«YARAT!» Müasir İncəsənət Məkanı hollandiyalı rəssamın «Rezin ördək» layihəsini təqdim edir

Bu gün beşmərtəbəli bina boyda olan sevimli ördəyi artıq bütün dünyada tanıyırlar. Bu gözəl ev quşu dünyanın Nyu York və Tokio, Osaka və San-Paulo kimi ən böyük şəhərlərinin körfəzlərində üzmüş, səs-küy yaratmış və əsl art-sensasiyaya səbəb olmuşdur.

İdeyanın müəllifi olan hollandiyalı Florentijn Hofman da ördək balası ilə bərabər dünyanı səyahət edir.

"YARAT!" Müasir İncəsənət Məkanından AzərTAc-a bildirmişlər ki, bu qeyri-kommersiya təşkilatının "PARTICIPATE" Baku Public Art" festivalı çərçivəsində avqust ayında rəssam və onun əsəri, nəhayət ki, Bakıya gələcəkdir. Sentyabrın 5-də isə 12 metrlik ördək Dənizkənarı Milli Parkda suya buraxılacaqdır.

Bəs necə oldu ki, bu qeyri-adi cazibəyə malik iş müxtəlif qitələrdən və ölkələrdən olan insanların sevgisini qazandı? Gəlin rezin ördəyin möhtəşəm dünya səyahətinin sirrini tapmağa çalışaq.

İdeya 2007-ci ildə rəssamın doğma şəhəri Rotterdamda yaranmışdır. Florentijn Hofman adi əşyalarda gözəl tərəfləri görməyi bacaran bir rəssamdır. O, ilhamlanmaq üçün muzalara və qədim filosoflara deyil, müasirlərinin təcrübəsinə müraciət edir.

Bir çox həmkarlarının dediklərinin əksinə olaraq, rəssamı tamaşaçının fikri çox narahat edir və maraqlandırır. Florentijn Hofman tamaşaçının çıxardığı nəticəyə biganə qala bilmir. Rəssam insanları əhatə edən məişətə və onların ətrafında olan mühitə xüsusi diqqətlə yanaşır. Bu isə rəssamın işlərinin universal dilə və əsərlərinin məxsusi istiliyə malik olmasına səbəb olan bir amildir.

Onun yaradıcılığı "muzey" formatına məxsus incəsənət ab-havasına qarşı yüngül istehzası ilə fərqlənir. Öz işləri ilə - gülməli və düşündürən, köpdürülmüş nəhəng oyuncaqlarla sanki rəssam bizə demək istəyir: "Bəli, mən saqqallı uşağam və sizi güldürə bilərəm!" Florentijn Hofman həqiqətən də buna nail ola bilir.

Təəccüblü deyil ki, rəssamın ən tanınmış işi olan "Rezin ördək" Yaponiyada, ABŞ-da və Avropada eyni dərəcədə məşhurdur... Müəllif öz uğurunu belə şərh edir: "Ördək hər kəsin ürəyində xoş və nostalji hisslər yaradır. O, nə sərhəd tanıyır, nə də irqi ayrı-seçkilik edir... O, hamıya qarşı mehribandır və siyasətdən uzaqdır. O, yaşından və aldığı tərbiyədən asılı olmayaraq hər kəsi barışığa çağırır. O, bir-birinə yad insanları qısa müddətə də olsa ayaq saxlamağa və ünsiyyət qurmağa məcbur edir. Axı pablik-art obyektləri üçün səciyyəvi xüsusiyyət ünsiyyətin yaranmasıdır".

Bəlkə də məsələ ondadır ki, Florentijn Hofmanın instalyasiyası bizə uşaqlıq illərimizi xatırladır. O illərdə belə bir rezin ördək bizim dostumuz olmuş və dünyamızın balaca hissəsinə çevrilmişdir. Uşaqların keçirdikləri həyəcanın rəssam tərəfindən xeyirxah yumor və sadəliklə bizə çatdırılması insanda xoş hisslər yaradır.

Ən məşhur işinin uğurundan ilhamlanan rəssam sonrakı illərdə də bir sıra maraqlı əsərlər yaratmışdır. 2010-cu ildə Braziliyanın San-Paulo şəhərinin mərkəzi parkında quraşdırdığı 15 metrlik instalyasiya camaat içində "Kök meymun" adını almışdır. Daha diqqətlə baxsaq görərik ki, instalyasiya 10.000 cüt şistdən (Braziliyada ənənəvi ayaqqabı) yığılmışdır.

2011-ci ildə İsveçin Orebro şəhərciyi üçün "Nəhəng sarı dovşan" yaratmışdır. Əsər İsveçdə dam örtüyü üçün istifadə olunan kirəmitdən tərtib olunmuşdur.

Son illər ərzində Florentijn Hofman pablik-art sahəsində bir neçə irihəcmli layihə həyata keçirmişdir. 2004-2006-cı illərdə Byukelsbou şəhərində olan məhəllələrin birində bütün binaları başdan-ayağa açıq mavi rəngə boyayaraq hər kəsin diqqətini sökülməli olan bu məhəlləyə cəlb etmişdir.

2008-ci ildə yeni avtomagistral yolun açılması münasibətilə rəssam 470 nəfər könüllü toplamış və hamı ilə birgə dünyanın ən böyük hava şarında uçuş həyata keçirmişdir. Onun məqsədi sakinlərə öz rayonlarının və qonşu ərazilərin quş uçuşu hündürlüyündən necə göründüyünü göstərmək və hər şeyə yeni rakursdan baxılması idi.

Deməli, indi Bakı gənc hollandiyalı rəssamın yaratdığı ən pozitiv və cazibəli "Rezin ördək" əsərinin gəlişini gözləyir. Tezliklə onun xoş silueti Dənizkənarı Milli park boyunca görünəcək və hər kəsi qısa müddətlik də olsa, fikrən uşaqlıq illərinə aparacaqdır.

Azərbaycan. - 2013.- 29 avqust.- S. 12.