Maestro Niyazinin xatirəsi ehtiramla anılmışdır

Avqustun 20-də dünya şöhrətli dirijor, bəstəkar, ictimai xadim, SSRİ xalq artisti, Sosialist Əməyi Qəhrəmanı Niyazi Tağızadə-Hacıbəyovun anadan olmasının 101-ci ildönümü münasibətilə görkəmli sənətkarın xatirəsi anılmışdır.

AzərTAc xəbər verir ki, əvvəlcə Niyazinin mənzil-muzeyinin əməkdaşları Fəxri xiyabana gələrək maestronun məzarı önünə təzə-tər güllər düzmüş, xatirəsinə dərin ehtiramlarını bildirmişlər.

Sonra mənzil-muzeydə maestronun anadan olmasının 101-ci ildönümü münasibətilə tədbir keçirilmişdir.

Əvvəlcə Üzeyir Hacıbəyli adına Bakı Musiqi Akademiyasının professoru, əməkdar incəsənət xadimi, pianoçu Ülviyyə Hacıbəyova Niyazinin əsərlərini ifa etmişdir.

Niyazinin mənzil-muzeyinin direktoru Rza Bayramov bildirmişdir ki, Azərbaycanın mədəniyyət tarixində dünya musiqi xəzinəsinə daxil olmuş şəxsiyyətlər çoxdur. Belə sənətkarlar sırasında Niyazinin xüsusi yeri vardır.

Diqqətə çatdırılmışdır ki, 1912-ci il avqustun 20-də Tbilisidə anadan olmuş maestro Niyazinin doğum günü hər il muzey tərəfindən geniş qeyd edilir.

Bildirilmişdir ki, Niyazi klassik musiqimizin banisi Üzeyir Hacıbəylinin, sözün əsl mənasında, davamçısı olmaqla öz gərgin əməyi və istedadı nəticəsində Hacıbəyovlar nəslinin görkəmli nümayəndəsinə çevrilmişdir. Orijinal fitri istedad, yüksək musiqi mədəniyyəti, möhkəm iradə onun yaradıcılığı üçün səciyyəvidir.

Qeyd olunmuşdur ki, Niyazinin mənzil-muzeyinin açılışında ümummilli lider Heydər Əliyev şəxsən iştirak edərək maestronun həm fitri istedadına, həm musiqi sənətində xüsusi üslubuna, həm də bənzərsiz yaradıcılıq yoluna görə digər bəstəkar və dirijorlardan seçildiyini söyləmişdir.

Nəzərə çatdırılmışdır ki, Niyazinin interpretasiyalarında klassik və müasir əsərlər daha dolğun, ifadəli, yüksək temperamentdə səsləndirilmişdir. Onun repertuarında Qərbi Avropa, rus klassiklərinin və müasir xarici bəstəkarların əsərləri xüsusi yer tutmuşdur.

Xüsusi vurğulanmışdır ki, Azərbaycan bəstəkarlarının və peşəkar dirijorluq məktəbinin formalaşması və inkişafında Niyazinin rolu böyük olmuşdur. Bundan əlavə, maestro Niyazi ifaçılar nəslinin yetişməsində və formalaşmasında da xüsusi rol oynamışdır. Fidan və Xuraman Qasımova bacıları, Lütfiyar İmanov, Firəngiz Əhmədova və başqa ifaçıları opera sənətinə məhz Niyazi gətirmiş və onlara dünya şöhrəti qazandırmışdır.

Niyazi "Rast" simfonik muğamının, "Xosrov və Şirin" operasının və "Çitra" baletinin, simfonik əsərlərin, kamera instrumental musiqilərinin, romansların müəllifidir.

Dünya şöhrətli musiqiçi onlarla xarici ölkədə qastrol səfərlərində olmuş, Azərbaycan musiqisini yüksək səviyyədə təmsil etmişdir.

Mənzil-muzeyin şöbə müdiri Xanım Abdinova Niyazinin filmlərə bəstələdiyi musiqilər haqqında məlumat vermişdir. Bildirmişdir ki, sənətkar simfonik orkestr və fortepiano üçün əsərlər yazmaqla yanaşı, filmlərə, teatr tamaşalarına da musiqi bəstələmişdir. O, ilk olaraq "Almaz" filminə musiqi yazmışdır. Sonralar "Kəndlilər", "Yeni horizont", "Fətəli xan" və s. filmlərə musiqi bəstələmişdir. Niyazi bədii filmlərlə yanaşı, "Ordenli Azərbaycan", "Arazın o tayından", "Türk qadının baharı", "Doğma xalqıma" kimi sənədli filmlərə də musiqi yazmışdır. Həmçinin bir çox sənədli və bədii filmlərin dirijorluq işi və musiqi tərtibatı Niyaziyə məxsusdur. Onun kino sahəsində sonuncu işi "Üzeyir ömrü" filmi olmuşdur.

Tədbir çərçivəsində musiqisini dahi Niyazinin yazdığı "Kəndlilər" filmi nümayiş etdirilmişdir.

Avqustun 20-də həmçinin Niyazinin doğum günü münasibətilə görkəmli sənətkarın mənzil-muzeyində "Açıq qapı" günü elan edilmişdir.

Azərbaycan. - 2013.- 21 avqust.- S. 6.