Prezident İlham Əliyev Saatlı Olimpiya İdman Kompleksinin açılışını etmişdir

Azərbaycan Respublikasının Prezidenti İlham Əliyev avqustun 29-da Saatlı Olimpiya İdman Kompleksinin açılışında iştirak etmişdir.

Dövlət başçısı kompleksin rəmzi açılışını bildirən lenti kəsdi.

Məlumat verildi ki, Saatlı Olimpiya İdman Kompleksinin inşasına 2011-ci ilin dekabrında başlanılmışdır. Kompleksin tikintisi məqsədi ilə "Saatlı rayonunda Olimpiya İdman Kompleksinin və Gənclər Mərkəzinin tikintisi haqqında" Azərbaycan Respublikası Prezidentinin sərəncamı ilə Prezidentin Ehtiyat Fondundan ilkin olaraq 1 milyon manat, ötən il işlərin davam etdirilməsi üçün Nazirlər Kabinetinin sərəncamı ilə 2 milyon, 2013-cü ildə isə investisiya proqramına uyğun olaraq daha 5 milyon manat ayrılmışdır. Burada bir çox yarışların, təlim-məşq toplanışlarının və digər tədbirlərin keçirilməsi üçün hər cür şərait vardır.

Dövlət başçısı kompleksin üzgüçülük zalı ilə tanış oldu.

Bildirildi ki, burada Türkiyə istehsalı olan hovuz sistemi və "Gonka Klima" markalı xüsusi nəmalma qurğusu quraşdırılmışdır. İki yüz yerlik zalda iki soyunub-geyinmə, duş otaqları vardır. Kompleksin ərazisində ikimərtəbəli beş kottec inşa edilmişdir. Hər kottec dörd nömrədən ibarətdir.

Olimpiya İdman Kompleksinin ümumi zalının foyesində ümummilli lider Heydər Əliyevin və Prezident İlham Əliyevin Saatlıya səfərlərindən və idmanın inkişafına göstərdikləri qayğıdan bəhs edən fotoguşələr yaradılmışdır.

Qeyd olundu ki, kompleksin tikintisi üçün 6 hektar torpaq sahəsi ayrılmış, layihə-smeta sənədləri "Sosial İnkişaf Layihə" Məhdud Məsuliyyətli Cəmiyyət tərəfindən hazırlanmışdır. Layihəyə əsasən, ümumi sahəsi 3340 kvadratmetr olan universal idman zalında 432 oturacaq vardır. Eyni zamanda, 400 tamaşaçı yarışları lojalardan izləyə biləcəkdir. Burada idmançılar üçün iki soyunub-geyinmə, məşqçi və digər yardımçı otaqlar vardır. İnzibati hissənin birinci mərtəbəsində geniş vestibül, informasiya mərkəzi, məlumat-qeydiyyat hissəsi, istirahət otağı yerləşir. İkinci mərtəbədə trenajor zalı, kafe, müdiriyyət və işçi otaqları, konfrans zalı və güləş zalı vardır. Bu ilin sonunadək 900 yerlik açıq stadion, tennis kortu, basketbol meydançasının tikintisi yekunlaşacaqdır.

Olimpiya İdman Kompleksinin açılışından sonra Prezident İlham Əliyev Saatlı rayon ictimaiyyətinin nümayəndələri ilə görüşdü.

Rayon ictimaiyyətinin nümayəndələrini və idmançıları Olimpiya İdman Kompleksinin açılışı münasibətilə təbrik edən Prezident

İlham ƏLİYEV dedi:

- Sizi ürəkdən salamlayıram. Saatlıda Olimpiya Mərkəzi açılır, gözəl hadisədir. Bu gözəl hadisə münasibətilə sizi ürəkdən təbrik edirəm. Gözəl mərkəzdir və idmanla məşğul olmaq üçün bütün şərait vardır. Əminəm ki, gənclər bu mərkəzdən səmərəli şəkildə istifadə edəcəklər, uşaqlar gələcəklər. Burada, əlbəttə ki, idman bölmələri təşkil edilməlidir və rayon sakinləri də gəlməlidirlər, burada idmanla məşğul olmaq üçün bütün imkanlar vardır.

