Liviyanın nüfuzlu «Əl-Ğad» qəzetində
«Əlimərdan bəy Topçubaşov
(1862-1934)» sərlövhəli məqalə dərc edilmişdir
Prezident İlham Əliyevin "Əlimərdan bəy
Topçubaşovun 150 illik
yubileyinin keçirilməsi
haqqında" 25 fevral 2013-cü il tarixli sərəncamına
uyğun olaraq Xarici İşlər Nazirliyinin
hazırladığı tədbirlər planına əsasən
Azərbaycanın Liviyadakı səfirliyi bu
ölkənin aparıcı kütləvi informasiya
vasitələrinin
nümayəndələri ilə bir
sıra görüşlər keçirmişdir.
Səfirlikdən
AzərTAc-a bildirmişlər ki,
görüşlərdə Azərbaycan Xalq
Cümhuriyyəti parlamentinin ilk sədri Əlimərdan bəy Topçubaşovun şərəfli həyat yolu və ictimai-siyasi fəaliyyəti
haqqında ətraflı məlumat verilmişdir.
Keçirilən
görüşlərin nəticəsi olaraq
geniş oxucu kütləsinə
malik olan
"Əl-Ğad" qəzetində "Əlimərdan bəy
Topçubaşov (1862-1934)" sərlövhəli
məqalə dərc edilmişdir.
Məqalədə
görkəmli ictimai-siyasi xadimin
keçdiyi həyat yolunda
qarşılaşdığı maneələr və xeyriyyəçilik
fəaliyyəti barədə məlumatlar oxucuların diqqətinə
çatdırılmışdır. Qeyd edilmişdir ki, Əlimərdan
bəy Topçubaşov çar
Rusiyasında müsəlman-türk hərəkatının
liderlərindən və ideoloqlarından biri
olmuşdur. Türk xalqlarının milli
özünüdərkinin təşəkkül tapmasında,
onların birliyinin möhkəmlənməsində
böyük rol oynayan Əlimərdan bəy Topçubaşovun
Azərbaycan dilində dərc edilən "Həyat" qəzetinin
nəşrinə icazə verilməsində böyük
xidməti olmuşdur.
Yazıda
həmçinin həmin dövrdə Əlimərdan bəy Topçubaşovun öz
xalqının maraqlarının fəal müdafiəçisi
olduğu, qarşı tərəfin təcavüzkar
mahiyyətini ifşa etdiyi
bildirilmişdir. Əlimərdan bəy Topçubaşov Azərbaycan Xalq
Cümhuriyyətinin təşəkkül tapması, onun dünya dövlətləri
tərəfindən tanınması və diplomatik
münasibətlərinin qurulmasında da böyük səylər göstərmişdir.
O, müstəqil Azərbaycanın ilk səfiri
olaraq ölkəmizin diplomatik
missiyasına əvvəlcə Gürcüstanda,
daha sonra isə
Türkiyədə rəhbərlik etmiş,
1918-ci ilin dekabrında parlamentin
ilk rəhbəri seçilmişdir.
Azərbaycan. - 2013.- 23 avqust.- S. 8.