4 gündə 7 rayonda 24 sosial obyektin açılışı

Dövlət başçısının bölgələrə səfəri görülən işlərə yeni stimul verir

Avqust ayının üçüncü həftəsi Azərbaycan üçün bir çox beynəlxalq əhəmiyyətli hadisələrlə yanaşı, Prezident İlham Əliyevin ölkənin şimal-qərb bölgəsinə - İsmayıllı, Qəbələ, Oğuz, Şəki, Qax, Zaqatala və Balakən rayonlarına səfərləri ilə də əlamətdar oldu.

Bu gün inamla demək olar ki, Azərbaycanın bölgələri sosial-iqtisadi inkişafın yeni mərhələsini yaşayır. Ölkənin iqtisadi müstəqilliyinin, enerji təhlükəsizliyinin təmin olunması bütün iqtisadi və sosial məsələlərin sürətlə həll edilməsi üçün stimul rolunu oynayır. Son illər aparılan əsaslı iqtisadi islahatlar, yürüdülən liberal sosial siyasət nəticəsində ölkəmizdə iqtisadi inkişaf çox sürətlə gedir. Təsadüfi deyildir ki, son 10 ildə iqtisadi potensial 3 dəfədən çox artıb. Bütün sahələr üzrə islahatların uğurla davam etdirilməsi Azərbaycanın iqtisadi qüdrətinin və potensialının artmasını şərtləndirir. Həm də fərəhli haldır ki, sosial-iqtisadi inkişaf bütün şəhər və bölgələri eyni ahəngdarlıqla əhatə edir. Bu baxımdan Prezident İlham Əliyevin bölgələrə vaxtaşırı səfəri, proqram və layihələrin icra vəziyyəti ilə yerlərdə birbaşa tanış olması, ayrı-ayrı sahələrin inkişafını sürətləndirmək üçün sərəncamlar imzalaması, ən nəhayət, bölgələrdə yaşayan insanlarla görüşləri, onların arzu və təkliflərini üzbəüz dinləməsi, mövcud çətinliklərin aradan qaldırılmasının daha optimal yolları barədə icra strukturlarına yerindəcə tapşırıq və tövsiyələrini verməsi böyük əhəmiyyət kəsb edir.

Ölkəmizin gözəl guşələrindən olan İsmayıllı rayonu da inkişafının yeni mərhələsindədir. Dövlət başçısı şimal-qərb bölgəsinə səfəri çərçivəsində İsmayıllıda olarkən avtovağzalın açılışı, İsmayıllı şəhərinə içməli suyun verilməsi mərasimlərində, tikiş fabrikinin, İvanovka-Hacıhətəmli-Mollaisaqlı avtomobil yolunun açılışlarında və "İsmayıllı-1" Su-Elektrik Stansiyasının işə salınmasında iştirak edib.

Yeni avtovağzalın istifadəyə verilməsi rayon sakinlərinin ölkə paytaxtına və ətraf rayonlara gediş-gəlişini xeyli asanlaşdıracaq. Avtovağzalda yaradılan şərait, rahat və müasir avtobuslar sərnişinlərin ürəyincədir. Əlavə edək ki, avtovağzalda 22 nəfər işlə təmin olunub.

İstifadəyə verilən tikiş fabriki Yaponiya, Çin, Rusiya, Almaniya və Türkiyə istehsalı olan ən müasir avadanlıqlarla təchiz edilib. Tikişçilər üçün hər cür şərait yaradılıb. Belə obyektlərin açılışı bir daha sübut edir ki, ölkədə sahibkarlığın inkişafına hər cür şərait yaradılır. Bəllidir ki, hər fəaliyyətə başlayan müəssisə həm də yeni iş yerlərinin açılması, insanların məşğulluğu, rahat gün-güzəranı, dolanışığı deməkdir.

İsmayıllı şəhərinə içməli suyun verilməsi mərasimində bu cür layihələrdən və digər sosial məsələlərdən söz açan Prezident İlham Əliyev rayonun yeni rəhbərliyinin qarşısında duran vəzifələrə də toxunub: "Biz İsmayıllının müasir şəhərə çevrilməsinə nail olmalıyıq. Burada böyük abadlıq, quruculuq işləri aparılır, yollar genişlənir, gözəl binalar tikilir. Bu hələ görülən işlərin birinci mərhələsidir. Əminəm ki, bu yüksək templər saxlanacaq və yaxın zamanlarda İsmayıllı ölkəmizin qabaqcıl rayonlarından birinə çevriləcəkdir".

