Azərbaycanın və Qazaxıstanın Fövqəladə Hallar nazirlikləri arasında əməkdaşlığın perspektivləri müzakirə edilmişdir

Azərbaycanın fövqəladə hallar naziri, general-polkovnik Kəmaləddin Heydərov Qazaxıstanın ölkəmizdə yeni təyin olunmuş səfiri Amangeldi Jumabayev ilə görüşmüşdür.

Fövqəladə Hallar Nazirliyindən AzərTAc-a bildirmişlər ki, nazir Amangeldi Jumabayevi Azərbaycanda diplomatik fəaliyyətə başlanması münasibətilə təbrik etmiş və ona gələcək fəaliyyətində uğurlar arzulamışdır.

Görüşdə nazir səfirə respublikada fövqəladə halların qarşısının alınması və nəticələrinin aradan qaldırılması sahəsində görülən işlər, nazirliyin strukturuna daxil olan qurumların fəaliyyəti barədə ətraflı məlumat vermişdir.

K.Heydərov həmçinin ölkələrimizin Fövqəladə Hallar nazirlikləri arasında mövcud əməkdaşlıq əlaqələrindən razılığını ifadə etmişdir. Səfir də öz növbəsində görüşə görə təşəkkürünü bildirmiş və gələcəkdə ölkələrimizin müvafiq qurumları arasında əməkdaşlığın daha da dərinləşməsi üçün birgə səylərin davam etdiriləcəyinə əminliyini bildirmişdir.

Azərbaycan. - 2013.- 27 avqust.- S. 7.