Sumqayıtın baş planı memarlarla birlikdə müzakirə edildi

Sumqayıtda Respublika Memarlar İttifaqının şəhər icra hakimiyyəti ilə birgə şəhərin baş planının müzakirəsi mövzusuna həsr edilən səyyar müşavirə keçirilmişdir.

Tədbirdə çıxış edən Sumqayıt Şəhər İcra Hakimiyyətinin başçısı Eldar Əzizov şəhərdə görülən abadlıq-quruculuq işlərindən, Prezident İlham Əliyevin Sumqayıta və sumqayıtlılara göstərdiyi xüsusi diqqət və qayğıdan danışıb. O bildirib ki, Sumqayıtda həyata keçirilən layihələr şəhərin nəzərəçarpacaq dərəcədə abadlaşmasına, müasirləşməsinə və memarlıq baxımından Bakı standartlarına yaxınlaşmasına səbəb olmuş, sosial-iqtisadi inkişafın yüksəlməsinə təkan vermişdir.

Respublika Memarlar İttifaqının sədri Elbəy Qasımzadə dövlət başçısının ölkəmizdə memarlıq sahəsinə göstərdiyi diqqəti yüksək qiymətləndirmişdir. E.Qasımzadə qeyd etdi ki, Bakı kimi bu gün Sumqayıt da dəyişir, gözəlləşir, yüksək inkişaf tempi nümayiş etdirir.

Müşavirədə Sumqayıt şəhərinin baş planı ilə bağlı məruzə dinlənilmişdir. Məruzədə qeyd edilmişdir ki, Sumqayıtın baş planının müasir memarlığın tələbləri səviyyəsində hazırlanması şəhərin gələcək simasının formalaşmasında, onun sənaye şəhəri kimi özünü təsdiq etməsində, yeni memarlıq inciləri, abidələri, parkları və bağlarının fərqlı memarlıq həlli ilə təqdimatında mühüm rol oynayacaq. Tədbirdə şəhərin baş planının daha geniş tərkibdə, ictimaiyyətin bütün nümayəndələrinin iştirakı ilə birlikdə müzakirə olunacağı barədə məlumat verilmişdir. Müşavirədə çıxış edən şəhər ictimaiyyətinin nümayəndələri və memarlar baş planın belə geniş müzakirəyə çıxarılmasını yüksək qiymətləndirmiş, təkliflərini vermişlər.

Akif ƏLİYEV

Azərbaycan. - 2013.- 23 avqust.- S. 5.