Sumqayıt Cənubi Qafqazın ən güclü sənaye mərkəzlərindən birinə çevrilir

Dünyanın hansı qütbündə yerləşməsindən, mövcud iqtisadi potensialından asılı olmayaraq, hər bir dövlətin inkişaf səviyyəsini müəyyən edən ən başlıca meyarlardan biri də məhz lider amilidir. Milli lider fenomeninin müəyyən etdiyi inkişaf strategiyası ölkənin potensialını hərəkətə gətirir, bu potensialın realizə edilməsi üçün zəruri əsasları, prioritet istiqamətləri müəyyənləşdirir. Xalqımızın ümummilli lideri Heydər Əliyev də məhz belə fenomen rəhbərlərdən biri olaraq Azərbaycanın demokratik tərəqqisi üçün zəruri inkişaf kursunu irəli sürmüş, bu kursun alternativsizliyini real addımlar, əməli nəticələrlə sübuta yetirmişdir.

Özəl sektora mükəmməl dövlət dəstəyi

Ulu öndər Heydər Əliyev XX əsr Azərbaycan tarixində təkcə milli müstəqillik ideyasını praktik olaraq gerçəkləşdirmiş lider kimi yox, həm də yaratdığı dövlətin möhkəmliyini, dayanıqlığını təmin edən, onun hərtərəfli inkişafı üçün iqtisadi, siyasi, hüquqi zəmin hazırlayan böyük strateq, müdrik rəhbər kimi xalqın qəlbində yaşayır. Xalqın təkidli tələbi və istəyi ilə 1993-cü ilin iyununda Bakıya qayıdan Heydər Əliyev yorulmaq bilmədən, qətiyyət və böyük bacarıqla Azərbaycanın başı üstünü almış vətəndaş müharibəsi alovunu söndürmüş, ölkədə baş alıb gedən qanunsuz silahlı dəstələrin zərərsizləşdirilməsinə, ictimai-siyasi sabitliyin tam bərpasına, qanunçuluğun və hüquq qaydalarının möhkəmləndirilməsinə, cəbhə bölgəsində atəşkəs rejiminə nail olmuş, habelə demokratik inkişaf kursu ilə uzlaşan sosial-iqtisadi siyasət strategiyasını irəli sürmüşdür.

Həmin dövrdə bir ictimai-iqtisadi formasiyadan digərinə keçid dövrünü yaşayan Azərbaycanın hansı iqtisadi modelə üstünlük verəcəyi ilə bağlı çoxlu fikirlər, təkliflər irəli sürülsə də, böyük strateq Heydər Əliyev hansısa dövlətin təcrübəsinin olduğu kimi milli iqtisadiyyata köçürülməsini düzgün saymamışdır. Ümummilli lider demokratik həyat tərzinin diktə etdiyi gerçəklik kimi bazar iqtisadiyyatı prinsiplərinə sadiq qalaraq Azərbaycanın yeni dövr üçün inkişaf prioritetlərini müəyyənləşdirmiş və onu əsaslandırmışdır. Bu zaman Heydər Əliyev respublikanın özünəməxsus cəhətlərini, coğrafi-siyasi mövqeyini, təbii ehtiyatlarını, intellektual və insan resurslarını ciddiliklə nəzərə almış, vətəndaşların sosial mənafeyini əsas götürərək bazar iqtisadiyyatının prinsiplərinin mərhələlərlə tətbiqi zərurətini önə çəkmişdir. 1995-ci ildə ulu öndərin rəhbərliyi altında hazırlanaraq qəbul edilmiş müstəqil Azərbaycanın Konstitusiyası respublikanın gələcək iqtisadi inkişaf strategiyası üçün fundamental hüquqi baza rolunu oynamış, burada vətəndaşların azad sahibkarlıq, mülkiyyət, mənzil toxunulmazlığı, eləcə də sosial təminat hüquqları birmənalı təsbit olunmuşdur.

