Ağdaş uğurlarını artırır

Ağdaş şəhəri öz yaşıllığı və səliqə-sahmanı ilə həmişə seçilib. Bu səliqə hətta adamların daha çox toplaşdığı yerlərdə də hiss olunur. Əlbəttə, yaşıllıq, səliqə-sahman təmizlik, sağlamlıq deməkdir. Rayonda olarkən öyrəndik ki, Ağdaş şəhəri ərazisində və magistral yolların kənarlarında 50 minədək müxtəlif növ ağac əkilib. Heydər Əliyev prospektindəki çoxmənzilli yaşayış binalarının ön hissəsində də yeni yaşıllıq massivi salınıb.

Əvvəldən məlumatımız var idi ki, Ağdaş şəhərində yeni inzibati mərkəz yaradılır. Odur ki, işlərin gedişi ilə maraqlandıq. Öyrəndik ki, həmin ərazidə Heydər Əliyev Mərkəzi inşa olunur, Bayraq meydanı yaradılır, icra hakimiyyəti və Yeni Azərbaycan Partiyası rayon təşkilatı, həmçinin Yanğından Mühafizə İdarəsi üçün yeni binalar tikilir. İndiyəcən isə eyni vaxtda 2 kənd məktəb binasının tikintisi tamamlanıb, 5 kənd məktəbinin tikintisi davam edir. Daha 5 kənd məktəbinin tikintisinə yaxın günlərdə başlanacaq. Bunlardan əlavə, bir məktəbəqədər tərbiyə müəssisəsi üçün yeni binanın tikintisi və birinin də əsaslı təmir işləri gedir. Bu il tikintisinə başlanılacaq Aralbir və Tofiqi kəndlərinin hər birində 220, Qülbəndə və Qarağan-Şıxlar kəndlərinin hər birində 180 və Ərəbşəki kəndində 80 şagirdlik yeni məktəb binalarının tikintisi üçün layihə smeta sənədləri hazırlanıb. Qoqəti, Ərəbocaq və Tofiqi kəndlərində həkim məntəqələrinin tikintisi isə başa çatdırılıb.

Rayonda yol infrastrukturunun yaxşılaşdırılması istiqamətində də mühüm işlər görülür. 20 minə yaxın əhalinin və 12 yaşayış məntəqəsinin istifadə etdiyi 34 km uzunluğunda Ləki-Pirəzə-Xınaxlı kənd avtomobil yolunun əsaslı təmirinə başlanılıb və hazırda yolun 11,4 km hissəsində son tamamlama işləri görülür.

Ağdaş şəhərinin su-kanalizasiya sistemi də yenidən qurulur. İşin əsas mərhələsinin həyata keçirilməsi üçün tenderin qalibi olmuş Türkiyənin "ALKE" Mühəndis-İnşaat, Sənaye, Ticarət Anonim Şirkəti tərəfindən layihənin icrası istiqamətində müəyyən işlər görülüb. Ağdaş şəhərinin ərazisinin genişləndirilməsi ilə əlaqədar şəhər ərazisinə qatılmış yaşayış məntəqələrinin də su-kanalizasiya xidmətləri ilə təmin edilməsi üçün yeni layihənin hazırlanmasına başlanılıb. Şəhərə yaxın olan və magistral su-kanalizasiya xətlərinin üstündə yerləşən kəndlərin və Ləki qəsəbəsinin içməli su və kanalizasiya xidmətlərinin təşkili üçün isə "Azərsu" ASC qarşısında məsələ qaldırılıb.

Rayon əhalisinə elektrik enerjisi və təbii qazın verilməsi istiqamətində də gərəkli tədbirlər görülür. Aldığımız məlumata görə, ilin əvvəlindən 45 km uzunluğunda elektrik verilişi xətti əsaslı və cari təmir olunub. Rayonun Kükəl kəndi ərazisində tikintisinə 2010-cu ildə başlanılmış Ağdaş Regional Elektrik Yarımstansiyasının tikintisi də davam edir.

Ağdaş şəhərinin, Ləki qəsəbəsinin küçələrində və kəndlərdə müxtəlif ölçülü qaz xətləri yenisi ilə əvəz olunub. Tofiqi, Əmirmahmud, Qarağan-Saat, Bəylik, Güvəkənd və Əmirarx kəndlərinə təbii qazın verilməsi üçün 989 yeni qaz sayğacı quraşdırılıb və müxtəlif ölçülü qaz xətləri çəkilib. Tofiqi kəndinə artıq təbii qaz verilib.

Ağdaşda sənaye sahələrinin inkişafına da ciddi fikir verilir. Belə ki, "Orelay" şirniyyat istehsalı müəssisəsinin yeni istehsal sexinin, beton istehsalı zavodunun tikintisində işlər tamamlanmaq üzrədir. Qarışıq yem istehsalı, kərpic və dam örtükləri istehsalı müəssisələrinin tikinti işləri davam edir. Onu da öyrəndik ki, il başlayandan əvvəlki ilin eyni dövrü ilə müqayisədə 4,9 faiz çox sənaye məhsulu istehsal olunub.

Rayonun Ərəbocaq kəndində 1200 başlıq müasir tipli heyvandarlıq kompleksinin tikintisində son tamamlama işləri görülür. Kompleksə bu yaxınlarda Macarıstandan 400 baş yerli şəraitə uyğun ətlik və südlük mal-qara gətirilib. 1000 hektar sahədə biyan yetişdirilməsinə və biyan istehsalı müəssisəsinin yaradılmasına başlanılması əhalinin işlə təminatı baxımından da çox faydalı olacaq.

Telman NƏZƏRLİ

Azərbaycan. - 2013.- 22 avqust.- S. 6.