Təhsilə göstərilən diqqət və qayğı müsbət nəticələrini verir

Müstəqillik illərində təhsilə dövlət tərəfindən göstərilən diqqət və qayğı göz qabağındadaır. Respublikada 2 mindən çox müasir tipli yeni məktəb tikilmiş, köhnə binalar təmir edilmiş, əlavə sinif otaqları inşa olunmuşdur. Məktəblərin maddi-texniki bazası möhkəmləndirilmiş, ixtisaslı kadrlarla təmin edilmişdır. Bütün bunlar isə təlim-tərbiyə işində öz müsbət həllini tapmaqdadır. Bunu Salyan rayonunun timsalında aydın görmək olar. Son on ildə rayonda 17 yeni məktəb inşa edilmiş, 15 məktəbdə əsaslı təmir işləri aparılmışdır. Peyk və Pambıqkənd kənd məktəbləri isə Heydər Əliyev Fondunun vəsaiti ilə tikilmişdir. 2012-2013-cü tədris ilində 480 yerlik Qarabağlı, 360 yerlik Yolüstü, 220 yerlik Boranıkənd, 80 yerlik Quyçu kənd məktəbləri şagird və müəllimlərin istifadəsinə verilmişdir.

Hazırda Salyan şəhərinin Plastmas yaşayış sahəsində 640 yerlik yeni məktəb binasında son tamamlama işləri görülür. Yeni məktəb yeni dərs ilində öz qapılarını şagirdlərin üzünə açacaqdır. Şəhərin ucqar hissəsində yerləşən sahənin uşaqları oxumaq üçün xeyli kənarda yerləşən məktəblərə getməli olurdular. Bu, onlar üçün müəyyən problemlər yaradırdı. Yeni məktəbin istifadəyə verilməsi uşaqları, onların valideynlərini əzab-əziyyətdən xilas edəcəkdir. Salyan şəhər 8 saylı, Qaraçala qəsəbə və Dayıkənd kənd məktəblərinin şagirdləri də təmir edilmiş tədris müəssisəsində yeni dərs ilinə başlayacaqlar.

Hazırda Salyan rayonunda 54 məktəb vardır. Həmin məktəblərdə 1168 nəfər müəllim şagirdlərin təlim və tərbiyəsi ilə məşğul olur. Rayon üzrə keçən il 313 məzun ali məktəblərə qəbul olunub. Onlardan 43 nəfəri 500, 11 nəfəri isə 600-dən çox bal toplayıb. Ən çox bal toplayan 2 nəfər isə Prezident təqaüdünə layiq görülüb.

Bu ilin nəticələri də sevindiricidir. Tələbə Qəbulu üzrə Dövlət Komissiyasının keçirdiyi test imtahanlarında rayonun tam orta məktəblərini bitirən məzunlardan 18 nəfəri 600-dən çox bal toplamışdır ki, bu da keçənilkindən 7 nəfər çoxdur.

Seyran CAVADOV

Azərbaycan. - 2013.- 27 avqust.- S. 7.