Ümumiyyətlə, Heydər Əliyevin böyük müdrikliklə müəyyənləşdirdiyi iqtisadi inkişaf strategiyasının əsasının üç mərhələdə həyata keçirilməsi nəzərdə tutulan islahatlar təşkil etmişdir: birinci mərhələdə güclü dövlət tənzimlənməsi ilə böhrandan çıxmaq, ikinci mərhələdə iqtisadiyyatın sabitliyini təmin etmək, üçüncü mərhələdə isə iqtisadi dirçəlişə nail olmaq. Hər bir mərhələyə uyğun həyata keçirilən iqtisadi islahatlar nəticəsində 1996-cı ildə respublika iqtisadiyyatında sabitlik təmin edilmiş, 1997-ci ildən sosial-iqtisadi inkişafda müsbət meyillər özünü göstərməyə başlamışdır. 1996-cı ildə ümumi daxili məhsulun artım sürəti 1,3, 1997-ci ildə 5,8, 1998-2003-cü illərdə isə orta hesabla 10 faiz təşkil etmişdir.

İqtisadi islahatların ardıcıl və sistemli şəkildə aparılmasının tərəfdarı kimi çıxış edən Heydər Əliyev yeni mərhələdə, ilk növbədə, dövlət mülkiyyəninin özəlləşdirilməsi vacibliyini önə çəkmiş, bu proses keçid dövrünün bəzi xırda çatışmazlıqlarına rəğmən, uğurla başa çatdırılmışdır. Ümummilli lider yaxşı başa düşürdü ki, dövlət mülkiyyətinin xalqın mənafeyinə uyğun formada özəlləşdirilməsi sərbəst bazar rəqabəti prinsiplərinin, xüsusi mülkiyyətçiliyin bərqərar olması, habelə milli iqtisadiyyatın dünya iqtisadi sisteminə inteqrasiyası, insanların şüurunda, həyat tərzində əsaslı dəyişişiklik deməkdir. Ölkədə həyata keçirilmiş özəlləşdirmə prosesinin məqsədi də məhz hər bir vətəndaşın iqtisadi islahatlarda şəxsi marağını təmin etmək, əhalinin həyat səviyyəsini yaxşılaşdırmaq, sağlam rəqabətə əsaslanan istehsal üçün şərait yaratmaq olmuşdur.

Ümummilli lider respublika iqtisadiyyatının keyfiyyətcə yeni mərhələsində məhz özəl sektoru sosial-iqtisadi inkişafın başlıca təminatçısı kimi dəyərləndirmiş, güclü sahibkarlar təbəqəsinin formalaşmasına, onların cəmiyyətdəki mövqelərinin güclənməsinə çalışmışdır. 1997-2002-ci illərdə respublikada sahibkarlığın inkişafı üçün zəruri maliyyə təminatı yaradılmış, süni maneələrin aradan qaldırılması üçün mükəmməl qanunvericilik bazası formalaşdırılmış, fəaliyyətin bu növü ilə məşğul olanların hərtərəfli stimullaşdırılması məsələsi diqqət mərkəzində saxlanılmışdır.

Kiçik və orta sahibkarlıq subyektlərinin normal fəaliyyəti üçün sonrakı mərhələdə "Azərbaycan Respublikasında kiçik sahibkarlığa dövlət köməyi haqqında" Azərbaycan Respublikasının Qanununa bir sıra mütərəqqi dəyişiklik və əlavələr edilmiş, "Haqsız rəqabət haqqında", "İnvestisiyaların qorunması haqqında", "İstehlak bazarı haqqında" və digər zəruri qanunlar qəbul edilmişdir. Bu qanunlar yerli və xarici sahibkarların təhlükəsiz və xüsusi risklilik tələb etməyən biznes fəaliyyətinə dövlət tərəfindən verilən hüquqi təminatı daha da gücləndirmiş, investisiyaların qarşılıqlı təşviqinə və qorunmasına əsaslı zəmin formalaşdırmışdır.

