Uğurlarımızın təminatı

Hər bir xalqın zəngin mənəvi-intellektual potensialının, milli məfkurə və özünüdərk hissinin konkret zamanda parlaq şəkildə üzə çıxması, minilliklər boyu zənginləşən dövlətçilik ənənələrinin vahid sistem halına gəlməsi uzunmüddətli təkamül prosesinin məntiqi nəticəsi kimi nəzərdən keçirilir. Bu mənada, xalqların azadlıq istəyi, müstəqil yaşam uğrundakı mübarizəsi onların millət kimi formalaşıb vahid dövlətdə birləşməsi bütün zamanların ən vacib şərtlərindən biri olmuşdur.

Müstəqilliyimizin ilk illərindəki hərc-mərclik və xalqımızın maraqlarına zidd siyasət, iqtisadiyyatın zəifləməsi və milli sərvətlərin talan edilməsi dərin siyasi-iqtisadi böhran ilə nəticələndi. 1993-cü ilin iyun ayında xalqın tələbi və təkidi ilə ümummilli lider Heydər Əliyevin Azərbaycanda yenidən siyasi hakimiyyətinə qayıdışı - BÖYÜK QURTULUŞ - ölkəmiz üçün yeni səhifə açdı. Bu tarixdən etibarən, ölkədə formalaşmağa başlayan yeni siyasi kurs vətəndaş müharibəsi təhküləsini aradan qaldırdı, separatçılıq meyillərinə son qoydu və Heydər Əliyevin dövlət quruculuğu siyasətinin gerçəkləşməsinə gətirib çıxardı.

Uğurlu siyasətin nəticələri

Həyata keçirilən islahatlar 2003-cü ildən başlayaraq daha da intensivləşdirildi, Azərbaycanın uzunmüddətli sabitliyini, dünya dövlətləri içərisində yüksək nüfuz sahibi və etibarlı tərəfdaş olmasını, vətəndaş həmrəyliyini və həyat səviyyələrinin yaxşılaşmasını, sosial infrastrukturun inkişafını, yoxsulluğun azaldılmasını, işsizliyin minimuma endirilməsini və s. təmin etdi. Beləliklə, inkişafın Azərbaycan modelinin əsası qoyuldu.

Keçid dövrünü başa vuran respublikamız bu gün özünün uzunmüddətli inkişaf strategiyasının istiqamətlərini müəyyən edən bir ölkədir. Azərbaycan dünya miqyasında iqtisadi artım sürətinə görə ön sıralarda gedərək islahatçı ölkə kimi tanınır. Artıq on ildir ki, müxtəlif sahələrdə həyata keçirilən siyasət, uğurla tamamlanan islahatlar, genişmiqyaslı layihələr milli iqtisadiyyatın güclənməsinə və tam formalaşmasına gətirib çıxarıb.

Avropanın enerji təhlükəsizliyində mühüm aktor olan Azərbaycan bu sahədə mühüm nailiyyətlərə imza atmışdır. Bir zamanlar bəzilərinin pessimist yanaşdığı "Əsrin müqaviləsi" böyük uğurlar vermişdir. Belə ki, ötən illərdə Baki-Tbilisi-Ceyhan neft və Bakı-Tbilisi-Ərzurum qaz kəmərləri işə salınaraq neftimizin və təbii qazımızın Avropa bazarlarına çıxarılması təmin olunmuşdur. Bu sahədə digər mühüm uğur isə uzun illər Şimal qonşumuz Rusiyadan qaz alışı dayandırılmış, Azərbaycan qazının bu ölkəyə ixracı başlamışdır.

Azərbaycan öz vətəndaşının hüquqlarını nəinki milli sərhədlər daxilində, həmçinin beynəlxalq arenada da müdafiə edir, dəstəkləyir. Məhz həyata keçirilən islahat nəticəsində əhalinin keçmiş sovet əmanətləri geri qaytarılmağa başlanmışdır. Bundan əlavə, ilk dəfə ipoteka kreditlərinin verilməsi şəxsi mənzil arzusunda olanları sevindirmiş, sabaha olan ümidini artırmışdır. Əlillərə dövlət qayğısının güclənməsi, Qarabağ müharibəsi veteranlarına, şəhid ailələrinə heç bir maddi qarşılıq olmadan mənzillərin, həmçinin minik avtomobillərinin verilməsi bu istiqamətdə mühüm addım hesab olunur. Beləliklə, həyata keçirilən kompleks tədbirlər nəticəsində sadə Azərbaycan vətəndaşının Prezidentə olan inamı özünü doğrultmuş, gələcək uğurlara körpü olmuşdur.

