Məktəb zamanı gəlir

Tikinti-quruculuq işləri genişləndikcə Qobustan daha müasir görkəm alır. Alternativ enerji qurğuları, idman kompleksi, yeni inzibati binalar, abadlaşdırılmış prospekt və küçələr, Heydər Əliyev parkı, yeni məktəb binaları, geniş yaşıllaşdırma işləri Qobustanın müasir bölgələr sırasında inamla yer tutduğunu xarakterizə edir.

Rayonda təhsilin maddi-texniki bazasının yaxşılaşdırılması istiqamətində də müəyyən işlər görülür. Qeyd edək ki, Qobustanda 18 tam, 10 ümumi və 2 ibtidai məktəb fəaliyyət göstərir. Ümumilikdə 4962 şagirdə (2012-2013-cü tədris ilində) 609 müəllim dərs deyir.

Məlum olduğu kimi, son illər dövlət tərəfindən təhsilin müxtəlif pillə və sahələrinin inkişafı üçün 15-dən çox proqram işlənib həyata keçirilir. Bu islahatlar, şübhəsiz, Qobustan təhsilinə də təsirsiz ötüşmür. Xüsusi istedada malik uşaqların yaradıcılıq potensialının inkişaf etdirilməsi üzrə Dövlət Proqramına uyğun olaraq rayonun ümumtəhsil məktəbləri şagirdlərinin bilik və bacarıqlarının qiymətləndirilməsi nəticəsində müxtəlif sahələr üzrə 18 istedadlı şagird aşkar olunub və bu şagirdlər haqqında müvafiq məlumatlar Təhsil Nazirliyinə göndərilib.

Qobustanda da bildirdilər ki, müəllimlərin işə qəbulunda tətbiq olunan yeni qaydalar şəffaflığı təmin etməklə yanaşı, biliyi və peşəkarlığı daha yüksək olan kadrların seçilməsini də şərtləndirir. Bu baxımdan ixtisaslı müəllimlərə olan tələbata uyğun işəgötürülmə, vakant yerlərin şəffaf şəkildə müəyyənləşdirilməsi çox təqdirəlayiqdir. Qobustanın ümumtəhsil məktəblərində 38 müəllim işə qəbul edilib və 18 müəllimlə ehtiyac olan ixtisaslar üçün birillik əmək müqaviləsi bağlanıb.

Bu il rayonun tam orta təhsil müəssisələrini bitirən 149 məzun tələbə olmaq üçün müxtəlif ali təhsil ocaqlarına sənəd verib. Təqdirəlayiq haldır ki, 10 məzun hərbi təhsil almaq arzusuna düşüb.

Təhsil ocaqlarının tikinti-təmir işləri ilə də maraqlandıq. Rayon təhsil şöbəsinin müdir əvəzi İlqar Alcanov bildirdi ki, mövcud məktəblərin 53 faizi yeni binalarda fəaliyyət göstərir. Heydər Əliyev Fondunun xətti ilə rayonun Bədəlli və Çalov məktəbləri, regional Dövlət Proqramına uyğun olaraq rayon təhsil şöbəsi (2010), Poladlı, Nardaran, Nabur, şəhər 2 nömrəli, Hilmilli, Təklə, Cəngi, Göydərə, Cəmcəmli və Cəyirli məktəbləri üçün yeni və müasir binalar inşa olunub. Bütün məktəblər lazımi avadanlıqla təmin edilib. Məktəb kitabxanalarında zəngin dərslik fondu yaradılıb. Heydər Əliyev Fondunun xətti ilə təhsil ocaqlarına, həmçinin 140 adda didaktik plakat, 19 adda isə xəritə verilib. Ümumtəhsil məktəbləri həm də İKT ilə təchiz olunub.

Bunlarla bərabər, Qobustanın Bəklə, Yekəxana, Təklə Mirzəbaba, Təsi, Şıxzərli, Sündü, Ərəbşahverdi məktəblərinin əsaslı təmirə, yeni bina tikilməsinə ehtiyac var. Bədəlli, Nabur, şəhər 1 nömrəli tam orta məktəblərin qızdırıcı sistemləri də təmir edilməlidir. Qeyd edək ki, ayrı-ayrı ixtisas fənləri üçün müəllimə ehtiyacı olan məktəblər də az deyil. Sündü, Cəmcəmli, Ərəbşahverdi, Ərəbqədim, Cəyirli (əsas), Göydərə və digər məktəblər kimya, riyaziyyat, fizika, coğrafiya, musiqi fənləri üzrə ixtisaslı müəllimlərin yolunu gözləyir. İ.Alcanov onu da bildirdi ki, bütün boş yerlər Təhsil Nazirliyinin vakant siyahısına daxil edilib. Söhbət etdiyimiz müəllimlər müvafiq bir tam orta məktəbdə lisey sinfinin açılması, yerli tələbat nəzərə alınmaqla rayonda peşə məktəbinin açılması zərurətini də söylədilər.

Qayğılar nə qədər çox olsa da yeni dərs ilinin yaxınlaşması istər müəllimdə, istərsə də şagirddə xoş ovqat yaradır. Təhsil ocaqları yenə qapılarını şagirdlərin üzünə açacaq. Yenə səsli-küylü, hər günü əziz məktəb həyatı başlanacaq. Onu da qeyd edək ki, Qobustanın Çuxanlı (tam) və Cəyirli (əsas) məktəblərinin yeni inşa edilmiş binalarında dərslərin başlandığını bildirən zənglər ilk dəfə çalınacaq.

Telman NƏZƏRLİ

Azərbaycan. - 2013.- 27 avqust.- S. 7.