Ümummilli lider Heydər Əliyev daim iş adamlarının mənəvi hamisi kimi çıxış edərək mövcud problemlərin aşkarlanması məqsədilə dövlət-sahibkar dialoqunun genişləndirilməsində də maraqlı olmuşdur. 2002-ci il 10 və 25 aprel tarixlərdə yerli və xarici sahibkarlarla görüşən ulu öndər onları üzləşdiyi problemlər barədə açıq danışmağa dəvət etmiş, yaxından dinləmiş, mövcud problemlərin aradan qaldırılması üçün aidiyyəti dövlət qurumlarına zəruri tapşırıq və tövsiyələrini vermişdir. Həmin görüşlərin nəticəsi olaraq imzalanmış bir sıra vacib fərmanlar sahibkarlığın dəstəklənməsi və ölkədə investisiya mühitinin daha da təkmilləşdirilməsi baxımından keyfiyyətcə yeni mərhələnin təməlini qoymuşdur.

Siyasətdə və dövlət idarəçiliyində mütərəqqi ənənələrin qorunub saxlanılması hər bir xalqın sabit və davamlı inkişafı baxımından vacib əhəmiyyət daşıyır. Ümummilli lider Heydər Əliyev böyük müdrikliklə müəyyənləşdirdiyi milli inkişaf kursunu özündən sonra inamla davam etdirə biləcək layiqli siyasi varis yetişdirmiş lider kimi xalqının qəlbində yaşayır. Ötən 10 ildə ölkəyə inamla rəhbərlik edən Azərbaycan Prezidenti İlham Əliyev çoxşaxəli fəaliyyəti ilə ona bəslənilən ümidləri tam doğrultmuş, cəmiyyətin bütün gözləntilərini gerçəkləşdirməyə çalışmaqla, hər bir fərdin marağına cavab verən qətiyyətli qərarlar qəbul etmişdir. Həyata keçirilən uğurlu sosial-iqtisadi siyasət nəticəsində son 10 ildə Azərbaycan iqtisadiyyatı yüksək dinamizmlə inkişaf etmiş, xalqın mənafeyinə cavab verən bir sıra qlobal layihələr uğurla gerçəkləşdirilmiş, infrastrukturun müasirləşdirilməsi, biznes mühitinin daha da sağlamlaşdırılması, iş adamlarının dəstəklənməsi sahəsində mühüm tədbirlər həyata keçirilmişdir.

Sahibkarlığın inkişafı iqtisadi modernləşmənin vacib şərtidir

Prezident İlham Əliyevin ötən müddətdə sahibkarlığın inkişafı istiqamətində həyata keçirdiyi tədbirlər ardıcıllığı, səmərəliliyi və sistemliliyi ilə diqqəti cəlb etmişdir. Hələ 2004-cü il 1 fevral tarixdə Bakı Biznes Mərkəzində yerli sahibkarlarla görüşən dövlət başçısı onları narahat edən məsələləri diqqətlə dinləmiş, sahibkarları dəstəklədiyini, iş adamlarına gələcəkdə də lazımi köməyi göstərəcəyini bəyan etmişdir. Dövlət rəhbəri inhisarçılıq, sahibkarlara süni maneələrin yaradılması, hüquq-mühafizə orqanlarının iş adamlarının fəaliyyətinə müdaxiləsi hallarını pisləmiş, bu münasibət konkret qərarlarla müşayiət olunmuşdur. Antiinhisar fəaliyyətinin gücləndirilməsi, inflyasiyanın qarşısının alınması üçün əsaslı tədbirlərin görülməsi, qeydiyyat sisteminin sadələşdirilməsi, yerlərdə regional iqtisad məhkəmələrinin yaradılması və s. tədbirlər bunun əyani təcəssümüdür. Dövlət başçısı iqtisadiyyatın liberallaşdırılması, bazarın inhisardan, haqsız rəqabətdən azad olunması, özəl sektorun dəstəklənməsi, sahibkarlara güzəştli kreditlərin verilməsi sahəsində ciddi addımlar atmış, verdiyi bütün vədlərə sadiqlik nümayiş etdirmişdir.

