Əli Abbasov: «Ölkəmiz Cənubi Qafqazda informasiya cəmiyyətinə keçid strategiyasını qəbul etmiş birinci və yeganə dövlətdir»

"Azərbaycanda informasiya kommunikasiya texnologiyaları (İKT) sektorunun 10 illik inkişaf yolundan danışarkən əvvəlcə onu qeyd etmək lazımdır ki, ölkəmiz Cənubi Qafqazda informasiya cəmiyyətinə keçid strategiyasını qəbul etmiş birinci və yeganə dövlətdir".

AzərTAc xəbər verir ki, bu sözləri rabitə və informasiya texnologiyaları naziri Əli Abbasov mətbuata açıqlamasında demişdir.

Nazir bildirmişdir ki, Azərbaycan bu xarakterli strategiyanı qəbul edən azsaylı ölkələrdən biridir. "Azərbaycan Respublikasının inkişafı naminə informasiya və kommunikasiya texnologiyaları üzrə Milli Strategiyanın (2003-2012-ci illər)" və "Azərbaycan Respublikasında rabitə və informasiya texnologiyalarının inkişafı üzrə 2005-2008-ci illər üçün Dövlət Proqramı"nın (Elektron Azərbaycan)" təsdiq edilməsi haqqında Azərbaycan Respublikası Prezidentinin sərəncamları İKT sektorunun inkişafına əvəzsiz töhfə olmuşdur.

Ə.Abbasov demişdir ki, dövlət başçısının "Azərbaycan Respublikasında kosmik sənayenin yaradılması və telekommunikasiya peyklərinin orbitə çıxarılması haqqında", "Azərbaycan Respublikasında kosmik sənayenin yaradılması və inkişafı üzrə Dövlət Proqramı"nın təsdiq edilməsi haqqında sərəncamları isə öz növbəsində, Azərbaycanın kosmik məkana inteqrasiyasını bərqərar etmişdir.

Nazir bildirilmişdir ki, ötən 10 ildə qeydə alınan inkişaf tempini statistik rəqəmlər daha əyani xarakterizə edir. Göstərilən müddətdə İKT sektorunda orta illik artım tempi 25 faiz təşkil etmiş, bu sektor hər 3 ildə 2 dəfə genişlənmiş və həcmi təqribən 6 dəfədən çox artaraq təxminən 2 milyard dolları ötmüşdür. Bundan əlavə, sahə üzrə gəlirlərdə özəl sektorun payı 67,4 faizdən 80 faizə yüksəlmişdir.

Son 10 ildə İKT sektoruna təqribən 2,5 milyard dollar investisiya yatırılmışdır. Həyata keçirilən səmərəli işlərin məntiqi nəticələrindən biri də 2008-ci ildə MDB regionunda ilk dəfə Azərbaycanda bütün ölkə ərazisinin tam telefonlaşdırılmasının təmin edilməsidir. Eyni zamanda, 2010-cu ildə MDB-də ilk dəfə olaraq ölkəmizdə telefon şəbəkəsi tam elektronlaşdırılmışdır.

Azərbaycan. - 2013.- 25 avqust.- S. 8.