Hücumçu və müstəqil xarici siyasi xətt

Bəşəriyyətin ən yeni tarixinin əsas əlamətlərindən biri dünyanın demək olar ki, bütün qitələrində böyük dövlət qruplarının qlobal siyasi modernləşmə prosesinə daxil olması, buradakı hakimiyyətlərin qlobal miqyas alan demokratik idarəetmə yolunu tutması ilə bağlıdır. Şərqlə Qərbin arasında körpü olan Azərbaycan həm sivilizasiyaların qovşağı, həm də mühüm geosiyasi və geoiqtisadi amildir. Bütün bunlar istər regionda, istərsə də onun hüdudlarından kənarda Azərbaycana olan münasibəti müəyyələşdirir. Əgər müstəqillik illərinin başlanğıcında ölkəmiz xarici güc mərkəzlərinin strateji səciyyəli həmlələri ilə üzləşirdisə, müasir Azərbaycan nəinki bu həmlələri asanlıqla dəf edir, böyük diqqət və siyasi manevrlərlə lazımi məqamda hücumçu diplomatiya siyasətini həyata keçirir.

Əlbəttə, bütün bunlar 1993-cü ilin ikinci yarısından başlayaraq və 2003-cü ildən yeni forma və mahiyyət qazanaraq həyata keçirilən düşünülmüş siyasətin məntiqi davamıdır. Son on ildə xarici siyasətdə əldə etdiyimiz uğurlar Azərbaycanın beynəlxalq arenada güclü tərəfdaş kimi tanınmasına səbəb olmuşdur.

Bu gün respublikamız Avropa Şurası, Avropa Parlamenti, Avropa Təhlükəsizlik və Əməkdaşlıq Təşkilatı, Birləşmiş Millətlər Təşkilatı, Müstəqil Millətlər Birliyi və s. kimi nüfuzlu beynəlxalq təşkilatların fəal üzvü, mühüm əməkdaşıdır. Belə ki, Azərbaycanın BMT məkanında nüfuzunun artması, bu qurumda rolunun güclənməsi özünün bir daha 2011-ci il oktyabr ayının 24-də Təhlükəsizlik Şurasının qeyri-daimi üzvü seçilməsi ilə göstərilmişdir.

Beləliklə, 2003-2013-cü illər ərzində xarici siyasət sahəsindəki uğurlarımızı gözdən keçirsək, qürurla deyə bilərik ki, ölkəmiz regionun lideri, həm də dünya hegemonlarının əməkdaşlıq etməkdə maraq göstərdiyi bir dövlətdir.

Güclü ordu müstəqilliyin əsas şərtlərindəndir

Azərbaycanda ordu quruculuğu prosesi böyük uğurla gedir. Silahlı Qüvvələrimizin peşəkar hazırlıq səviyyəsi, maddi-texniki bazası və döyüş qabiliyyəti möhkəmləndirilir. Ordu quruculuğunda həyata keçirilən islahatlara nəzər salsaq görərik ki, son 10 ildə hərbi xərclər 23 dəfə artırılmış, Hərbi Hava Qüvvələrini gücləndirməklə təcavüzkar Ermənistan üzərində əzici üstünlük əldə edilmiş, Xəzərdə ikinci ən böyük donanma formalaşdırılmış, yeni adda və növdə silah istehsal etməklə ölkəmiz beynəlxalq hərbi sərgilərdə Azərbaycan modeli ilə təmsil olunmuşdur. Azərbaycanda yerli hərbi istehsal inkişaf etmiş, çoxlu hərbi zavodlar istifadəyə verilmişdir. Bu zavodlarda 750 adda məhsul istehsal edilir. Azərbaycan bütün növ patronları istehsal edir. Tapançalar, avtomatlar, pulemyotlar, qumbaraatanlar, minaatanlar, aviasiya bombaları, zirehli maşınlar, snayper tüfəngləri, pilotsuz təyyarələr - bütün bunlar ölkəmizdə istehsal olunur.

Ölkəmiz son illər ərzində hərbi məqsədlər üçün çox böyük vəsait xərcləmişdir. Müqayisə üçün deyə bilərik ki, 2003-cü ildə bizim hərbi büdcəmiz 163 milyon dollar idi, 2012-ci ildə bu rəqəm 3,6 milyarda, bu il isə 3,7 milyard dollara çatmışdır. Yəni, bu, özlüyündə onu göstərir ki, ordu quruculuğu prioritet məsələdir. Göstərilən rəqəmlər deməyə əsas verir ki, bu gün ölkə büdcəsindən, sadəcə, hərbi sənayenin inkişafı üçün ayrılan vəsait qorxan Ermənistanın ümumi dövlət büdcəsindən təxminən iki dəfə çoxdur.