Cənab İlham Əliyevin 2009-cu il 14 aprel tarixli "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı", Korrupsiyaya qarşı mübarizə üzrə Dövlət Proqramı (2004-2006-cı illər), "Sahibkarlığa dövlət maliyyə dəstəyinin göstərilməsi sahəsində əlavə tədbirlər haqqında", "Azərbaycan Respublikası Sahibkarlığa Kömək Milli Fondunun vəsaitinin istifadəsi qaydalarının təkmilləşdirilməsi haqqında", "Hüquqi şəxslərin dövlət qeydiyyatı və dövlət reyestri haqqında", "Azərbaycan Respublikasında azad iqtisadi zonaların yaradılması haqqında", "Azərbaycan Respublikasında sahibkarlığın inkişafı ilə bağlı bəzi tədbirlər haqqında" və s. fərman və sərəncamlar, qanunlar, dövlət proqramları sahibkarlığın inkişafına təkan vermiş, qeyri-neft sektorunun inkişafını stimullaşdırmışdır. Respublikamızda sahibkarlığın inkişafına mane olan süni maneələrin aradan qaldırılması istiqamətindəki fəaliyyətinin ardıcıl və davamlı səciyyə daşıdığını Prezident İlham Əliyevin 2007-ci il 30 aprel tarixdə imzaladığı "Azərbaycan respublikasında sahibkarlığın inkişafı ilə bağlı bəzi tədbirlər haqqında" fərman bir daha təsdiqləmişdir. Bu fərmanla indiyə qədər çoxpilləli biznesə başlamaq sahəsində mövcud problemlər həllini tapmış, o cümlədən süründürməçilik halları, bürokratik əngəllər aradan qaldırılmışdır. Sərəncam əsasında vahid kodlaşdırmanın aparılması, biznes strukturlarının "bir pəncərə" - vahid qeydiyyat orqanı tərəfindən qeydə alınması məsələləri uğurla tətbiq edilmişdir.

Prezident İlham Əliyevin rəhbərliyi altında həyata keçirilən iqtisadiyyatın şaxələndirməsi tədbirləri, sahibkarlığın inkişafı, investisiya mühitinin daha da yaxşılaşdırılması nəticəsində qeyri-neft sektorunun dinamik inkişafı davam edir və onun real artım tempi neft sənayesinin artım tempini üstələmişdir. 2013-ci ilin yanvar-may aylarında qeyri-neft sənayesinin 11 faizlik artım tempi bunu bir daha təsdiqləyir. Sevindirici haldır ki, qeyri-neft sektorunun inkişafında və bu sahədə istehsal olunan məhsulların həm kəmiyyət, həm də keyfiyyət etibarilə yüksəlişində sahibkarlar daha böyük rol oynamağa başlayırlar. Bütün bunlar faktiki olaraq Azərbaycan Prezidentinin ölkədə biznes mühitinin daha da yaxşılaşdırılması, bu sahəyə dövlət dəstəyi tədbirlərinin genişləndirilməsi, iqtisadiyyata yerli və xarici investisiyaların, müasir texnologiyaların, idarəetmə təcrübəsinin cəlb edilməsi, bu yolla yüksək keyfiyyətli, rəqabətqabiliyyətli məhsulların istehsal edilməsi istiqamətində həyata keçirdiyi siyasətin məntiqi nəticəsidir.

