Dövlət qayğısı Zərdabın simasını dəyişir

Yeniləşən dünyada Azərbaycan əhalisinin müasir standartlar səviyyəsində sosial-iqtisadi təminatı üçün dövlət bütün gərəkli tədbirləri həyata keçirir. Ölkəmizin sosial-iqtisadi qüdrəti artdıqca regionların hərtərəfli inkişafı daha da sürətlənir. Gerçəkləşdirilən layihələr bölgələrin simasını dəyişməklə yanaşı, insanların rifahının yaxşılaşmasında da əhəmiyyətli rol oynayır. Onu da qeyd edək ki, Sahibkarlığa Kömək Milli Fondunun xətti ilə həyata keçirilən kreditləşmə bir çox layihələrin gerçəkləşməsində mühüm rol oynayır.

Ölkə Prezidenti İlham Əliyev çıxışlarında dəfələrlə bəyan edib ki, sahibkarlığın inkişafı üçün hər yerdə, o cümlədən bölgələrdə lazımi şərait yaradılmalıdır.

Sahibkarlığın inkişafı Zərdab rayonunda da prioritet istiqamət sayılır. Bunun üçün rayonda lazımi şərait yaradılır. İqtisadi İnkişaf Nazirliyi və Zərdab Rayon İcra Hakimiyyətinin birgə təşkilatçılığı ilə sahibkarlar və sahibkarlıq fəaliyyətinə yeni başlayanlar üçün maarifləndirici treninqlərin keçirilməsi də çox əhəmiyyətlidir. Sahibkarlığa göstərilən dövlət dəstəyinin nəticəsi olaraq sahibkarların əməli fəaliyyətində aktivlik daha da artır. Rayonda sahibkarlara məxsus yeni xidmət obyektləri istifadəyə verilir və tikilən obyektlər milli memarlıq baxımından Zərdab şəhərinin görünüşünü daha da yaxşılaşdırır.

Bu ilin may ayında Məmmədqasımlı kəndində sahibkar tərəfindən müasir taxıl anbarı və un dəyirmanı da tikilib istifadəyə verilib. Onu da qeyd edək ki, ilin əvvəlindən rayonda sahibkarlıq fəaliyyəti ilə məşğul olan 10 hüquqi və 178 fiziki şəxs qeydiyyatdan keçib, 184 kiçik sahibkarlıq subyektində 209 nəfər işlə təmin olunub.

İşdən söz düşmüşkən, rayonda olarkən öyrəndik ki, 2013-cü ilin ilk yarısı ərzində 224 daimi iş yeri yaradılıb. Başqa bir faktı da qeyd edək: həmin müddətdə rayon iqtisadiyyatının əsas sahələrində 60 milyon 767 min manatlıq məhsul istehsal edilib. Bu isə əvvəlki ilin müvafiq dövründəkindən 12 milyon manata qədər çoxdur.

Abad el yolundan bəllidir, - deyərlər. Yol tikintisi ilə bağlı Zərdabda da xeyli iş görülüb. Zərdab-Yuxarı Seyidlər-Siləbəyli avtomobil yolunun 11 kilometrlik hissəsinə ötən il yüksək keyfiyyətli asfalt döşənib (5,4 milyon manat vəsait xərclənib). Həmin yolun tikintisinin ikinci mərhələsi üçün 6 milyon 450 min manat vəsait ayrılıb.

Zərdab-Mollakənd yolunun 17 kilometr hissəsində asfalt-beton örtük çəkilib. Əlbəttə, yolların rahatlığı insanların dolanışığına, rahat həyat tərzinə əhəmiyyətli dərəcədə müsbət təsir edir.

Zərdab kimi yayı çox isti olan aran rayonunda içməli suya tələbat həmişə prioritet olub. Bu sahə ilə bağlı görülən işlər indi də davam etdirilir. "Hidro-Lotus" MMC indiyədək müxtəlif diametrli borularla 22368 metr şəhərdaxili su xətti çəkib.

