İqtisadi inkişaf naziri İsmayıllıda vətəndaşları qəbul etmişdir

İqtisadi inkişaf naziri Şahin Mustafayev avqustun 23-də İsmayıllıda vətəndaşları qəbul etmişdir.

AzərTAc xəbər verir ki, şəhərdəki Heydər Əliyev Mərkəzində keçirilən qəbulda İsmayıllı ilə yanaşı, Ağsu, Şamaxı və Qobustan rayonlarından olan vətəndaşlar da iştirak etmişlər.

Nazirliyin müvafiq struktur rəhbərlərinin də qatıldıqları qəbulda vətəndaşların müraciət, şikayət və təklifləri diqqətlə dinlənilmişdir. Müraciətlər əsasən sahibkarlığa dəstək, güzəştli kreditlərin verilməsi, sahibkarların hüquqlarının müdafiəsi və digər məsələlərlə əlaqədar olmuşdur.

Müraciət və təkliflər dinlənilərək operativ surətdə araşdırılmışdır. Bir sıra müraciətlər yerindəcə həll edilmiş, bəzilərinin həlli ilə əlaqədar nazirliyin müvafiq strukturlarına konkret göstərişlər verilmişdir.

Qəbulda bəzi vətəndaşlar nazirliyin səlahiyyətlərinə aid olmayan məsələlər də qaldırmışlar. Bu cür müraciətlər aidiyyəti qurumlara çatdırılmaq üçün qeydiyyata alınaraq nəzarətə götürülmüşdür.

Vətəndaşlar yaradılmış şəraitdən razılıqlarını bildirmiş, əhalinin mövcud problemlərinin operativ həllinə xidmət edən bu cür qəbulların təşkili ilə bağlı verdiyi tapşırığa görə Prezident İlham Əliyevə minnətdarlıqlarını bildirmişlər.

Azərbaycan. - 2013.- 24 avqust.- S. 3.