Prezident İlham Əliyev regionların sosial-iqtisadi inkişafına dair Dövlət Proqramının icrasının dördüncü ilinin yekunlarına həsr olunmuş konfransda sahibkarlığın inkişafının dövlət üçün prioritet məsələ olduğunu bir daha vurğulayaraq iş adamlarının fəaliyyətinə qanunsuz müdaxilə hallarının yolverilməzliyini önə çəkmişdir. "Mən daim sahibkarlarla görüşürəm, həm Bakıda, həm bölgələrdə açılışını etdiyim müəssisələrin sayı bəlkə də indi yüzlərlə, minlərlə ölçülür. Ancaq hər bir yerdə yerli icra orqanlarının rəhbərləri, icra başçıları, vəzifəli şəxslər sahibkarlara kömək göstərməlidirlər. Onların fəaliyyətinə dəstək verməlidirlər, onları incitməməlidirlər, onların işinə müdaxilə etməməlidirlər", - deyən Prezident İlham Əliyevin bu qətiyyətli mövqeyindən sonra sahibkarların qanuni mənafelərinin qorunması, onların fəaliyyətinə müdaxilələrin qarşısının alınması istiqamətində tədbirlər bir qədər də gücləndirilmişdir.

"Sahibkarlıq sahəsində aparılan yoxlamaların tənzimlənməsi və sahibkarların maraqlarının müdafiəsi haqqında" qanunun Milli Məclisdə qəbulu bunu bir daha təsdiqləyir.

10 fəsil, 38 maddədən ibarət layihədə sahibkarların risk qrupları üzrə bölgüsü aparılmış və bu bölğünün nəticəsindən asılı olaraq yoxlamaların aparılması tezliyi müəyyən edilmişdir. Sənədə əsasən, yüksək risk qrupuna aid sahibkarların fəaliyyəti ildə bir dəfədən çox olmayaraq, orta risk qrupuna aid olanlar iki ildə bir dəfədən çox olmayaraq, kiçik risk qrupuna aid sahibkarlar isə üç ildə bir dəfədən çox olmayaraq yoxlanacaqdır. Plan üzrə yoxlamanın müddəti orta və kiçik sahibkarlara münasibətdə 5 iş günündən, iri sahibkarlara münasibətdə isə 10 iş günündən artıq olmamaqla aparılacaqdır. Plandankənar yoxlama isə müvafiq olaraq iri sahibkarlara münasibətdə 5 iş günündən, orta və kiçik sahibkarlara münasibətdə 3 iş günündən artıq olmamalıdır.

Göründüyü kimi, belə bir qanunun qəbulu ilə sahibkarlıq subyektlərində aparılan yoxlamaların vahid qaydaları müəyyənləşdirilmişdir. Məqsəd sahibkarlıq subyektlərində çoxsaylı yoxlamaları azaltmaq, qanunsuz müdaxilələri aradan qaldırmaqdır. Yeni qanunda bir sahibkarın bir neçə qurum tərəfindən yoxlanmasının qarşısını almaq üçün vahid məlumat reyestrinin yaradılması da nəzərdə tutulmuşdur. Qanun sahibkarların fəaliyyətinə qanunsuz müdaxilə hallarının qarşısının alınmasına, bu məqsədlə qanunvericiliyin təkmilləşdirilməsinə, habelə institusional-təşkilati tədbirlərin həyata keçirilməsinə hesablanmışdır. Sənəd dövlət başçısının 2010-cu il aprelin 13-də imzaladığı "Sahibkarlıq sahəsində aparılan yoxlamaların nizama salınması və istehlakçıların hüquqlarının qorunmasının təmin edilməsinə dair bəzi tədbirlər haqqında" fərmanda əksini tapmış məqsədlərin reallaşdırılması baxımından da yeni imkanlar açır.

Qanuna görə, plandankənar (növbədənkənar) yoxlamalar yoxlayıcı orqanın istəyi ilə deyil, məhz konkret qanunun tələb etdiyi hallarda keçirilə bilər. Bu cür yoxlamalar yalnız sonuncu yoxlama nəticəsində aşkar edilmiş pozuntuların aradan qaldırılmasına dair qərar yerinə yetirilmədikdə, sahibkarın fəaliyyətinin məhdudlaşdırılması barədə qərarın icra vəziyyətinin yoxlanılmasına ehtiyac yarandıqda və konkret faktlara əsaslanan rəsmi müraciətlər olduqda, habelə sahibkar plandankənar yoxlamanın keçirilməsi barədə yoxlayıcı orqana müraciət etdikdə həyata keçirilə bilər.