İdman sağlamlıq, sağlam həyat tərzi deməkdir. Biz Azərbaycanda idmanın kütləviliyini də təmin edə bilmişik. Çünki uşaqlar, gənclər kütləvi şəkildə idman bölmələrinə gedirlər, məşğul olurlar və sonra da ölkəmizi beynəlxalq yarışlarda ləyaqətlə təmsil edirlər. Bizim idmançılar böyük uğurlara imza atmışlar. Olimpiya Oyunlarında böyük nailiyyətlər qazanmışıq. Bu yaxınlarda keçirilən Universiadada Azərbaycan komanda hesabında 16-cı yerə layiq görülmüşdür. Bu, onu göstərir ki, gənc idmançılar, peşəkar idmançılar daim bizi sevindirir və Azərbaycan dünyada idman ölkəsi kimi tanınır.

Əlbəttə, buna nail olmaq üçün şərait olmalıdır. Bu məqsədlə bölgələrdə Olimpiya İdman kompleksləri tikilir və bu gün Saatlıda biz bu kompleksin açılışını qeyd edirik. Doğrudan da, böyük hadisədir və hər dəfə Saatlıda olarkən biz hansısa bir obyektin açılışında iştirak edirik. Mən dəfələrlə Saatlı rayonunda olmuşam və görürəm ki, burada inkişaf var, abadlıq-quruculuq işləri aparılır, yollar çəkilir, binalar tikilir. Bu, məni sevindirir. Çünki hər bir rayonun inkişafı ölkəmizin ümumi inkişafına bir töhfədir. Hər bir rayonun inkişafı burada sakinlərin yaşayış şəraitini yaxşılaşdırır, yeni imkanlar, yeni iş yerləri, yeni müəssisələr açılır. Saatlı rayonunun inkişafı ilə bağlı müvafiq sərəncamlar verilmişdir, vəsait ayrılmışdır. Yenə də vəsait ayrılacaqdır ki, burada işlər daha da sürətlə getsin.

İndi Bakı ilə Saatlı arasında olan yolun tikintisi başa çatır. Yaxın həftələrdə artıq qalan hissə də tikiləcəkdir və Saatlıdan Bakıya, digər bölgələrə rahat getmək mümkün olacaqdır. Bu yol bilirəm ki, sakinləri həmişə narahat edirdi və mən də dəfələrlə bu yolu gəlmişəm və görürəm ki, indi Sabirabada qədər çəkilən yol bütün standartlara cavab verir və artıq Saatlıya qədər qalan hissə də başa çatmaq üzrədir. Kənd yolları tikilir. Bu gün biz bir kənd yolunun açılışını qeyd etdik. Orada on minlərlə insan yaşayır və beləliklə, kənd yolları, magistral yollar, digər infrastruktur layihələri Saatlıda icra edilir.

Növbəti mərhələdə su layihəsi icra ediləcəkdir. Bilirəm ki, buna da böyük ehtiyac vardır. Əvvəlki illərdə bir neçə kənddə modul tipli təmizləyici qurğular quraşdırılmışdır. Ancaq Saatlı şəhərini davamlı içməli su ilə təmin etmək üçün bu ilin sonuna qədər işlər başlamalıdır. Hesab edirəm ki, bir il ərzində bu layihə də başa çatacaq və ondan sonra Saatlı şəhərini 24 saat keyfiyyətli içməli su ilə təmin etmək mümkün olacaqdır. Bu, böyük layihədir, böyük vəsait tələb edən layihədir. Ancaq Azərbaycan dövləti bunu edir və edəcəkdir. Çünki su həyat, sağlamlıq deməkdir və təmiz keyfiyyətli su sağlam həyat deməkdir.

Olimpiya Kompleksi, xəstəxana, içməli su layihəsi - bütün bunlar sosialyönümlü layihələrdir, insanların sağlamlığı üçün icra edilir, vəsait ayrılır. Dövlət İnvestisiya Proqramında vəsait nəzərdə tutulur ki, bölgələrdə sakinlər rahat yaşasınlar və bütün işlər ən yüksək standartlarda görülməlidir.