İşlərin davam etdiyini bildirən RİH başçısı Lütvəli Babayev onu da qeyd etdi ki, Zərdab şəhərinin su təchizatı və kanalizasiya sisteminin yenidən qurulması ilə bağlı su anbarının, magistral su kəmərinin, çirkab sutəmizləyici qurğunun və kanalizasiya kollektorunun inşası üçün torpaqayırma sənədləri və digər sənədlər hazırlanaraq "Azərsu" ASC-yə göndərilib.

Rayonda əvvəlki illərdə Ekologiya və Təbii Sərvətlər Nazirliyi xətti ilə 17 ədəd modul tipli sutəmizləyici qurğu və 194 bulaq tikilib istifadəyə verilib. Növbəti mərhələdə daha 12 kənddə, o cümlədən Qaravəlli, Çallı, Xanməmmədli, Əlibəyli, Hüseynxanlı və digər kəndlərdə belə qurğuların tikilməsi nəzərdə tutulub və müvafiq sənədlər nazirliyə təqdim olunub.

Rayonun Gəlmə, Salahlı, Xanməmmədli və Hüseynxanlı kəndlərində təbii qaz xəttinin çəkilişi başa çatdırılıb və abonentlərə sayğac quraşdırılmasına başlanılıb.

Dəli Quşçu kəndinin və Kür çayının daşması nəticəsində ziyan çəkmiş rayon əhalisi üçün FHN tərəfindən inşa olunmuş 71 yeni yaşayış evinin qazlaşdırılması işləri başa çatıb və evlərə təbii qaz verilib. İl başlayandan rayonun Pərvanlı, Yarməmmədbağı, Lələağacı, Gödəkqobu, Məmmədqasımlı, Dəkkəoba və Dəli Quşçu kəndlərində ümumilikdə 147113 p/m müxtəlif diametrli borularla qaz xətti çəkilib. Dəli Quşçuda 282, Gəlmədə 216 və Dəkkəoba kəndində 151 abonentə fərdi qaz xətti çəkilərək sayğac quraşdırılıb.

Rayonda elektrik verilişi xətlərində istismara yararsız dayaqlar dəyişdirilir və ya bərpa edilir, transformator və yarımstansiyaların işlək vəziyyətdə olması üçün müvafiq təmir işləri görülür.

Digər bölgələrimiz kimi, Zərdabda da abadlıq, tikinti-quruculuq işləri geniş vüsət alıb. Regional Dövlət Proqramına uyğun olaraq rayonun Çallı (360 yerlik), İsaqbağı (220 yerlik) və Aşağı Seyidlər (80 yerlik), kəndlərində yeni və müasir məktəb binaları tikilib. Körpükənd tam orta məktəb binası əsaslı, şəhər 3 nömrəli tam orta məktəbin binası isə cari təmir edilib. Rayon polis şöbəsinin inzibati binasının tikintisi başa çatdırılaraq istifadəyə verilib. Süd məhsulları istehsal edən zavod, "Aqrolizinq" ASC-nin rayon "Aqrotexservis" filialı üçün inzibati bina, taxıl və gübrə anbarları, baytarlıq idarəsinin binası, müxtəlif sahibkarlıq obyektləri də istifadəyə hazırdır.

Rayon mərkəzindəki Heydər parkında abadlıq, təmir işləri görülüb. Azərbaycan, R.Kərimov küçələri abadlaşdırılıb. Su-kanalizasiya xətlərinin çəkilişi ilə əlaqədar Heydər Əliyev prospektinin dağılmış hissələrinə 12 min kvadratmetr asfalt örtük çəkilib.

Digər işlərdən də söz açmaq olar. Ən başlıcası odur ki, dövlət qayğısı sayəsində Zərdab dəyişir, müasirləşir, insanların rifahı daha da yaxşılaşır.

T.NƏZƏRLİ

Azərbaycan. - 2013.- 22 avqust.- S. 6.