Ümumilikdə hesab edirik ki, belə bir qanunun qəbulu Azərbaycanda sahibkarlığın inkişafına ölkə başçısı səviyyəsində diqqət və qayğının qabarıq təzahürüdür.

"Yeni Sumqayıt" - arzuların gerçəyə çevrildiyi məkan

Son 10 ildə sahibkarlığın, qeyri-neft sektorunun dinamik inkişafı, ümumilikdə regionların malik olduğu tarixi məşğulluq ənənələrinin bərpası istiqamətində atılan addımlar paytaxtla yanaşı, iri şəhər və rayonların da yüksəlişini təmin etmişdir. Respublikamızın ən böyük sənaye şəhərlərindən biri olan Sumqayıtın timsalında bu inkişaf və yüksəlişi, mənəvi tərəqqini daha qabarıq görmək olur. İndi Bakı şəhəri ilə yarışa girən Sumqayıtın inkişaf göstəriciləri burada əksər standartların paytaxtla uyğunlaşdırılmasına yol açır.

Ölkə başçısı 2011-ci ilin dekabrında Sumqayıta səfəri zamanı şəhərin sənaye potensialının bərpasını qarşıda mühüm vəzifələrdən biri kimi müəyyənləşdirmişdir: "Sumqayıt ölkəmizin sənaye mərkəzinə çevrilməlidir. Bunu etmək üçün də imkanlar vardır. Yenə də deyirəm, Sumqayıt sənaye şəhəri, kimyaçılar şəhəri kimi yaranmışdır. Ancaq indi Sumqayıt gərək müasir sənaye şəhəri kimi inkişaf etsin. Bunun üçün bizim konkret planlarımız vardır. Birinci növbədə, hər bir şəhərin sənaye potensialının inkişafı üçün vacib olan infrastruktur layihələri icra edilməlidir. Onların bir hissəsi reallaşıb. Bir müddət bundan əvvəl böyük elektrik stansiyası tikilmişdir. İndi elektriklə problem tamamilə yoxdur və o stansiyanın gücü gələcəyə də hesablanıbdır".

Təqdirəlayiq haldır ki, Sumqayıtın inkişafı konkret sahə üzrə məhdudlaşmayaraq çoxcəhətli xarakterə malikdir. Həmçinin şəhər rəhbərliyinin düzgün, məqsədyönlü və səmərəli idarəçiliyi, dəstəyi nəticəsində Sumqayıtın inkişafında hərtərəfli modernləşmə təmin olunur. Son illər şəhərdə sənaye obyektlərinin yenidən qurulması və modernləşdirilməsi işinə xüsusi diqqət yetirilir. Eyni zamanda, sənaye potensialının inkişafı üçün vacib olan infrastruktur layihələrinin icrası diqqət mərkəzində saxlanılır. Bütün bunlar isə öz növbəsində şəhərdə sahibkarlığın inkişafını daha da sürətləndirir. Əldə olunmuş yüksək inkişaf statistik rəqəmlərdə bir daha dolğun ifadəsini tapır. Ümumi məhsul buraxılışının həcmi ötən ilin müvafiq dövrü ilə müqayisədə 20,7 faiz artmışdır. Məhsul istehsalının 72 faizi özəl sektorun payına düşür. Şəhərdə iqtisadiyyatın müxtəlif sahələrində çalışan işçilərin orta aylıq əməkhaqqı 470 manat olmuşdur.

Şəhərin kimya və neft-kimya müəssisələrində ardıcıl şəkildə həyata keçirilən səmərəli müasirləşdirmə tədbirləri istehsalat nailiyyətlərində də özünü qabarıq şəkildə büruzə verir. Artıq kimya müəssisələrinin istehsalat göstəriciləri ötən ilin müvafiq dövrü ilə müqayisədə 2 dəfədən çox artmışdır.

