«ECO CHRONICLE» jurnalında ingilis dilində «Azərbaycan-İran iqtisadi münasibətlərində mövcud vəziyyət: imkanlar və perspektivlər» sərlövhəli geniş məqalə dərc edilmişdir

Azərbaycan Dövlət Teleqraf Agentliyinin (AzərTAc) İrandakı xüsusi müxbiri Sabir Şahtaxtı "ECO CHRONICLE" jurnalında ingilis dilində "Azərbaycan-İran iqtisadi münasibətlərində mövcud vəziyyət: imkanlar və perspektivlər" sərlövhəli geniş məqalə ilə çıxış etmişdir.

AzərTAc xəbər verir ki, məqalədə Azərbaycan ilə İran arasında diplomatik əlaqələrin tarixindən, Azərbaycan-İran münasibətlərinin keyfiyyət mərhələlərindən, iki ölkə arasındakı iqtisadi layihələrin əhəmiyyətindən və digər mühüm məqamlardan bəhs olunur. Müəllif Azərbaycan-İran münasibətlərinin möhkəmləndirilməsində, dostluq əlaqələrinin yaranmasında və inkişafında ümummilli lider Heydər Əliyevin tarixi xidmətlərindən söz açır. Qeyd edilir ki, ulu öndər tərəfindən müəyyən edilən xarici siyasət kursunun Prezident İlham Əliyev tərəfindən uğurla davam etdirilməsi Azərbaycan-İran münasibətlərində də inkişaf tendensiyasını əzmlə qoruyub saxlayır.

Məqalədə, həmçinin Azərbaycanın müasir inkişaf istiqamətləri, ölkədə həyata keçirilən quruculuq işləri, əhalinin rifahının yaxşılaşdırılması sahəsində görülən tədbirlər, yeni infrastruktur layihələrinin əhəmiyyəti də öz əksini tapmışdır. Müəllif İqtisadi Əməkdaşlıq Təşkilatının həyata keçirdiyi beynəlxalq layihələrdə Azərbaycan Respublikasının aparıcı tərəf olduğunu vurğulayaraq qeyd edir ki, Azərbaycanda infrastrukturun beynəlxalq standartlara uyğun qurulması 2010-cu ilin sentyabrında Tehran-İslamabad marşrutu üzrə yola çıxan avtomobil karvanının Astara-Bakı-Biləsuvar-Təbriz-Culfa-Sədərək trayektoriyası ilə hərəkət etməsinə səbəb olmuşdur.

Məqalədə təcavüzkar Ermənistanın işğalçılıq siyasəti nəticəsində Azərbaycan torpaqlarının 20 faizinin işğal olunmasının ağır nəticələri, Ermənistan-Azərbaycan münaqişəsinə münasibətdə və Azərbaycanın ərazi bütövlüyünün dəstəklənməsində İranın rəsmi mövqeyi də oxucuların diqqətinə çatdırılır.

Tarixi faktlara, Azərbaycanın İrandakı səfirliyindən əldə edilmiş rəsmi sənədlərə, habelə AzərTAc vasitəsilə müxtəlif dövrlərdə yayılmış informasiyalara əsaslanan məqalə ingilisdilli oxucular və tədqiqatçılar üçün əhəmiyyətli mənbədir.

Qeyd edək ki, İqtisadi Əməkdaşlıq Təşkilatının aylıq nəşri olan "ECO CHRONICLE" jurnalının tirajı beş min nüsxədir. Əsasən Tehranda fəaliyyət göstərən diplomatik korpus və ölkənin iqtisadi-siyasi elitası arasında yayımlanan jurnal dünyanın 25-ə yaxın ölkəsinə çatdırılır.

Azərbaycan. - 2013.- 20 avqust.- S. 3.