Prezident İlham Əliyev son illər bənzərsiz inkişaf dövrünü yaşayan, bir çox mühüm beynəlxalq tədbirlərə uğurla ev sahibliyi etməklə ölkə hüdudlarından kənarda da yaxşı tanınan Qəbələ rayonunda da bir çox açılış mərasimlərində iştirak edib. Dövlət başçısı ilk olaraq rayonun "Aqro Kompleks Qəbələ" MMC-nin Vəndam qəsəbəsində aqrar-sənaye kompleksinin açılış mərasiminə qatılıb.

26 hektar ərazini əhatə edən bu müəssisəyə südlük və ətlik istiqamətli heyvandarlıq kompleksləri, müasir suvarma sisteminin tətbiqinə əsaslanan əkinçilik təsərrüfatı və aqroservis daxildir. Məlumat üçün qeyd edək ki, bu layihənin həyata keçməsi üçün Sahibkarlığa Kömək Milli Fondu tərəfindən 14 milyon manat güzəştli kredit verilib. Bu kompleksdə 200-dən çox işçi daimi işlə təmin olunub.

Qəbələ şəhərində "Qafqaz Karvansaray" hotel kompleksinin açılışı Qəbələnin "hotellər şəhəri" imicini bir az da zənginləşdirib. 120 nəfərin daimi işlə təmin olunacağı "Qafqaz Karvansaray" çox mükəmməl və müasir infrastruktura malik bir kompleksdir. Bu hotelin açılışından sonra Prezident İlham Əliyev möhtəşəm Heydər Əliyev Konqres Mərkəzinin istifadəyə verilməsi mərasimində iştirak etdi. Əlbəttə, paytaxt Bakıdan uzaqda belə bir mərkəzin olması çox əhəmiyyətlidir. Açılışdan bir gün sonra Türkdilli Dövlətlərin Əməkdaşlıq Şurasının III Zirvə toplantısının Qəbələ Heydər Əliyev Konqres Mərkəzində keçirilməsi də əlamətdar hadisədir.

Qəbələ ictimaiyyətinin nümayəndələri ilə görüşündə Prezident İlham Əliyev yeni mərkəzdə istənilən beynəlxalq tədbirin keçirilməsinin mümkünlüyünü qeyd etdi: "Belə möhtəşəm konqres zalları heç də hər bir ölkədə tikilmir. Aeroport, bir neçə beşulduzlu hotel, digər hotellər, turizm mərkəzləri, keçən dəfə mən burada olarkən mədəniyyət mərkəzinin açılması onu göstərir ki, doğrudan da burada çox böyük işlər görülür. Həm dövlət öz vəsaitini ayırır, bütün infrastruktur layihələri dövlət hesabına icra edilir, eyni zamanda, özəl qurumlar həm biznes sahəsinə, həm də ki, sosial obyektlərə investisiya qoyurlar. Bu, çox sevindiricidir".

Bölgəyə səfəri çərçivəsində Azərbaycan Prezidenti yenidən qurulan Qaraməryəm-İsmayıllı-Şəki avtomobil yolunun Qəbələ-Oğuz hissəsinin açılışında da iştirak edib. Magistralın 75-95 kilometrlik bu hissəsində tikinti işləri zamanı 7 dəmir-beton körpü əsaslı təmir edilib.

Qeyd edək ki, ölkədə müasir yol infrastrukturunun yaradılması Azərbaycan dövləti üçün prioritet istiqamətlərdəndir. Bununla əlaqədar Prezident İlham Əliyevin imzaladığı əlavə sərəncamlara əsasən ayrılan vəsait işin əhatəli və keyfiyyətli görülməsinə əhəmiyyətli dərəcədə təsir edir.

Oğuz rayonuna səfər edən dövlət başçısı İlham Əliyev bir çox tədbirlərdə iştirak edib. 7 min 500 kvadratmetrlik üçmərtəbəli Heydər Əliyev Mərkəzinin tikintisi ilə maraqlanan Prezident İlham Əliyevə görülən işlər barədə ətraflı məlumat verilib. Oğuzda ulu öndər Heydər Əliyevin zəngin irsinin təbliğində yeni mərkəzin yaradılması mühüm rol oynayacaq. Gələn ilin sonunda başa çatdırılması nəzərdə tutulan Mərkəzdə 30 nəfərə yaxın daimi işlə təmin olunacaq.

