Sloveniya Azərbaycan ilə əməkdaşlığın daha da inkişaf etdirilməsində maraqlıdır

Azərbaycan Respublikasının fövqəladə hallar naziri, general-polkovnik Kəmaləddin Heydərov ölkəmizdə səfərdə olan Lyublyana şəhərinin meri Zoran Yankoviç başda olmaqla Sloveniyanın müdafiə naziri Roman Yakiç və iqtisadi inkişaf və texnologiyalar naziri Stanko Stepişnik ilə görüşmüşdür.

Fövqəladə Hallar Nazirliyindən AzərTAc-a bildirmişlər ki, görüşdə nazir qonaqlara respublikada fövqəladə halların qarşısının alınması və nəticələrinin aradan qaldırılması sahəsində görülən işlər, nazirliyin strukturuna daxil olan qurumların fəaliyyəti barədə ətraflı məlumat vermişdir. Eyni zamanda, hər iki ölkənin müvafiq qurumları arasındakı əməkdaşlıq əlaqələrinin daha da inkişaf etdirilməsinin vacibliyini vurğulamışdır.

Qonaqlar da öz növbələrində ölkələrinin Azərbaycan ilə əməkdaşlıqda maraqlı olduqlarını qeyd etmiş və bu kimi görüşlərin gələcəkdə hər iki ölkənin əlaqələrinin genişləndirilməsi baxımından geniş imkanlar açacağına ümid etdiklərini vurğulamışlar.

Görüşdə mütəmadi fikir və təcrübə mübadiləsinin əhəmiyyəti vurğulanmış, eyni zamanda, qarşılıqlı maraq doğuran digər məsələlər haqqında geniş müzakirələr aparılmışdır.

***

Azərbaycanın xarici işlər naziri Elmar Məmmədyarov Lyublyana şəhərinin meri Zoran Yankoviç başda olmaqla Sloveniyanın müdafiə naziri Roman Yakiçin və iqtisadi inkişaf və texnologiyalar naziri Stanko Stepişnikin daxil olduğu nümayəndə heyəti ilə görüşmüşdür.

Xarici İşlər Nazirliyinin mətbuat xidmətindən AzərTAc-a bildirmişlər ki, Elmar Məmmədyarov Azərbaycan-Sloveniya ikitərəfli münasibətlərinin müxtəlif sahələr üzrə inkişafından məmnunluğunu ifadə etmişdir. Ölkələrimiz arasında siyasi münasibətlərin yüksək səviyyədə olduğunu qeyd edən nazir beynəlxalq təşkilatlar çərçivəsində əməkdaşlığın möhkəmləndirilməsinin əhəmiyyətini vurğulamışdır. Diqqətə çatdırmışdır ki, turizm, logistika, infrastruktur kimi sahələrdə iki ölkənin işgüzar dairələrinin əməkdaşlığı üçün geniş imkan vardır.

Azərbaycana səfərindən məmnunluğunu bildirən Zoran Yankoviç ölkəmizdə müşahidə etdiyi dinamik inkişafdan təsirləndiyini vurğulamışdır. O, Azərbaycan və Sloveniya arasında ikitərəfli münasibətlərin genişləndirilməsinin əhəmiyyətini qeyd etmişdir. Diqqətə çatdırmışdır ki, Sloveniya Azərbaycan ilə əməkdaşlığını daha da genişləndirməkdə maraqlıdır.

Görüşdə, həmçinin qarşılıqlı maraq doğuran bir sıra regional və beynəlxalq məsələlər ətrafında fikir mübadiləsi aparılmışdır.

Azərbaycan. - 2013.- 31 avqust.- S. 7.