Ölkə başçısının 2011-ci il 21 dekabr tarixli sərəncamı ilə Sumqayıtın sənaye zonasında Kimya Sənaye Parkının yaradılması günümüzün ən aktual layihələrindən biridir. Yeni müəssisənin inşası ilə ölkə sənayesinin özəl sektorunun, kiçik və orta biznesin inkişafına, nəticə etibarilə müasir texnologiyalar əsasında rəqabətqabiliyyətli sənaye məhsulları istehsalına, əhalinin yeni iş yerləri ilə təmin edilməsinə nail olunacaqdır. Magistral və dəmiryol xətlərinin Sumqayıt Kimya Sənaye Parkına yaxın olması, bu şəhərcikdə yerləşəcək emal müəssisələrinin müasir və dünya standartlarına cavab verən texnoloji avadanlıqlarla, xammal və yarımfabrikat məhsullarla təmin edilməklə son məhsulun istehsalına bilavasitə Azərbaycanda nail olunması iqtisadiyyatın daha da inkişaf etməsi üçün yeni və əlverişli perspektivlər açır.

Azərbaycan Prezidentinin 2012-ci il 5 noyabr tarixli fərmanı ilə informasiya və kommunikasiya texnologiyaları, kosmos, enerji səmərəliliyi sahələrində tədqiqatların aparılması, yeni və yüksək texnologiyaların hazırlanması üçün zəruri infrastrukturu, maddi-texniki bazası və idarəetmə qurumları olan Yüksək Texnologiyalar Parkının yaradılması istiqamətində müəyyən olunmuş tədbirlər davam etdirilir. Bundan başqa, şəhərdə "Azərboru" ASC-də boru istehsal fəaliyyəti genişləndirilməsi istiqamətində bir sıra işlər həyata keçirilmiş, müəssisədə işləyənlərin sayı ötən ilin müvafiq dövrü ilə müqayisədə artmışdır. Şəhərin iri yüngül sənaye müəssisələrindən olan "İntertextil" ASC-də pambıq iplik və trikotaj məhsullar istehsalı davam etdirilmiş, işin həcmi əvvəlki illərlə müqayisədə artmışdır. Hazırda müəssisədə işləyənlərin sayı 400 nəfərdən çoxdur və onların əksəriyyətini qadınlar təşkil edir.

Azərbaycan Prezidenti İlham Əliyevin diqqət və qayğısı sayəsində Sumqayıtda elektroenergetika sahəsində yeni infrastruktur layihələrinin həyata keçirilməsi də diqqətdə saxlanılır. Sumqayıt Texnologiyalar Parkında respublika üçün mühüm əhəmiyyət kəsb edən və ixrac potensialına malik elektroenergetika və maşınqayırma sənayesi məhsulları istehsalının həcmi genişlənir. Texnologiyalar Parkında respublika əhəmiyyətli müxtəlif çeşidli məhsullar, o cümlədən müxtəlif tip kabellər, transformatorlar, yüksək gərginlikli avadanlıqlar, hidroturbinlər, su nasosları, elektrik mühərrikləri, borular, texniki qazlar istehsal edilir. Texnologiyalar Parkı yüzlərlə iş yerinin açılmasına şərait yaratmaqla yanaşı, ölkə və Sumqayıt şəhərinin iqtisadiyyatının inkişafında mühüm rol oynayır və əhalinin sosial həyat səviyyəsinin əhəmiyyətli dərəcədə yaxşılaşdırılmasına kömək edir.

Hazırda Sumqayıt Texnologiyalar parkında metal konstruksiyaların hazırlanması və quraşdırılması, bioloji təmizləmə qurğusunun inşası yekunlaşmaq ərəfəsindədir. Kabel zavodunun ikinci mərhələsinin, Alüminium və mis profillərin istehsalı, Sendviç panelləri istehsalı, Transformatorların istehsalı zavodlarının inşası davam etdirilir. Texnoparkda səmərəli texnologiyaların istehsalı üzrə binaların işıqlandırılması üçün LED lampaların və akkumulyator batareyalarının istehsalı sahələrinin tikintisi başa çatdırılmışdır.