Saatlıda qazlaşdırma layihəsi daha sürətlə icra edilməlidir. Əfsuslar olsun ki, şəhər hələ tam şəkildə qazlaşdırılmayıb. Bu, dözülməz bir haldır. İndi bizim əksər şəhərlərimizdə qazlaşdırma yüz faiz təmin edilibdir. Tezliklə müvafiq qurumlar Saatlıda qazlaşdırma işlərini həll etməlidirlər. İlk növbədə, şəhər tam şəkildə qazlaşdırılmalıdır və Saatlının bütün kəndlərinə təbii qaz xətləri çəkilməlidir. Bu göstəriş verilmişdir və hesab edirəm ki, bu sözlərdən sonra müvafiq qurumlar bu işə daha da böyük məsuliyyətlə yanaşacaqlar, əsassız yubanmalara yol verilməyəcəkdir.

Beləliklə, bütün infrastruktur layihələrinin icrası nəticəsində tam yeni bir dövr başlanacaqdır. İnsanların rahatlığı, iş yerlərinin yaradılması üçün bütün lazımi addımlar atılır. Dövlət İnvestisiya Proqramında Saatlının inkişafı ilə bağlı müvafiq göstərişlər nəzərdə tutulubdur. Kənd təsərrüfatının inkişafı ilə bağlı əlavə tədbirlər görüləcəkdir. Mənə indi verilən məlumata görə, sizdə məhsuldarlıq da, taxıl yığımı da çox yüksəkdir, respublika üzrə olan rəqəmdən qat-qat üstündür. Çox gözəl göstəricidir. Kənd təsərrüfatı, heyvandarlıq, digər sahələr burada inkişaf etməlidir və inkişaf edəcəkdir. Bununla paralel olaraq, bütün sosial infrastruktur layihələri tam şəkildə öz həllini tapmalıdır. Bu istiqamətdə atılmış addımlar təqdirəlayiqdir, - xəstəxana, Olimpiya Mərkəzi, yollar, digər infrastruktur layihələri, - ancaq bununla bərabər, məktəblərdə də çox işlər görülməlidir. Saatlı rayonunda qəzalı məktəblər hələ var və onların da təmiri nəzərdə tutulur.

Bir sözlə, hər rayon üzrə, o cümlədən Saatlı üçün konkret tədbirlər planı vardır. İkinci Dövlət Regional İnkişaf Proqramı bu ilin sonunda başa çatır və üçüncü proqram gələn il qəbul ediləcəkdir. Bu günə qədər həllini tapmayan məsələlər üçüncü Dövlət Proqramına salınacaq və növbəti beş il ərzində tamamilə öz həllini tapacaqdır.

Sizi bir daha ürəkdən salamlayıram, belə gözəl Olimpiya Kompleksinin açılışı münasibətilə bir daha təbrik edirəm.

***

Rayon ictimaiyyətinin nümayəndələri və idmançılar adından çıxış edən Nərimankənd orta məktəbin məşqçi-müəllimi Xəyal ƏHMƏDOV dedi:

- Möhtərəm cənab Prezident, Saatlıya xoş gəlmisiniz. Sizi idmançılarımız və bütün ictimaiyyətimiz adından ürəkdən salamlayıram. Bu gün bizim sevincimizin həddi-hüdudu yoxdur. Ona görə ki, xalqımızın böyük oğlu, əziz Prezidentimiz bizimlə görüşə gəlibdir.

Sizin hər səfəriniz, hər gəlişiniz Saatlının inkişafına yeni töhfələr deməkdir. Biz Sizin saatlılılara doğma və isti münasibətinizin daim şahidi olmuşuq. 2011-ci ildə Saatlıya səfəriniz zamanı Sizdən xahiş etmişdik ki, rayonumuzda bir Olimpiya İdman Kompleksi tikilsin. Siz dərhal göstəriş verdiniz, Saatlıda Olimpiya İdman Kompleksi və Gənclər Mərkəzinin tikintisi haqqında sərəncam imzaladınız. Bununla da bizə ikiqat sevinc bəxş etdiniz.

