«Seçki prosesinə müdaxilələrə yol verilməməsi» mövzusunda məlumat sessiyası keçirilmişdir

Avqustun 27-də Mingəçevir şəhərində Azərbaycan Respublikası Prezidenti Administrasiyasının, Mərkəzi Seçki Komissiyasının (MSK) və ATƏT-in Bakı ofisinin birgə təşkilatçılığı ilə "Seçki prosesinə müdaxilələrə yol verilməməsi" mövzusunda məlumat sessiyası keçirilmişdir.

AzərTAc xəbər verir ki, sessiyada Azərbaycan Respublikası Prezidenti Administrasiyasının, MSK-nın, ATƏT-in Bakı ofisinin nümayəndələri, 38 şəhər və rayonun icra hakimiyyətinin başçıları və dairə seçki komissiyalarının sədrləri iştirak etmişlər. Sessiyada icra hakimiyyəti başçıları və dairə seçki komissiyalarının sədrləri ilə seçki prosesinə müdaxilələrə yol verilməməsi haqqında geniş fikir mübadiləsi aparılmışdır.

ATƏT-in Bakı ofisinin rəhbəri, səfir Koray Tarqay çıxış edərək bildirmişdir ki, Azərbaycanda son seçkiləri müşahidə etmiş beynəlxalq təşkilatların hesabatlarında seçki sahəsində irəliləyişlərin olduğu qeyd edilir. Son seçkilərlə bağlı ATƏT-in hesabatında da demokratiyaya doğru növbəti addımın atıldığı vurğulanmışdır. Ümid edirik ki, bu sahədə nailiyyətlər davamlı olacaqdır. Növbəti prezident seçkilərinə hazırlıq prosesinin gedişindən razılıq ifadə edən səfir siyasi partiya bloklarının MSK tərəfindən qısa müddət ərzində və maneəsiz qeydiyyata alınmasını da müsbət qiymətləndirmişdir.

"Seçki prosesinə müdaxilələrə yol verilməməsi" mövzusuna həsr olunmuş bu tədbirin seçkilərin demokratik keçirilməsinə öz töhfəsini verəcəyinə ümidvar olduğunu bildirən səfir Koray Tarqay demişdir ki, rəhbərlik etdiyi qurumun məqsədi prezident seçkilərinin demokratik keçirilməsində Azərbaycana yardım göstərməkdir. ATƏT bu fəaliyyətini dövlət qurumları ilə birgə həyata keçirir. Səfir ATƏT-in Azərbaycanı azad və ədalətli seçkilərin keçirilməsi ilə bağlı öhdəliklərinin icrasında dəstəkləməyə davam edəcəyini və seçki prosesinin Demokratik Təsisatlar və İnsan Haqları Bürosunun 310 peşəkar müşahidəçi tərəfindən izləniləcəyini qeyd etmişdir.

Azərbaycan Prezidenti Administrasiyasının Regional idarəetmə və yerli özünüidarəetmə orqanları ilə iş şöbəsinin müdir müavini Hüseyn Mövsümov qeyd etmişdir ki, qarşıdan yeni seçki sınağı gəlir və bu seçkilərin azad, şəffaf və ədalətli keçirilməsi üçün hakimiyyət qanunla üzərinə düşən bütün vəzifələri yerinə yetirir. Prezident seçkiləri növbəti beş ildə Azərbaycanın inkişaf istiqamətlərini və perspektivlərini müəyyənləşdirmək üçün ölkəmizin mövqeyini, iradəsini ifadə etmək və qərar vermək şansı yaradır. Bu baxımdan prezident seçkiləri Azərbaycanın sosial-iqtisadi həyatında da çox əhəmiyyətli bir hadisədir. Ulu öndər Heydər Əliyevin 1993-cü ildə hakimiyyətə qayıdışı ilə demokratiya əsas siyasi xətt elan olunmuşdur və bu istiqamətdə atılan bütün addımlar ölkədəki demokratik təsisatların daha da möhkəmləndirilməsinə xidmət edir.

H.Mövsümov daha sonra demişdir: "Yerli icra hakimiyyəti orqanları seçki prosesində bilavasitə iştirak etməsələr də, onlar yerlərdə seçki mühitinin yaradılmasında, seçkilər zamanı asayişin təmin edilməsində ciddi rol oynayırlar. Bundan başqa, namizədlərin seçkiqabağı təşviqatlarının aparılması üçün müvafiq yerlərin ayrılması da yerli icra hakimiyyətlərinin vəzifəsidir. İcra hakimiyyəti strukturları onların üzərinə düşən bu vəzifələri layiqincə yerinə yetirəcəklər. Azərbaycan artıq seçkilərin keçirilməsi sahəsində kifayət qədər böyük təcrübə qazanmışdır. İstər MSK və onun qurumları, istərsə də dövlət orqanları, icra strukturları bu sahədə artıq yetərincə səriştəyə malikdirlər. İndiyədək Azərbaycanda reallaşdırılan seçkilərdə qazanılmış təcrübə və səriştə, bu prosesə cəlb olunmuş insanların peşəkarlığı imkan verir ki, qarşıdan gələn prezident seçkiləri də yüksək səviyyədə keçirilsin".

Şöbə müdirinin müavini vurğulamışdır ki, Prezident İlham Əliyevin rəhbərliyi ilə Azərbaycan hakimiyyətinin siyasi iradəsi və bu sahədə görülən zəruri tədbirlər ölkəmizdə növbəti prezident seçkilərinin də azad, demokratik, şəffaf, milli qanunvericiliyə və beynəlxalq standartlara uyğun şəkildə keçirilməsinə şərait yaradır. O, prezident seçkilərinin 50 mindən çox yerli və xarici müşahidəçi tərəfindən izləniləcəyini qeyd edərək bildirmişdir ki, seçkilərə hələ 43 gün var və MSK tərəfindən bu günədək 160-dan artıq müşahidəçi qeydiyyata alınmışdır. Onlar seçkiləri izləmək üçün heç kimdən icazə almaq məcburiyyəti qarşısında qalmırlar.

