Naxçıvanda yeni taxıl anbarları istifadəyə verilib

"Naxçıvan Taxıl Məmulatları Sənaye Kompleksi" MMC-nin yeni taxıl anbarları istifadəyə verilib. Naxçıvan MR Ali Məclisinin Sədri Vasif Talıbov açılış mərasimində iştirak edib.

Tədbirdə çıxış edən V.Talıbov bildirib ki, 9 min ton taxılı uzun müddət saxlamağa imkan verən yeni anbarların tikilməsi və toxumçuluq təsərrüfatının yaradılması müəssisəni tam sənaye kompleksinə çevirmişdir. Hazırda komleksdə 27 min ton taxılı uzunmüddətə saxlamağa imkan verən taxıl ehtiyatı anbarları, illik istehsal gücü 73 min ton olan un dəyirmanı, laboratoriya, quşçuluq və heyvandarlıq təsərrüfatlarının inkişafında mühüm rol oynayan qüvvəli yem istehsalı müəssisəsi fəaliyyət göstərir. Həmçinin ərazidə istehsal olunmuş məhsulları saxlamaq üçün anbarlar vardır. Yeni anbarların qurulması və toxumçuluq təsərrüfatının yaradılması sənaye müəssisəsinin fəaliyyətini daha da genişləndirəcək.

Kompleksin nəzdində yeni toxumçuluq təsərrüfatının yaradılması muxtar respublikada keyfiyyətli taxıl toxumuna olan tələbatın ödənilməsində mühüm əhəmiyyətə malik olacaq. Təsərrüfatda məhsuldar toxumların seçilməsi, dərmanlanması üçün lazımi şərait yaradılıb. Bu da taxılçılıqla məşğul olan sahibkarların və torpaq mülkiyyətçilərinin keyfiyyətli və məhsuldar toxum sortları ilə təmin olunmasına imkan verəcək. Hazırda payızlıq taxıl əkini üçün muxtar respublikanın toxumçuluq təsərrüfatlarında 1000 tona yaxın toxum ehtiyatı var. Bunun da 250 tonu "Naxçıvan Taxıl Məmulatları Sənaye Kompleksi" MMC-nin toxumçuluq təsərrüfatında saxlanılır. Müəssisə üçün 500 hektar əkin sahəsi də ayrılıb.

Bu il kompleksin Taxıl Ehtiyatı Anbarında 3 yeni bunker quraşdırılıb. Yaradılan şərait anbarlara saatda 150 ton taxıl qəbul etməyə, 1125 ton taxılı isə buraxmağa imkan verir. Daxil olan taxıl xüsusiyyətinə və növünə görə ayrılır və elevatorlar vasitəsilə bunkerlərə ötürülür. Burada taxılın saxlanılması üçün bütün lazımi şərait yaradılıb. Anbarda elektron tərəzi və qaldırıcı lift qoyulub. Ərazidə yanğın təhlükəsizliyi də nəzərə alınmış, əlavə 100 ton tutuma malik olan yeni su hovuzu tikilib.

Ekoloji və gigiyenik normalara cavab verən müəssisədə taxılın qəbulu, çeşidlənməsi və təmizlənməsi, o cümlədən un istehsalı tam avtomatlaşdırılmış şəkildə həyata keçirilir. Yaradılan şərait muxtar respublikada istehsal olunan taxılın uzun müddət saxlanmasına, eləcə də il boyu əhalinin keyfiyyətli un məhsulları ilə təmin olunmasına imkan verəcək.

Taxıl anbarlarının istifadəyə verilməsindən sonra toxumçuluq təsərrüfatlarında yetişdirilən buğda sortlarına baxış olub. Naxçıvan MR-nın kənd təsərrüfatı naziri Elşad Əliyev bildirib ki, muxtar respublikada ərzaq təhlükəsizliyinin təmin olunmasında taxıl istehsalının artırılması mühüm yer tutur. Taxılçılıqda məhsuldarlığa təsir edən güclü amillərdən biri məhsuldar toxum sortlarının yaradılmasıdır. Bu istiqamətdə muxtar respublikada mühüm tədbirlər həyata keçirilir, yeni toxumçuluq təsərrüfatları yaradılır, onlar müasir kənd təsərrüfatı texnikaları ilə təmin olunur.

Həyata keçirilən aqrar siyasətin, göstərilən dövlət qayğısının nəticəsində muxtar respublikada taxılçılığın inkişafı üçün hərtərəfli şəraitin yaradıldığını bildirən Ali Məclisin Sədri Vasif Talıbov vurğulayıb ki, Naxçıvan MR-də torpaqların özəlləşdirilməsi, taxıl əkini üçün güzəştlərin tətbiqi əkin sahələrinin genişləndirilməsinə, məhsul istehsalının artırılmasına səbəb olub. Eyni zamanda, torpaq mülkiyyətçilərinin lazımi kənd təsərrüfatı texnikaları və gübrələrlə təmin olunması bu sahəyə olan marağı artırıb. Mütərəqqi əkin üsullarının tətbiqi, göstərilən düzgün aqrotexniki qulluq bol məhsul istehsalında əsas şərtdir. Ona görə də keyfiyyətli və bol məhsul istehsalına əkin sahələrinin genişləndirilməsi hesabına deyil, məhsuldarlığın artırılması yolu ilə nail olmaq lazımdır. Bunun üçün muxtar respublikada hərtərəfli şərait vardır. Hazırda muxtar respublikada 9 toxumçuluq təsərrüfatı fəaliyyət göstərir.

Naxçıvan MR-də torpaq mülkiyyətçiləri yerli iqlimə uyğunlaşdırılmış məhsuldar toxum sortları ilə təmin edilməli, suvarma suyu və kənd təsərrüfatı texnikaları ilə təminat bundan sonra da diqqət mərkəzində saxlanılmalıdır.

Məlumat verilmişdir ki, bu ilin payızında muxtar respublikanın taxıl əkini sahələrində "Bezostaya -1", "Qobustan", "Qiymətli 217", "Əzəmətli 95", "Dağ-daş", "Ceyhan-99", "Moskviç", "Guadilop" buğda sortlarının əkilməsi nəzərdə tutulub. Bu toxum sortlarının əkin dövriyyəsinə daxil edilməsi orta məhsuldarlığın artmasına səbəb olmuşdur. Hazırda muxtar respublikada kifayət qədər toxumluq buğda ehtiyatı yaradılıb.

Həmçinin əkin sahələrində aqrotexniki tədbirlərin görülməsi də diqqət mərkəzində saxlanılır. Belə ki, taxıl sahələrində alaq otlarına və gəmiricilərə qarşı mübarizə məqsədilə lazımi qədər herbisid və sink-fosfid preparatı tədarük olunub. Eyni zamanda, kənd təsərrüfatı ilə məşğul olan sahibkarların və torpaq mülkiyyətçilərinin maarifləndirilməsi, məlumat kitabçalarının paylanması və təcrübə mübadiləsinin aparılması da diqqət mərkəzində saxlanılır.

Elxan MƏMMƏDOV

Azərbaycan. - 2013.- 25 avqust.- S. 4.