Ordu quruculuğu elə bir spesifik sahədir ki, burada iş yalnız iqtisadi imkanlardan kifayət qədər bəhrələnməklə bitmir. Azərbaycan öz ordusunun gücünü, kardların hərbi peşəkarlığını artırır, hərbi qüdrətini daim yüksəldir. NATO ilə sıx və səmərəli əməkdaşlığın əsas hədəfi də, məhz ordu quruculuğu prosesini sürətlə təkmilləşdirmək, Silahlı Qüvvələri modernləşdirmək, müasir standartlara uyğunlaşdırmaqdır. Əsas məqsəd, başlıca niyyət isə, heç şübhəsiz, Azərbaycan ərazi bütövlüyünü bərpa etmək, təcavüzkar erməni daşnaklarını ölkə ərazisindən çıxarmaqdır.

Azərbaycan çoxsaylı uğurlara Ermənistan-Azərbaycan, Dağlıq Qarabağ münaqişəsi şəraitində nail olmuşdur. Beynəlxalq münasibətlər sisteminin aktoru kimi çıxış edən imperialist güclərin geostrateji planları və bu planların fonunda Ermənistanın məkrli siyasəti nəticəsində yaranmış Dağlıq Qarabağ münaqişəsinin beynəlxalq hüquq normaları çərçivəsində həlli dövlətimizin əsas vəzifələrindən biridir. Danışıqlar prosesində rəsmi Bakının birmənalı tələbi işğal olunmuş torpaqların beynəlxalq hüquq normaları çərçivəsində azad olunması və ərazi bütövlüyümüzün bərpa edilməsindən ibarətdir. Bu, Azərbaycanın qəti və dəyişməz mövqeyidir.

Həyata keçirilən rasional və praqmatik siyasət bu münaqişə ilə bağlı dünya dövlətlərinin Azərbaycanın ərazi bütövlüyünün təmin olunması istiqamətində bəyanatlarla çıxış etməsinə səbəb olmuşdur. Bütün bunların fonunda isə Dağlıq Qarabağ münaqişəsinin beynəlxalq hüquq normalarına əsasən - Azərbaycanın ərazi bütövlüyü çərçivəsində həll ediləcəyinə optimist və real fikirlər səsləndirilir.

Gənclər siyasəti real bəhrələrini verir

Gənclik körpüdür. Dünəndən bu günə, bu gündən isə sabaha olan körpü. Dövlət başçısı gənclərlə bağlı siyasətində çoxsaylı yeniliklərin olduğunu açıqlayaraq gəncliyin qarşısında üç mühüm vəzifənin durduğunu qeyd etmişdir: "Peşəkarlığı və intellektual səviyyəni artırmaq, torpağa, yurda bağlılıq və ən nəhayət, yüksək, insani keyfiyyətlərin formalaşdırılması".

Azərbaycan cəmiyyətinin avanqard gücünü özündə ehtiva edən Yeni Azərbaycan Partiyası dövlət gənclər siyasətinin uğurla həyata keçirilməsində birbaşa iştirak edir. Yeni Azərbaycan Partiyası Gənclər Birliyinin ətrafında birləşən 200 mindən çox gənclər ordusu bu gün gənc nəslin düzgün tərbiyələnməsində və sabaha daha inamlı addımlarla irəliləməsində müstəsna rola malikdir. YAP Gənclər Birliyinin mütəmadi olaraq həyata keçirdiyi "dəyirmi masa"lar, mühazirələr, seminarlar, kreativ layihələr partiyaya gənclərin axınını sürətləndirib.

Azərbaycan gənclərinin beynəlxalq tribunalarda çıxışları, ölkəmizi, sadəcə, milli sərhədlər çərçivəsində deyil, xarici ölkələrdə layiqincə təmsil etmələri, əlbəttə, ölkə rəhbərliyinin həyata keçirdiyi məqsədyönlü siyasətin nəticəsidir. Sevindirici haldır ki, 22 illik müstəqillik tariximizdə ictimai fəal gənclərin 200-dən artıq QHT-də birləşməsi, Azərbaycan gənclər təşkilatlarının 30-dan artıq beynəlxalq gənclər qurumlarında təmsil olunması ölkə gəncliyinin aktivliyindən, kreativliyindən və hərtərəfli hazırlığından xəbər verir. Ölkənin ictimai həyatında gəncləri aparıcı qüvvəyə çevirmək və onların sosial-iqtisadi problemlərinin həllini təmin etmək məqsədilə dövlət başçısı 2005-2009 və 2010-2015-ci illəri əhatə edən "Azərbaycan gəncliyi" dövlət proqramlarını təsdiq edib. Dövlət quruculuğunda gənclərin iştirakına şərait yaradılması, gənc ailələrə kömək göstərilməsi, güzəştli ipoteka kreditlərinin verilməsi, qaçqın və məcburi köçkün ailələrindən olan yeniyetmə və gənclərin hüquqlarının qorunması, sosial problemlərin həlli, gənclərin vətənpərvərlik tərbiyəsi dövlət proqramının əsasını təşkil edir. "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" da Azərbaycan gənclərinin intellektual səviyyəsinin artırılmasına, elmi biliklərə dərindən yiyələnmələrinə, dünyanın qabaqcıl ölkələrinin təcrübəsini öyrənib ölkəmizdə tətbiqinə, eyni zamanda, yeni texnologiyaların mənimsənilməsinə, bir sözlə, "neft kapitalını insan kapitalına çevirməyə" xidmət edir.