Hüseyn Mövsümov məlumat vermişdir ki, seçkilərdə iştirak etmək hüququ qazanan vətəndaşların sayının ildən-ilə artması səbəbindən yeni seçki məntəqələrinə ehtiyac yaranmışdır. Bu məqsədlə prezident seçkiləri ərəfəsində ölkəmizdə daha 119 yeni seçki məntəqəsi yaradılmış və səsvermə üçün lazımi şəraitlə təmin edilmişdir. Əgər indiyədək keçirilən seçkilərdə məntəqələrin cəmi 10 faizində, yəni 500 məntəqədə veb-kameralar quraşdırılmışdırsa, dövlət başçısı İlham Əliyevin tapşırığına əsasən, qarşıdan gələn prezident seçkilərində məntəqələrin 20 faizində, yəni ümumilikdə 1000 məntəqədə veb-kameralar qoyulacaqdır. Bu da ölkədəki hər beş seçki məntəqəsindən birində səsvermə prosesinin internet vasitəsilə dünyada izlənilməsinə imkan yaradacaqdır.

Şöbə müdirinin müavini onu da bildirmişdir ki, "Sərbəst toplaşmaq haqqında" Azərbaycan Respublikasının Qanununa uyğun olaraq, seçicilərlə görüşlərin keçirilməsi üçün 118 açıq və qapalı yer müəyyən edilmişdir. Açıq yerlərin ümumi tutumu 265 min, qapalı yerlərin ümumi tutumu isə 15 min nəfərlikdir.

Mərkəzi Seçki Komissiyasının katibi Mikayıl Rəhimov ölkəmizin çox mühüm əhəmiyyət kəsb edən tarixi bir hadisə ərəfəsində olduğunu qeyd edərək bildirmişdir ki, seçkilər beynəlxalq qurumların da diqqət mərkəzindədir. Ölkə əhəmiyyətli tədbir olduğundan bu prosesdə müxtəlif dövlət strukturları iştirak edirlər. İcra hakimiyyətinin seçkilərlə bağlı əsas vəzifələrindən biri seçki prosesinin demokratik ruhda keçirilməsinə normal şərait yaratmaqdır. Bununla belə, icra hakimiyyəti orqanları seçici siyahılarının dəqiqləşdirilməsi ilə bağlı qanunla üzərinə düşən vəzifələri də icra edərək seçki komissiyalarına yardım göstərirlər. Seçkilərə hər hansı müdaxilə cəhdi olarsa, onun qarşısı qətiyyətlə alınacaqdır.

Mikayıl Rəhimov ölkədə seçkilərin keçirilməsi üçün ictimai-siyasi sabitliyin mövcud olduğunu, seçki komissiyalarının normal fəaliyyət göstərməsi ilə əlaqədar hərtərəfli şərait yaradıldığını vurğulayaraq məlumat vermişdir ki, bütün seçki komissiyaları müasir standartlara cavab verən binalarla təmin edilmiş, maddi-texniki baza möhkəmləndirilmişdir. MSK aşağı seçki komissiyalarının fəaliyyətinin daha da təkmilləşdirilməsi, peşəkarlıq səviyyəsinin artırılması və seçkilərin qanunun tələblərinə uyğun keçirilməsi üçün əvvəlki seçkilərdə olduğu kimi, bu dəfə də genişmiqyaslı maarifləndirmə proqramı hazırlayaraq həyata keçirir. ATƏT-in təşəbbüsü ilə təşkil edilən hazırkı sessiya da bu qəbildəndir. Bu sessiyalar seçkilərin tam qanunauyğun və ədalətli keçirilməsinə, habelə ölkəmizdə hüquqi dövlətin güclənməsinə və vətəndaş cəmiyyətinin daha da inkişafına xidmət edir.

M.Rəhimov qeyd etmişdir ki, Azərbaycanın beynəlxalq qurumlarla, xüsusilə ATƏT ilə uğurlu əməkdaşlığı seçkilərin demokratik, şəffaf keçirilməsində mühüm rol oynayır. Azərbaycanda ədalətli və azad seçkilərin keçirilməsi üçün zəruri olan bütün şərait yaradılır. Ən əsası isə odur ki, Prezident İlham Əliyevin özünün demokratik seçkilərin keçirilməsi üçün siyasi iradəsi mövcuddur.

Daha sonra Mərkəzi Seçki Komissiyasının üzvü Tofiq Həsənov, ATƏT-in Bakı ofisinin demokratikləşmə şöbəsinin rəhbəri Nikolas Detç seçki prosesinə müdaxilələrə yol verilməməsi ilə bağlı məruzələrlə çıxış etmişlər. Sessiyada Avropa İttifaqının nümayəndəsi Məryəm İsmayılova da çıxış edərək qarşıdan gələn prezident seçkilərinin hazırlıq mərhələsində MSK-nın gördüyü işləri yüksək qiymətləndirmişdir. O vurğulamışdır ki, Azərbaycanın seçkilərin keçirilməsi sahəsində müsbət təcrübəsi digər ölkələr üçün nümunə ola bilər.

Sessiyada mövzu ilə bağlı geniş müzakirələr aparılmışdır.

Azərbaycan. - 2013.- 28 avqust.- S. 6.