ATƏT-in Demokratik Təsisatlar və İnsan Haqları Bürosunun seçkiləri müşahidə missiyasının fəaliyyətə başlaması ilə əlaqədar mətbuat konfransı keçirilmişdir

Oktyabrın 9-da Azərbaycanda keçiriləcək prezident seçkilərini izləyəcək ATƏT-in Demokratik Təsisatlar və İnsan Haqları Bürosunun (DTİHB) seçkiləri müşahidə missiyasının fəaliyyətə başlaması ilə əlaqədar avqustun 29-da mətbuat konfransı keçirilmişdir.

AzərTAc xəbər verir ki, mətbuat konfransında ATƏT DTİHB-in seçkiləri müşahidə missiyasının rəhbəri Tana de Zulueta qeyd etmişdir ki, Azərbaycan ATƏT-in üzv ölkəsi kimi üzərinə götürdüyü öhdəliklərə uyğun olaraq, DTİHB-ni seçkilərə müşahidəçi qismində dəvət etmişdir.

Bildirilmişdir ki, Bakıda çalışacaq missiya 12 beynəlxalq ekspertdən və ölkənin müxtəlif regionlarına göndəriləcək 30 uzunmüddətli müşahidəçidən ibarətdir. Ekspertlər və müşahidəçilər 22 üzv ölkədən cəlb olunmuşlar. O demişdir: "Bizim işimiz seçkiləri müşahidə etməkdir. Zərurət yaranan hallarda vəziyyəti yaxşılaşdırmaq üçün lazımi tövsiyələrimizi də verə bilərik".

Tana de Zulueta vurğulamışdır ki, missiya prezident seçkilərinin ATƏT qarşısında götürülən öhdəliklərə və demokratik seçkilər üzrə digər beynəlxalq standartlara, həmçinin yerli qanunvericiliyə uyğunluğunu qiymətləndirəcəkdir. Müşahidəçilər namizədlərin qeydiyyat prosesini, seçki kampaniyasını, seçki orqanları və müvafiq qurumların işini, seçki qanunvericiliyini və onun icrasını, media mühitini və daxil olan şikayətlərə baxılması prosesini yaxından izləyəcəklər.

Diqqətə çatdırılmışdır ki, bu müddət ərzində missiya müvafiq dövlət qurumları və siyasi partiyalar, namizədlər, vətəndaş cəmiyyəti, media və beynəlxalq təşkilatların nümayəndələri ilə görüşlər keçirəcəkdir. Səsvermə günündə missiyanın nümayəndələri seçki məntəqələrinin açılmasını, sesvermə prosesini, səslərin hesablanması və protokollaşdırılmasını müşahidə edəcəklər.

İlkin müşahidələr və rəylər üzrə bəyanatın seçkidən bir gün sonra veriləcəyini deyən Tana de Zulueta bildirmişdir ki, seçki prosesinin müşahidəsinin tam nəticələrini özündə əks etdirən yekun hesabat seçkinin başa çatmasından təxminən iki ay sonra dərc olunacaqdır.

Sonda jurnalistləri maraqlandıran suallar cavablandırılmışdır.

Azərbaycan. - 2013.- 30 avqust.- S. 6.