Bütün sahələrdə irəliləyiş var

Bir neçə ay bundan əvvəl Şahbuz rayonuna gedəndə adamı Naxçıvandan başlayaraq rayon mərkəzinə qədər ağır yol texnikalarının səs-küyü müşayiət edirdisə, indi yeni asfaltlanmış və genişləndirilmiş yolda rahatlıq və səssizlik hökm sürür. Yayın qızmar, isti günlərində muxtar respublikanın ən sərin rayonuna gedib buradakı inkişafla, yeni binalarla, genişləndirilmiş yollarla tanışlıqdan sonra havanın sərinliyi ruhumuza da, ovqatımıza da bir sərinlik gətirdi.

Cari ilin ötən dövrü ərzində rayonda görülmüş işlərlə tanışlığımız zamanı öyrəndik ki, burada sosial-iqtisadi inkişafı, əhalinin həyat səviyyəsinin yüksəlməsi istiqamətində məqsədyönlü iş aparılmışdır. Tikinti-abadlıq və quruculuq işlərinin həcmi genişlənmiş, yeni iş yerləri açılmışdır. İstər rayon mərkəzi, istərsə də qəsəbə və kəndlərin siması tamamilə dəyişmişdir.

Bu dövr Şahbuz şəhərində ötən ildən tikintisinə başlanmış "Naxçıvan Aqrolizinq" Açıq Səhmdar Cəmiyyətinin Şahbuz rayon bazası, Ağbulaq kəndində istirahət mərkəzi istifadəyə verilmiş, mart ayındansa Şahbuz şəhərində Yeni Azərbaycan Partiyası Şahbuz rayon təşkilatı üçün yeni binanın, Kükü, Güney Qışlaq, Ayrınc, Qızıl Qışlaq, Sələsüz kəndlərində kənd və xidmət mərkəzlərinin, Qızıl Qışlaq kəndində 110, Kükü kəndində 198 şagirdlik məktəb binalarının, Kükü kəndində həkim ambulatoriyasının tikintisinə və Sələsüz kəndində 234 yerlik məktəb binasının əsaslı təmirinə başlanmışdır. Tikilməkdə və təmirdə olan obyektlərin vaxtında istifadəyə verilməsi üçün lazımi tədbirlər həyata keçirilir. Həmçinin 2012-ci ilin yaz aylarından başlayaraq Şahbuz şəhərində su, kanalizasiya sistemi yenidən qurulur.

Rayonda aqrar sahənin intensiv inkişafına, məhsul istehsalının artırılmasına əsaslı şərait yaradılmışdır. Bu sektorun inkişafı istər əhalinin ərzaq məhsullarına olan tələbatının ödənilməsində, istərsə də emal müəssisələrinin xammalla təchizatında böyük əhəmiyyətə malikdir. Məşğul əhalinin daha çox cəmləşdiyi aqrar sektorun inkişafı məqsədilə şəxsi mülkiyyətdəki torpaqlardan səmərəli istifadə edilməsinə göstərilən dövlət qayğısı sayəsində bu sahəyə maraq xeyli artmışdır. Ötən il bu ilin məhsulu üçün 1127 hektar sahədə payız əkini keçirilmiş, cari ilin yazında 201 hektar sahədə yazlıq arpa əkilmiş, ümumilikdə isə 1328 hektar sahədə taxıl əkini aparılmış və hər hektardan 27,3 sentner məhsul toplanmışdır. Həmçinin cari ildə 460 hektarda kartof, 283 hektarda tərəvəz, 239 hektarda dənli-paxlalı, 6 hektarda bostan bitkiləri əkilmişdir.

"Kənd təsərrüfatı məhsullarının istehsalçılarına dövlət dəstəyi haqqında" Prezidentin müvafiq sərəncamının icrası ilə bağlı məhsul istehsalçılarına istifadə etdikləri yanacaq, motor yağları və gübrələrə görə yardımların verilməsi həm məhsul istehsalının artmasında, həm də torpaqlardan səmərəli istifadə olunmasında xüsusi önəm kəsb edir. Təkcə 2013-cü ilin ötən dövründə 81 nəfərə istifadə etdikləri yanacaq, motor yağına görə 105 min manat yardım, 45 nəfərə 1127 hektara səpilmək üçün 147 ton gübrə verilmişdir. Həmçinin 262 nəfər 262 min manat güzəştli kredit almışdır.

Hesabat dövründə rayondaxili avtomobil yollarının təmiri və abadlığına diqqət xeyli artırılmış, Gömür və Ağbulaq yollarına asfalt-beton örtük salınmış, yol kənarlarında dəmir məhəccərlərdən ibarət baryerlər quraşdırılmışdır. Habelə Ayrınc, Kükü və Qızıl Qışlaq kəndlərində körpülər salınmış, Ayrınc- Kükü, Güney Qışlaq avtomobil yolunun xeyli hissəsinə asfalt verilmişdir. Bundan əlavə, ötən ildən tikintisinə başlanmış, uzunluğu 59,2 kilometr olan Naxçıvan-Şahbuz-Batabat avtomobil yolunun yol yatağı genişləndirilmişdir. Yolun Naxçıvan-Şahbuz hissəsinə asfalt-beton örtük salınmışdır. Magistralın Şahbuz-Batabat hissəsində isə işlər sürətlə davam edir.

Şahbuzlular dövlətin göstərdiyi diqqət və qayğıya cavab olaraq öz işlərinə daha məsuliyyətlə yanaşırlar. İstər dövlət idarə və təşkilatlarında işləyənlər, istərsə də torpaq mülkiyyətçiləri, kənd sakinləri bütün imkanlardan maksimum istifadə etməyə çalışırlar. Bu da qarşıya qoyulmuş vəzifələrin həyata keçirilməsinə etibarlı zəmanət yaradır.

Elxan MƏMMƏDOV

Azərbaycan. - 2013.- 22 avqust.- S. 6.