Sənayeləşmə istiqamətində həyata keçirilən tədbirlərin nəticəsi kimi 2013-cü ilin birinci yarısında şəhərdə 1900 yeni iş yeri açılmışdır. Möhtərəm Prezident Sumqayıta, onun əməksevər adamlarına daim xüsusi qayğı göstərir, şəhərin inkişaf perspektivlərini diqqət mərkəzində saxlayır, abadlaşdırma, yenidənqurma, yaşıllaşdırma işlərinə lazım olan vəsaitləri əsirgəmir. Çoxmərtəbəli binaların lift təsərrüfatının maddi-texniki bazasının möhkəmləndirilməsi məqsədilə 2013-cü il 3 aprel tarixli sərəncamla Sumqayıt Şəhər İcra hakimiyyətinə 1 milyon manat vəsaitin ayrılması da sumqayıtlılara olan yüksək diqqət və qayğıdan xəbər verir.

Bütün bunlar hazırda şəhər rəhbərliyinin xüsusi diqqəti və nəzarəti altında abadlıq-quruculuq işlərinin də geniş vüsət almasına imkan yaratmışdır. Hazırda şəhərə dəvət olunmuş bir neçə qrup yüksək ixtisaslı memarların iştirakı ilə ümummilli liderin adını daşıyan "Heydər parkı"nda "Heydər Əliyev Mərkəzi"nin və Nəsimi adına Mədəniyyət və istirahət parkının abadlaşdırılaraq yenidən qurulması, ərazidə yeni yaşıllıqların salınması, dekorativ kol və bitkilərin əkilməsi məqsədilə müvafiq layihələrin icrası yekunlaşır. Şəhərdə yenidənqurma və abadlıq işlərinin davam etdirilməsi məqsədilə mərkəzi küçələrin və prospektlərin simasının müasir dövrün tələblərinə uyğun dəyişdirilməsi, yaşıllaşdırılması, sıxlıq yaratmaqla günün tələblərinə cavab verməyən, şəhərin estetik görünüşünə xələl gətirən müxtəlif ölçülü köşk və quraşdırma obyektlərinin digər ərazilərə köçürülməsi, bardür və işıq sütunlarının yenidən qurulması, binaların dam örtüklərinin və fasad hissələrinin təmiri işləri aparılır. Hazırda şəhərin H.Əliyev, Koroğlu prospektləri, N.Nərimanov və 20 Yanvar küçələri böyük tikinti meydanını xatırladır. Görülən işlərin isə bir məqsədi var: ölkə başçısının irəli sürdüyü "Yeni Sumqayıt" layihəsinin ən qısa zamanda gerçəkləşdirilməsinə nail olmaq!

Bir sözlə, Azərbaycanın dinamik inkişafının əsas ünvanlarından birinə çevrilən Sumqayıt bu gün sürətli intibah dövrünü yaşayır. Abadlıq və quruculuq işlərinin daha geniş vüsət aldığı gənclər şəhəri simasını günü-gündən gözəlləşdirir, təkcə daimi sakinlərinin yox, şəhərə gələn qonaqların xatirəsində də silinməz izlər buraxır. Möhtərəm Prezident İlham Əliyevin diqqət və qayğısı ilə həyata keçirilən tədbirlər qarşıdakı dövr ərzində Sumqayıtda daha böyük xarüqələrin yaradılacağına, "gənclər şəhəri"nin təkcə Azərbaycanın yox, regionun ən gözəl şəhərlərindən birinə çevriləcəyinə şübhə yeri qoymur.

Aslan MANAFOV

Azərbaycan. - 2013.- 20 avqust.- S. 2.