Bu gün isə biz sevinc içərisindəyik. Rayonumuzda bu möhtəşəm Olimpiya İdman Kompleksinin açılışında bizimlə birlikdə iştirak edirsiniz. Bu Sizin ucalığınızın, insanların qayğıları ilə yaşamağınızın, gənclərimizin sağlam gələcəyinə olan ali diqqətinizin bariz nümunəsidir.

Cənab Prezident, Siz bizim arzularımızı gerçəkləşdirdiniz. Mən taekvondo üzrə məşqçi-müəllim işləyirəm. Onlarla yetirməm taekvondo sənətini davam etdirir. Biz söz veririk ki, bu möhtəşəm kompleksdə yeni çempionlar yetişdirəcəyik.

Bu möhtəşəm Olimpiya İdman Kompleksi gündən-günə abadlaşan, müasir görkəmdə yenidən qurulan Saatlıya əlavə yaraşıq verir. Sizin yüksək diqqət və qayğınız sayəsində rayonumuzda sosial obyektlər, körpülər tikilir, yollar, parklar salınır, yeni iş yerləri açılır, rayon sakinlərinin istək və arzuları reallığa çevrilir. Doğma Azərbaycanımızın tərəqqisi naminə gördüyünüz bu əzəmətli işlərlə biz fəxr edirik, Sizinlə qürur duyuruq.

Əziz Prezidentimiz, indi Azərbaycan idman ölkəsi kimi tanınır. Ölkəmizdə Olimpiya və idman hərəkatının inkişafı da Sizin adınızla bağlıdır. Hər dəfə beynəlxalq yarışlarda idmançılarımızın uğurlu çıxışları nəticəsində dövlət bayrağımız dalğalananda sevincdən gözlərimiz yaşarır. 2015-ci ildə birinci Avropa Oyunlarının Azərbaycanda keçirilməsi isə ölkəmizin sürətli inkişafının beynəlxalq aləmdə sabit, tərəqqipərvər bir dövlət kimi özünə layiqli yer tutmasının təsdiqidir. Buna görə Sizə dərin minnətdarlığımızı bildiririk. Cənab Prezident, birinci Avropa Oyunlarının Təşkilat Komitəsinə Mehriban xanım Əliyevanın rəhbərlik etməsi sayəsində bu oyunların da mötəbər bir tədbir kimi tarixə düşəcəyinə inanırıq. Buna görə Sizə və Azərbaycanın birinci xanımı Mehriban Əliyevaya dərin təşəkkürümüzü bildiririk.

Möhtərəm cənab Prezident, Saatlı gəncləri və idmançıları Sizi əmin edir ki, bu möhtəşəm kompleksdən - bütün şəraiti olan, hər bir avadanlıqla təchiz edilmiş bu kompleksdən səmərəli istifadə edəcəyik. Mən idmançılarımız adından söz verirəm ki, bizim bütün qələbələrimiz, gələcəyə inamımız Sizinlə bağlıdır. Gənclərimiz öz gələcəklərindən tam arxayındırlar. Çünki bizim Sizin kimi qüdrətli liderimiz vardır. Xalqımız çox gözəl bilir ki, Siz suveren Azərbaycanımızın, bugünkü firavan həyatımızın qarantısınız. Bir daha əmin ola bilərsiniz ki, Sizin həyata keçirdiyiniz bütün işlərdə saatlılılar həmişə Sizinlədirlər, daim Sizinlə olacaqlar. Sizə möhkəm cansağlığı, işlərinizdə uğurlar arzu edirəm, cənab Prezident.

Prezident İlham ƏLİYEV: Bizim görüşlərimiz hələ çox olacaqdır. Çünki Saatlıda görüləsi işlər çoxdur. Açılışlar da olacaqdır. Yeni obyektlərin açılışlarında biz bərabər olacağıq. Sizi əmin edirəm ki, gələcəkdə də Saatlının inkişafını daim diqqət mərkəzində saxlayacağam və rayonun inkişafı üçün bütün tədbirlər görüləcəkdir, Saatlı inkişaf edəcək, çiçəklənəcəkdir. Bir daha sizi təbrik edirəm.

***

Sonda xatirə şəkli çəkdirildi.

AzərTAc

Azərbaycan. - 2013.- 31 avqust.- S. 2-3.