Azərbaycan Diplomatik Akademiyasının nümayəndə heyəti Argentinada səfərdə olmuşdur

Azərbaycan Diplomatik Akademiyasının icraçı prorektoru Fariz İsmayılzadə, İctimai və Beynəlxalq Əlaqələr üzrə İnstitutun dekanı Anar Vəliyev və bu ali təhsil ocağının argentinalı məzunu, hazırda isə beynəlxalq proqramlar üzrə əlaqələndirici Tomas Xerbasio avqustun 21-25-də Argentinada səfərdə olmuşlar.

ADA-dan AzərTAc-a bildirmişlər ki, Azərbaycanın Argentinadakı səfirliyinin dəstəyi ilə baş tutan səfərin məqsədi Argentinanın elm-təhsil mərkəzləri ilə əlaqələrin inkişaf etdirilməsinə dair müzakirələr aparmaq və Xəzər bölgəsindəki geosiyasi vəziyyətlə bağlı təşkil olunmuş seminarlarda iştirak etmək olmuşdur.

Səfər çərçivəsində ADA-nın nümayəndələri La Plata Dövlət Universitetinin, Belqrano, El Salvador və Rosario universitetlərinin, Santiaqo Seria və Buenos-Ayres Texnologiya İnstitutunun rektorları və professor heyəti ilə görüşmüş, bu təhsil müəssisələri və ADA arasında əməkdaşlıq imkanları, birgə layihələr, o cümlədən müəllim və tələbə mübadilə proqramlarının həyata keçirilməsi üçün atılacaq addımlar barədə müzakirələr aparmışlar.

Səfər zamanı La Plata Dövlət Universiteti ilə ADA arasında anlaşma memorandumu da imzalanmışdır.

Nümayəndə heyəti, həmçinin Buenos-Ayresin Belqrano Universitetində La Plata Dövlət Universitetinin, El Salvador və Belqrano universitetlərinin birgə təşkilatçılığı ilə "Xəzər hövzəsində geosiyasi proseslər" mövzusunda təşkil olunmuş seminarda da iştirak etmişlər.

Seminarda çıxış edən Fariz İsmayılzadə və Anar Vəliyev Cənubi Qafqaz və Mərkəzi Asiya regionlarında baş verən proseslər, enerji və infrastruktur layihələri, təhlükəsizlik məsələləri, ərazi münaqişələri və Azərbaycanın regional proseslərdəki rolu barədə danışmışlar.

Səfər çərçivəsində ADA-nın nümayəndələri Argentina Xarici İşlər və Etiqad Nazirliyinin Milli Diplomatik Xidmət İnstitutu, Argentina Elm, Texnologiyalar və Produktiv İnnovasiya Nazirliyinin İKT sektorunun rəsmiləri, bu ölkənin beynəlxalq münasibətlər üzrə tanınmış alimləri, jurnalistlər, tədqiqatçılar, eləcə də Argentina Xarici İşlər Nazirliyinin nümayəndələri ilə də görüşərək Azərbaycanın xarici siyasət prioritetləri, regional siyasətdəki rolu mövzularında fikir mübadiləsi aparmışlar. Görüşlərdə gələcəkdə argentinalı ekspertlərin iştirakı ilə Azərbaycanda Latın Amerikası regionundakı proseslərlə bağlı seminarların keçirilməsi planları da müzakirə edilmişdir.

Azərbaycan. - 2013.- 28 avqust.- S. 2.