Oğuz şəhərinin sakinlərinin də içməli su həsrətinə son qoyulub. Ərazilərin Bərpası və Yenidən Qurulması üzrə Dövlət Agentliyi layihənin icrasına 2010-cu ilin noyabrında başlayıb. Qeyd edək ki, yeni içməli su təchizatı sistemi Oğuz şəhərindən əlavə, rayonun Bayan, Kərimli, Qumlaq, Şirvanlı, Tayıflı və Xalxalqışlaq kəndlərini də əhatə edəcək. Şəhərin 9 min, kəndlərin isə 11 minə qədər əhalisinin içməli su ilə fasiləsiz təmin olunması nəzərdə tutulub. Tikintisi başa çatan su mənbələrinin potensialı 50 min insanın suya olan tələbatını tam ödəmək gücündədir. Bu isə, mütəxəssislərin bildirdiyinə görə, 2031-ci ildə Oğuz rayonunun əhalisinin içməli su ilə tam təminatı deməkdir.

İçməli su verilişi münasibətilə Oğuz şəhər sakinlərini təbrik edən Prezident İlham Əliyev son illər ərzində Oğuzda əsaslı dəyişikliyin baş verdiyini, rayonun böyük inkişaf yolu keçdiyini, abadlıq-quruculuq işlərinin ardıcıllıqla davam etdiyini, infrastruktur layihələrinin yüksək səviyyədə həll olunduğunu qeyd edib. Yeni sahələrin inkişafı üçün dövlət investisiyalarının qoyulacağını da vurğulayan Prezident İlham Əliyev bölgənin nəinki Azərbaycanın, gələcəkdə həm də dünyanın turizm mərkəzlərindən birinə çevrilməsi üçün bütün ilkin şərtlərin mövcudluğunu bildirib.

Oğuzda 2 nömrəli körpələr evi-uşaq bağçası Prezident İlham Əliyevin iştirakı ilə istifadəyə verilib. Bu müasir bağçanın açılması bir daha Azərbaycanda dövlətin böyüməkdə olan nəslə yüksək dövlət qayğısının əyani nümunəsidir.

Prezident İlham Əliyev bölgəyə səfəri çərçivəsində Şəkidə olarkən Aşağı Küngüt-Aydınbulaq avtomobil yolunun yenidənqurmadan sonra açılışında iştirak edib. Dövlət başçısının ölkənin avtomobil yollarının yenidən qurulması ilə bağlı verdiyi tapşırıqlar əsasında inşa olunan bu yol həm də bir sıra rayonlararası magistral avtomobil yollarını birləşdirdiyinə görə çox əhəmiyyətlidir.

Şəki Dövlət Dram Teatrının binasında aparılan əsaslı təmir və yenidənqurma işlərinin gedişi ilə tanış olan ölkə Prezidenti şəhər ictimaiyyətinin nümayəndələri ilə də görüşüb: "Əvvəlki səfərlərimdə, digər açılışlarda bərabər iştirak etmişik. Keçən dəfə şəhər xəstəxanasının açılışını etdik. Olimpiya Mərkəzi, digər obyektlər, tarixi obyektlər bərpa olunub. Bir daha demək istəyirəm ki, bu teatr da böyük ənənələrə malikdir. Əminəm ki, bu ənənələr burada bundan sonra da yaşayacaqdır".

Onu da qeyd edək ki, uzun illər ərzində əsaslı təmir edilməyən və yararsız vəziyyətə düşmüş "Şəki xanlarının evi" (XVIII əsrin tikilisi) 13 aprel 2006-cı ildə Prezident İlham Əliyevin Şəkiyə səfərindən sonra verdiyi tapşırığa əsasən yenidən qurulub.

Budəfəki səfərində Prezident İlham Əliyev "Şəki xanlarının evi"nin açılışında da iştirak edib. Məlumat verilib ki, bundan sonra bu ev abidə-muzey kimi fəaliyyət göstərəcək və hər bir otaq öz təyinatına uyğun eksponatlarla təmin olunacaq.

Ümumiyyətlə, Prezident İlham Əliyev 4 gün ərzində 7 rayona səfər etmiş və 24 sosial obyektin açılışına qatılmışdır. Bu gün bölgələr sürətlə inkişaf edir və bu inkişafın daha əhatəli olması üçün dövlət öz qayğısını əsirgəmir. Dövlət başçısının bölgələrə səfərləri isə görülən işlərə yeni stimul verir.

Telman NƏZƏRLİ

Azərbaycan. - 2013.- 24 avqust.- S. 1.