III Bakı Beynəlxalq Humanitar Forumuna Qırğızıstandan dəvət olunmuş nümayəndələrə bu mötəbər tədbirin əhəmiyyəti haqqında məlumat verilmişdir

Azərbaycanın Qırğızıstandakı səfiri Hidayət Orucov III Bakı Beynəlxalq Humanitar Forumuna bu ölkədən dəvət olunmuş nümayəndələrlə görüşmüşdür.

Səfir bildirmişdir ki, cari il Qırğızıstandan bu mötəbər tədbirdə 18 nəfər iştirak edəcəkdir. Onlar ölkənin tanınmış elm və mədəniyyət xadimləri, akademiklər, ali məktəblərin rektorları, o cümlədən tanınmış jurnalistlərdir.

Diplomat xatırlatmışdır ki, Forumun həmtəsisçiləri Azərbaycan Prezidenti İlham Əliyev və Rusiya Prezidenti Vladimir Putindir.

Səfir Humanitar Forumun əhəmiyyəti haqqında ətraflı məlumat vermişdir. O qeyd etmişdir ki, "XXI əsr: ümidlər və çağırışlar" devizi ilə keçirilən I Forumda dünyada multikulturalizmin uğurları və problemləri, biotexnologiya və etika problemləri, iqtisadi inkişaf modelinin humanitar aspektləri, yüksək texnologiyalar və sosial jurnalistika və digər mövzularda müzakirələr aparılmışdır.

Sonra səfir nümayəndələrin suallarına cavab vermişdir.

Qulu KƏNGƏRLİ,

AzərTAc-ın xüsusi müxbiri

Bişkek

Azərbaycan. - 2013.- 28 avqust.- S. 3.