Gənclərə dəstək yönündə verilən mühüm və əlamətdar qərarlardan biri də ölkədə ilk dəfə "Gənclər üçün Prezident Mükafatı"nın təsis edilməsi oldu. Prezidentin bu qərarı "Azərbaycan gəncliyi 2011-2015-ci illərdə" Dövlət Proqramı çərçivəsində 2013-cü ilin iyulunda verildi. Mükafatın təsis edilməsi gənclərin elm, mədəniyyət, ədəbiyyat və incəsənət, təhsil və ictimai fəaliyyət sahələrində nailiyyətlərini təşviq etmək məqsədi daşıyır.

Beləliklə, son on il ərzində ölkə gənclərinə dəstək istiqamətində bir sıra dövlət proqramları qəbul edilmiş, gənclərə dəstək fondu yaradılmış, dövlət qulluğunda gənclərə xüsusi üstünlük verilmiş, gənclər təşkilatlarına dəstək artırılmış və s.

Hədəf - 2020

XXI əsrin ilk onilliyində sürətlə inkişaf edən və yayılan informasiya və kommunikasiya texnologiyaları, bununla bağlı yeni vüsət almış qloballaşma prosesləri ölkələrin sosial-iqtisadi həyatına ciddi şəkildə təsir etməkdədir. Bu mənada, Azərbaycan da istisna deyildir. Dövlət başçısı cənab İlham Əliyevin 2012-ci ilin dekabr ayında imzaladığı "Azərbaycan 2020: gələcəyə baxış" İnkişaf Konsepsiyasının təsdiqlənməsinə dair sərəncamla Azərbaycanın növbəti ildə inkişafının əsas istiqamətləri və qarşıya qoyulan hədəfləri müəyyənləşdirildi. Bu sənəd ölkənin inkişafının yeni mərhələsini başladır, əsas məqsəd isə bütün göstəricilər üzrə dünyanın ən inkişaf etmiş ölkələrinin sırasına daxil olmaqdır. Bu konsepsiyanın yerinə yetirilməsi nəticəsində ölkəmiz 2020-ci ildə iqtisadi və siyasi cəhətdən inkişaf etmiş, rəqabətqabiliyyətli ölkə olacaq. Bəs bu hədəflər hansılardır?

- Yeni iqtisadi model formalaşdırmaq;

- Elmi potensial və innovativ fəaliyyəti, qeyri-neft sektorunu, informasiya-kommunikasiya texnologiyaları inkişaf etdirmək;

- Əhalinin, habelə məcburi köçkünlərin rifah halını daha da yaxşılaşdırmaq;

- Nəqliyyat, tranzit və logistika infrastrukturunu, sosial müdafiə sistemini təkmilləşdirmək;

- Təhsil islahatları, qanunvericilik və struktur, səhiyyə islahatlarını davam etdirmək;

- Gənclərin potensialını və idmanın inkişafını gücləndirmək;

- Söz və mətbuat azadlığını qorumaq və vətəndaş cəmiyyətini dərinləşdirmək;

- Mədəni irsin qorunmasını diqqət mərkəzində saxlamaq və s.

Beləliklə, "Azərbaycan-2020: gələcəyə baxış" İnkişaf Konsepsiyası həm də qarşıdakı illərdə hakimiyyətin görəcəyi işləri, aparacağı islahatları və qarşıya qoyulan hədəfləri əks etdirən sənəddir. Bütün qeyd olunanlara əsaslanaraq demək olar ki, qarşıdakı illərdə əldə ediləcək uğurlar miqyasına görə daha geniş, daha yaddaqalan olacaq!

Aytac ƏLİYEVA,

Yeni Azərbaycan Partiyası Gənclər Birliyinin sədr müavini

Azərbaycan. - 2013.- 27 avqust.- S. 6.