Azərbaycan gəncləri dövlətin maraqlarının təmin olunmasında aparıcı qüvvəyə çevrilmişlər

Azərbaycan gəncləri dövlət müstəqilliyimizin qorunub saxlanması, möhkəmləndirilməsi və inkişaf etdirilməsi prosesində həmişə yaxından iştirak etmişlər. Bu proses indi də davam etməkdədir.

Yeni Azərbaycan Partiyası Gənclər Birliyi ofisinin rəhbəri Sərraf Balaxan bununla bağlı AzərTAc-a yazı göndərmişdir.

AzərTAc həmin yazını təqdim edir:

- Azərbaycan həm gənc dövlətdir, həm də gənclərin dövlətidir. Çünki ölkəmizdə gəncliyə göstərilən diqqət ən yüksək səviyyədədir. Bunun nəticəsidir ki, gənclər bu gün dövlətin maraqlarının təmin olunmasında aparıcı qüvvəyə çevrilmişlər.

Yeni dövrdə dövlətin qarşısında duran çətinlikləri həll edə bilmək üçün gənclərin yenidən təşkilatlanması, onlarda milli özünüdərkin, azad və demokratik düşüncənin formalaşması ümummilli lider Heydər Əliyevin qayğısı və diqqəti sayəsində mümkün olmuşdur. Bu qayğı zamanın çağırışlarına uyğun olaraq Azərbaycan Respublikasının Prezidenti İlham Əliyev tərəfindən də məqsədyönlü şəkildə davam və inkişaf etdirilir. Əsası ulu öndər tərəfindən qoyulan dövlət gənclər siyasəti daha da dərinləşdirilir, gənclərə idarəetmədə və qərar qəbulu səviyyəsində yüksək etimad göstərilir.

Ümummilli lider Heydər Əliyevin müdrik fikirləri gənclər üçün həmişə yol göstərən məşəl olmuşdur. Ulu öndər deyirdi: "Gənclər özlərini Azərbaycanın gələcəyi naminə layiqincə hazırlamalıdırlar. Hər bir gənc öz yolunu müstəqil Azərbaycan Respublikasının həyat yolu kimi qəbul etməlidir. Gənclərimizin əsas vəzifəsi özünü müstəqil Azərbaycan Respublikasının inkişafına həsr etməkdən ibarət olmalıdır".

Gənclərin ictimai-siyasi proseslərdə, müstəqil Azərbaycanın inkişafında lazımi səviyyədə iştirak edə bilmələri üçün mənəvi əsas olmalıdır. Bu mənəvi əsas əsrlər boyu xalqımızın əldə etdiyi milli dəyərlər, vətənpərvərlik duyğusu, torpağa bağlılıq, milli tariximizə olan sevgidən ibarətdir. Gənclərimiz məhz bu zəmin əsasında ölkəmizin bütün idarəetmə strukturlarında, vətəndaş cəmiyyəti institutlarında layiqincə təmsil olunurlar. Azərbaycan gəncliyi bu məsələdə öz məsuliyyətini dərindən dərk edir və üzərinə düşən işin öhdəsindən layiqincə gəlməyə çalışır. Çünki Azərbaycanın gələcək uğurları bu gənclərin bilik, bacarıq və mənəvi tərbiyəsindən asılıdır.

Hər bir gənc kimi, mən də Azərbaycan gəncliyinin Vətəninə və xalqına olan xidmət amalını yüksək dəyərləndirir və bu işdə hər bir gəncə uğur diləyirəm. Xüsusilə qarşıdan gələn prezident seçkilərində onların öz iradələrini dövlətin, xalqın və millətin xeyrinə ifadə etmələrinə, müasir Azərbaycanı böyük cəsarətlə idarə edən dövlət başçısı İlham Əliyevə dəstək olacaqlarına əminliyimi ifadə edirəm.

Azərbaycan. - 2013.- 28 avqust.- S. 3.