«Azərkosmos» yayıma tam hazırdır

"Azərkosmos" ASC Azərbaycanın bütün yerli və regional kanallarının milli peyk üzərindən yayımını təşkil etmək üçün texniki olaraq tam hazırdır.

Hazırda "Azerspace-1" peyki üzərindən AzTV, İTV, CBC, "Xəzər" TV, ANS TV, "Mədəniyyət" TV, "İdman Azərbaycan", "Azad Azərbaycan" TV kanalları yayım həyata keçirir.

"Azərkosmos" ASC digər kanalları da peyk yayımına qəbul etmək üçün tam texniki hazırlığa malikdir. Regional kanalların da "Azerspace-1" üzərindən yayıma qoşulması texniki cəhətdən tam mümkündür və indiyədək bir neçə regional TV kanalı peyk üzərindən yayımlanmaq üçün müraciət edib. "Azərkosmos"a müraciət etmiş kanallara bütün lazımi texniki və kommersiya şərtləri barədə məlumat verilib.

Qeyd edək ki, "Azerspace-1" peyki kommersiya layihəsidir və peykin tutumlarından istifadə üçün istənilən televiziya kanalı peykin operatoru olan "Azərkosmos" ASC-yə rüsum ödəyir. Bu rüsumlar müştərilərlə kommersiya münasibətləri çərçivəsində və bazar konyunkturuna uyğun olaraq tənzimlənir.

Azərbaycan. - 2013.- 22 avqust.- S. 5.