kartof, üzüm, günəbaxan, tərəvəz, meyvə bostan bitkiləri və s. yetişdirilir. Sahibkarlığa geniş meydan açıldıqca insanların işə həvəsi, çöllərin barı-bərəkəti artır.

Maldarlıq məhsulları getdikcə çoxalır. 6 ay ərzində rayon üzrə 4150 ton ət (diri çəkidə), 23 ton süd, 41,5 milyon ədəd yumurta istehsal edilib. İstər bitkiçilik, istərsə də maldarlıq məhsulları o qədər çoxalıb ki, onların saxlanması və topdan satışı üçün 5 yerdə anbar binaları tikilib, emal müəssisələri yaradılıb. Şəmkir rayonu ərzaq məhsulları ilə özü özünü təmin etməklə yanaşı, Xətai rayonunda fəaliyyət göstərən yarmarkaya hər həftə xeyli məhsul göndərir.

İstehsalın həcmi artdıqca satış dairəsi də genişlənir. Bir vaxtlar Şəmkir Rusiya bazarlarında əsasən ətirli gülləri ilə şöhrət qazanmışdı. Bir ara bu sahəyə diqqət nisbətən azalmışdı. Bu boşluğu doldurmaq üçün Şiştəpə yaxınlığındakı "Azaqro" MMC-yə məxsus istixana kompleksinin təyinatı dəyişdirilərək gül istehsalına başlanıldı. Şəmkir sərhəddən kənara faraş kartof, pamidor, xurma, tərəvəz, şərab da göndərir. Qaracəmirli bələdiyyəsinin sədri Saleh Hüseynov deyir ki, təkcə onların kəndindən hər il Rusiyaya 700-800 ton kartof, pomidor, xurma, tərəvəz yola salınır. "Şərq ulduzu" MMC-nin 8 növ şərabı isə Rusiyadan əlavə, Cənubi Koreyaya göndərilir. İndi də Yaponiya ilə danışıqlar aparılır.

Hazırda min zəhmət bahasına yetişdirilən məhsul yığılır. Mütəxəssislər deyirlər ki, cari ildə rayon üzrə sahələrdən əvvəlki illərdən çox məhsul götürüləcək. Fermer İbrahim Hacıyev deyir ki, başqa cür də ola bilməz. Axı, bu il seçkilər ilidir. Bu əziz günə hərə öz töhfəsini hazırlayır. Bizim də əsas vəzifəmiz iqtisadiyyatın yüksəlişinə nail olmaqdan dövlətə və dövlətçiliyə sədaqətlə xidmət etməkdən ibarətdir. Bu məqsədlə hamı əlbir, dilbir çalışır.

Əhməd İSAYEV

Azərbaycan. - 2013.- 16 avqust.- S. 10.