Forumda iştirak edən gənclər dünyanın ən yaxşı universitetlərində təhsil alan və məzun olmuş kadrlardır

Forumda iştirak edən gənclər dünyanın ən yaxşı universitetlərində təhsil alan və məzun olan seçilmiş kadrlardır. Forum müddətində dövlət qurumlarına və özəl şirkətlərə belə insanlardan yararlanmaq imkanı verilir.

AzərTAc xəbər verir ki, bu sözləri Xaricdə Təhsil Alan və Məzun Olmuş Gənclərin Beynəlxalq Forumunun (ASAIF) XI Yay Forumunda iştirak edən ASAIF-ın sədri Ramin Həkimov jurnalistlərə müsahibəsində demişdir. Bildirmişdir ki, ASAIF həm ölkədə, həm də xaricdə keçirilən forumlarında əmək yarmarkaları təşkil edir. Əmək yarmarkalarına dövlət qurumları və özəl şirkətlərdən nümayəndələr gəlirlər. Gənclər CV təqdim edirlər və işlə təmin olunurlar.

Sədr ASAIF-ın XI Yay Forumunun xaricdə bu il təhsil almağa gedəcək olan gənclər, hazırda təhsil alanlar, artıq təhsilini bitirib məzun olmuş və işlə təmin edilən, cəmiyyətdə müəyyən mövqeyə gəlib çatmış insanların birgə forumu olduğunu söyləmişdir. Nəzərə çatdırmışdır ki, tamamilə fərqli və səmimi bir atmosferdə aparılan forumda 750-dən artıq gənc və rəsmi heyət iştirak edir və təcrübə mübadiləsi aparır.

R.Həkimov əvvəllər forumun iki gün keçirildiyi halda, bu dəfə artıq 2 gün rəsmi, bir gün qeyri-rəsmi olmaqla 3 gün davam edəcəyini söyləmişdir. Qeyd etmişdir ki, müxtəlif mövzularda təşkil olunan panellərdə gənclərlə müzakirələr aparılacaqdır. Bu, gənclərin artıq öz təkliflərini azad və sərbəst şəkildə ifadə edə bilmələri deməkdir.

Sentyabrın 1-də isə Qəbələyə səfər təşkil ediləcəkdir. Orada da Təhsil Nazirliyinin əməkdaşları ilə müzakirələr keçiriləcək, Azərbaycan Ağsaqqallar Şurasının üzvləri ilə görüş olacaqdır.

Azərbaycan. - 2013.- 31 avqust.- S. 8.