Təhsilə qayğı dövlət siyasətinin prioritet istiqamətidir

Dünya praktikası göstərir ki, bu gün insanın inkişafı sahəsində əsas ağırlıq məhz elm-təhsil sisteminin üzərinə düşür. Bu sahələr əhalinin həyat səviyyəsinin yüksəldilməsinin, insan inkişafı indeksinin ən mühüm amillərindən biri olmaqla hər bir ölkənin sosial-iqtisadi inkişafının sürətlənməsinə də hərtərəfli təsir göstərir. Elm, təhsil insanın istedadının, intellektinin üzə çıxmasına kömək göstərən mühüm vasitə olaraq cəmiyyətin inkişafının özülünü təşkil edir.

Hər bir xalq inkişaf yolunu məhz malik olduğu elmi-intellektual potensialla müəyyənləşdirərək dünya miqyasında layiqli yer tutmaq imkanı qazanır. Təcrübə göstərir ki, milli intibahı təmin edən başlıca vasitə - təhsil həm də cəmiyyət qarşısında dayanan bir çox əsaslı problemlərin həllində vacib rol oynayır. Mütərəqqi yeniliklərin tətbiq olunması yolu ilə milli təhsil sisteminin müasirləşdirilməsi, bir ictimai-iqtisadi formasiyadan digərinə keçid dövründə bu sahədə özünü göstərən obyektiv problemlərin tam aradan qaldırılması son illərdə Azərbaycanda həyata keçirilən dövlət siyasətinin tərkib hissəsinə çevrilmişdir.

Keçid dövrünü geridə qoyaraq inkişafının keyfiyyətcə yeni mərhələsinə adlamış müstəqil Azərbaycan mühüm makroiqtisadi göstəricilərə nail olmaqla yanaşı, elm və təhsil sahəsində də bir sıra uğurlu nəticələrə imza atır, dövlət səviyyəsində mütərəqqi islahatlar inamla davam etdirilir. Neft gəlirlərini güclü insan kapitalının formalaşdırılmasına yönəltməyi mühüm vəzifə kimi qarşıya qoyan Azərbaycan dövləti ölkə elminin və təhsilinin inkişafı məqsədilə yeni sənədlər qəbul edir.

Qloballaşma əsrində respublikada milli tərəqqinin yeganə yolu elm və təhsilin, müasir biliklərin, intellektual əməyin inkişafından, habelə kompyuter və informasiya texnologiyalarının bütün idarəetmə səviyyələrində geniş tətbiqindən keçir. Bu reallığı nəzərə alan dövlət başçısı cənab İlham Əliyev elm və təhsilə qayğını, bu sahədə özünü göstərən bir sıra problemlərin həllini hökumət qarşısında ciddi vəzifələrdən biri kimi müəyyənləşdirmişdir.

Azərbaycan Prezidentinin bu sahəyə xüsusi diqqətlə yanaşması həm də respublikamızın sürətli iqtisadi inkişaf yolunda olması, geniş maliyyə imkanları əldə etməsi ilə şərtlənir. Belə mühüm mərhələdə mövcud uğurların qorunub saxlanılması üçün idarəçilikdə yüksək elmi-intellektual səviyyənin təmin edilməsi son dərəcə vacibdir. Hazırda respublikanın təhsil sistemində davamlı inkişafa yönəlmiş əsaslı infrastruktur dəyişiklikləri aparılır, bir çox dövlət proqramları və layihələr həyata keçirilir.

