Azərbaycan ilə Yunanıstan arasında müxtəlif sahələrdə əməkdaşlıq inkişaf edir

Avqustun 27-də Azərbaycanın xarici işlər naziri Elmar Məmmədyarov Yunanıstanın ölkəmizə yeni təyin olunmuş səfiri Dimitrios Tsounqas ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, Elmar Məmmədyarov Dimitrios Tsounqası ölkəmizə səfir təyin olunması münasibətilə təbrik etmiş və Azərbaycan-Yunanıstan münasibətlərinin inkişafından məmnunluğunu diqqətə çatdırmışdır.

Nazir yeni səfirin fəaliyyətinin ölkələrimiz arasındakı əlaqələrin daha da genişlənməsinə töhfə verəcəyinə əminliyini bildirmiş və Dimitrios Tsounqasa gələcək fəaliyyətində uğurlar arzulamışdır.

Etimadnaməsinin surətini Elmar Məmmədyarova təqdim edən Dimitrios Tsounqas Azərbaycana səfir təyin olunmasından məmnunluğunu bildirmişdir. İki ölkə arasında müxtəlif sahələrdə əməkdaşlığın inkişaf etdiyini vurğulayan səfir diqqətə çatdırmışdır ki, diplomatik fəaliyyəti dövründə bu əlaqələrin daha da genişləndirilməsi üçün ciddi səylər göstərəcəkdir.

Azərbaycan. - 2013.- 28 avqust.- S. 2.