Milli Qeyri-Hökumət Təşkilatları Forumunun seçki koalisiyası əhalinin seçki fəallığının artırılması ilə bağlı ilk tədbirini Ağdaşda keçirmişdir

Avqustun 29-da Ağdaş rayon bələdiyyəsində Milli Qeyri-Hökumət Təşkilatları Forumu (MQF) seçki koalisiyasının təşkilatçılığı ilə seçki maarifçiliyi, əhalinin seçki fəallığının artırılması, seçki hüququ ilə bağlı ilk tədbir keçirilmişdir.

Milli QHT Forumunun mətbuat xidmətindən AzərTAc-a bildirmişlər ki, seçki müşahidəçilərinin, siyasi partiyaların, bələdiyyələrin, QHT nümayəndələrinin iştirak etdikləri tədbirdə koalisiyasının təmsilçiləri MQF-nin prezidenti Rauf Zeyni, Beynəlxalq Avrasiya Mətbuat Forumunun rəhbəri Umud Mirzəyev, Müstəqil Elmi-Praktik Hüquq Mərkəzinin sədri Aydın Kərimov, "Milli Qəhrəmanların Təbliğinə Dəstək" İctimai Birliyinin sədri Mirbəşir Seyidzadə və başqaları seçki münasibətləri, seçki hüququ, seçki qanunvericiliyi, seçki prosesində vətəndaş cəmiyyəti institutlarının iştirakı mexanizmi və s. haqqında məlumat vermiş, iştirakçıların suallarını cavablandırmışlar.

İştirakçıların suallarına cavab olaraq MQF seçki koalisiyasının nümayəndələri son illər ərzində ölkəmizin inkişafı, beynəlxalq aləmdə nüfuzunun artması, regionda qüdrətli dövlətə çevrilməsi, "Azərbaycan 2020: gələcəyə baxış" İnkişaf Konsepsiyası çərçivəsində vətəndaş cəmiyyətinin inkişafı, QHT-lərə Dövlət Dəstəyi Konsepsiyasının və Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının yaradılması, regionlarda vətəndaş cəmiyyətinin inkişafı və s. məsələlərlə əlaqədar son illərdə əldə olunan nailiyyətlər barədə rayon ictimaiyyətinə məlumat vermişlər.

Tədbirin sonunda MQF-nin seçki koalisiyası seçiciləri bu il oktyabrın 9-da keçiriləcək prezident seçkilərində fəal iştirak etməyə çağırmışdır. "2013-cü ildə Azərbaycan Respublikasında keçiriləcək prezident seçkiləri ilə bağlı regionlarda və Bakı şəhərində əhalinin maarifləndirilməsi ilə bağlı tədbirlərin həyata keçirilməsi" layihəsi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə Milli QHT Forumunun seçki koalisiyası tərəfindən icra edilir.

Azərbaycan. - 2013.- 30 avqust.- S. 7.