Prezident İlham Əliyevin fərman və sərəncamları əsasında təhsil sahəsində 20-dək inkişafyönümlü xüsusi proqramın icrası təmin edilmişdir. Strateji əhəmiyyətli bu sənədlər bütövlükdə təhsil infrastrukturunun yeniləşdirilməsindən tutmuş məktəblərin informasiya-kommunikasiya texnologiyaları ilə təminatına qədər olan mühüm məsələləri əhatə etmişdir. Təhsilin səviyyəsini müasir standartlara uyğunlaşdırmaq, ali və orta məktəblərdə tədrisin keyfiyyətinin monitorinqini həyata keçirmək, təhsil sahəsində mövcud problemləri vaxtaşırı təhlil edərək müvafiq tədbirlərin görülməsinə nail olmaq məqsədilə dövlət başçısı hələ 2005-ci il 30 may tarixdə "Azərbaycan Respublikasının Prezidenti Yanında Təhsil üzrə Xüsusi Komissiyanın yaradılması haqqında" sərəncam imzalamışdır. Dövlət başçısının digər bir fərmanı ilə Azərbaycanda "Bilik günü" təsis edilmiş, təhsil müəssisələrində iş rejimi tənzimlənmişdir. Eyni zamanda, fərmanda respublikanın təhsil müəssisələrində təlimin keyfiyyətinin yüksəldilməsinə xidmət edən səmərəli fəaliyyət sisteminin qurulması ilə əlaqədar bir sıra tədbirlərin görülməsi də nəzərdə tutulmuşdur. Bununla yanaşı, köhnəlmiş, müasir tələblərə cavab verməyən məktəblərin təmiri və bərpası, yenidənqurulması isə ilk növbədə, təhsilin forma və məzmunca təkmilləşdirilməsi zərurətindən irəli gəlmişdir.

Ötən müddətdə bir çox layihələri uğurla gerçəkləşdirən Heydər Əliyev Fondunun bu sahədəki xidmətləri xüsusi vurğulanmalıdır. Azərbaycanın birinci xanımı Mehriban Əliyevanın rəhbərliyi altında fondun fəaliyyətinin prioritet istiqamətləri sırasında təhsil sahəsi mühüm yer tutur. Xatırladaq ki, "Yeniləşən Azərbaycana yeni məktəb" layihəsi cəmiyyətdə ciddi dəstəklə qarşılanmışdır. Layihə çərçivəsində 2005-ci ildən bu günədək 300-dən çox yeni məktəb, uşaq bağçası, uşaq evi, internat məktəbi binası tikilib istifadəyə verilmiş, əsaslı təmir və bərpa olunmuş, müasir avadanlıqlarla təchiz edilmişdir.

Fondun son illərdəki başlıca fəaliyyət istiqamətlərindən biri də ölkənin təhsil problemlərinin həllində nüfuzlu beynəlxalq təşkilatlardan sayılan UNESCO-nun geniş imkanlarından səmərəli şəkildə faydalanmaqdan ibarət olmuşdur. Azərbaycanla bu nüfuzlu beynəlxalq təşkilatın arasında bir neçə istiqamətdə əməkdaşlıq münasibətləri qurulmuşdur - bu əlaqələr əsasən "Təhsil hamı üçün" proqramını, "Assosiativ məktəblər", texniki-peşə sahəsində əməkdaşlıq, inklüziv təhsil layihəsi və digər sahələri əhatə edir. Fond hər il "Təhsilə dəstək" layihəsi çərçivəsində Ermənistanın Azərbaycana təcavüzü nəticəsində daimi yaşayış yerlərini tərk etmiş qaçqın və məcburi köçkün ailələrindən olan birinci sinif şagirdlərinə zəruri məktəb ləvazimatı hədiyyə edir. Gürcüstanda yaşayan azərbaycanlı uşaqlara, Qax, Zaqatala, Balakən rayonlarında tədrisin gürcü dilində aparıldığı məktəblərə hər il yeni dərslik və tədris ləvazimatları göndərilir.

Əminliklə demək olar ki, son illərdə respublikamızın əldə etdiyi uğurlu nəticələrin arxasında Azərbaycan Prezidenti İlham Əliyevin həyata keçirdiyi məqsədyönlü siyasət, elmi əsaslara və ölkəmizin mövcud potensialına söykənən inkişaf prioritetləri dayanır. İnanırıq ki, dövlət başçısının yürütdüyü bu iqtisadi siyasət nəticəsində respublikanın inkişaf tempi daha da yüksələcək, yaxın illərdə Azərbaycanda təhsil sahəsində özünü göstərən qlobal problemlər əsaslı surətdə aradan qalxacaq, milli təhsilin keyfiyyəti yaxşılaşacaq.

İradə MUSTAFAYEVA,

Binəqədi rayonu 135 nömrəli məktəbin müəllimi

Azərbaycan. - 2013.- 17 avqust.- S. 8.