Şeyxülislam Allahşükür Paşazadə Əmmanda keçirilən beynəlxalq konfransın işində iştirak edir

Əmmanda "Əhl əl-Beyt" Kral İslam Akademiyasının himayəsi ilə islam dövlətlərinin davamlı inkişafı məsələlərinə həsr edilmiş beynəlxalq konfrans açılmışdır. Bu tədbirdə dünyanın 30-dan çox dövlətini təmsil edən fəxri qonaqlar arasında Qafqaz Müsəlmanları İdarəsinin sədri, "Əhl əl-Beyt" İordaniya Kral Akademiyasının həqiqi üzvü Şeyxülislam Allahşükür Paşazadə də iştirak edir.

Kral Akademiyasının rəhbəri Əmir Qazi İbn-Məhəmməd konfrans iştirakçılarını salamlayaraq tədbirin məqsəd və vəzifələri, islam təfəkkürünün inkişaf meyilləri, islam dünyagörüşlü müasir müsəlman dövlətlərində demokratik proseslərin qarşılıqlı təsiri barədə söhbət açmışdır. Onun fikrincə, son üç ildə bir sıra müsəlman ölkələrində baş verən hadisələrlə əlaqədar, belə bir konfransın keçirilməsi zəruridir. Bu konfrans müsəlman ölkələrində yaranmış vəziyyəti daha yaxşı anlamağa və vahid mövqe barədə fikir mübadiləsi aparmağa imkan verəcəkdir.

İordaniya Haşimilər Krallığının Kralı zati-aliləri II Abdullanın himayəsi altında fəaliyyət göstərən, Əmir Qazi İbn-Məhəmmədin rəhbərlik etdiyi bu nüfuzlu akademiya islamın təbliği, mühüm ümumbəşəri dəyərlərin öyrənilməsi üzrə qiymətli araşdırmalar, habelə dinlərarası əməkdaşlıq və konfessiyalararası yaxınlaşma istiqamətində uğurlu səyləri sayəsində bütün dünyada məşhurdur.

Vətəndaş cəmiyyətinin formalaşmasında islami dəyərlərin roluna həsr edilmiş tədbirdə Şeyxülislam A.Paşazadənin məruzə ilə çıxış edəcəyi gözlənilir.

AzərTAc

Azərbaycan. - 2013.- 20 avqust.- S. 7.