Bakıda UNESCO-nun Qeyri-Maddi Mədəni İrsin
Qorunması üzrə
Hökumətlərarası Komitəsinin
8-ci sessiyası işini
iclaslarla davam etdirmişdir
Bakıda UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin 8-ci sessiyası öz işini iclaslarla davam etdirir.
AzərTAc xəbər verir ki, sessiya çərçivəsində dekabrın 6-da günün birinci yarısında Azərbaycan Respublikasının mədəniyyət və turizm naziri Əbülfəs Qarayevin sədrliyi ilə növbəti iclas başlamışdır.
Əbülfəs Qarayevin təklifi ilə sessiyanın iştirakçıları Cənubi Afrika Respublikasının keçmiş Prezidenti Nelson Mandelanın vəfatı ilə əlaqədar mərhumun xatirəsini bir dəqiqəlik sükutla yad etmişlər.
Sonra sessiya işini davam etdirmişdir. Əvvəlcə
2014-cü il üçün məşvərətçi
qurumun yaradılmasına
və onun texniki şərtlərinə
dair işçi sənəd müzakirə
edilmiş və qərar layihəsi
("8.COM 9.a") qəbul olunmuşdur.
Daha sonra iclasda əməliyyat direktivlərinə ilkin düzəlişlər müzakirə
olunmuşdur. Qeyri-Maddi Mədəni İrsin Qorunması üzrə Konvensiyanın katibi Sesil Düvel bildirmişdir ki, UNESCO-nun Qeyri-Maddi Mədəni İrsin Qorunması üzrə Hökumətlərarası
Komitəsinin 2012-ci ilin
dekabrında Parisdə
keçirilmiş sessiyasında
mühafizənin, kommersiyalaşmanın
və davamlı inkişafın arasında
münasibətlər müzakirə
edilmiş, müxtəlif
rəy və təkliflər verilmişdir.
Bildirilmişdir ki, Konvensiyanın
yerinə yetirilməsi
üzrə əməliyyat
direktivləri mütəmadi
olaraq yenilənir.
Hazırda "8.COM 13.a" qərar layihəsinin 116 və
117-ci bəndlərinə müəyyən
dəyişikliklər edilmişdir.
Sonra müvafiq
düzəliş və
dəyişikliklər aparılaraq
"8.COM 13.a" sənəd layihəsi qəbul olunmuşdur.
Sessiyanın dekabrın 6-da keçirilən
iclasında, həmçinin
Bəşəriyyətin Qeyri-Maddi
İrsinin Reprezentativ Siyahısına salınmalı
olan nominasiyaların nəzərdən keçirilməsi
üçün seçim
məsələlərinə dair işçi sənəd də müzakirə edilmişdir.
Daha sonra əməliyyat direktivlərinə
ilkin düzəlişlər
məsələsi nəzərdən
keçirilmişdir. Müvafiq sahə
üzrə siyahıya
salınmış elementin
genişləndirilməsi və
ya ixtisara salınması proseduru müzakirə edilmiş və sənəd layihəsi ("8.COM 13.c") qəbul
edilmişdir.
Sonra sessiyanın
iştirakçıları üçün İçərişəhərə
infotur təşkil edilmişdir.
Əvvəlcə qonaqlara Qız qalası abidəsinin qeyri-adi memarlıq özəllikləri barədə
məlumat verilmişdir.
Yaxınlıqdakı Sıratağlı dini-memarlıq
kompleksinin ərazisindəki
ekspozisiya ilə tanışlıq da qonaqlarda böyük maraq doğurmuşdur.
İçərişəhərlə tanışlıq
zamanı qonaqlara
UNESCO-nun Dünya İrsi
Siyahısına daxil edilmiş "İçərişəhər"
Dövlət Tarix-Memarlıq
Qoruğu, burada aparılan təmir, abadlaşdırma və bərpa işləri barədə ətraflı
məlumat verilmişdir.
Bildirilmişdir ki, İçərişəhər
ərazisində müxtəlif
əsrlərə aid nadir tarixi
memarlıq abidələri
vardır və bunlar qorunub saxlanılır.
Gəzinti zamanı qonaqlar
orta əsr Şərq memarlığının
şah əsəri, dünya əhəmiyyətli
tarix-memarlıq abidəsi
olan "Şirvanşahlar
Sarayı Kompleksi"
ilə tanış
olmuşlar. Məlumat verilmişdir ki,
XV əsrin əvvəllərində
inşa olunmuş tarixi abidənin tikililəri İçərişəhərin
təpələrindən birinin
ən hündür nöqtəsində yerləşir.
O, Xəzər dənizindən
və şəhərin
ətrafındakı yüksəkliklərdən
aydın görünür.
Kompleks bugünədək öz tarixi-memarlıq üstünlüyünü
saxlamaqdadır.
UNESCO-nun Qeyri-Maddi Mədəni
İrsin Qorunması üzrə Hökumətlərarası
Komitəsinin 8-ci sessiyası
işini günün ikinci yarısında mədəniyyət və
turizm naziri Əbülfəs Qarayevin sədrliyi ilə davam etdirmişdir.
Tədbirdə nominasiyaların qiymətləndirilməsi,
köməkçi və
məşvərətçi qurumun vəziyyəti barədə geniş fikir mübadiləsi aparılmışdır.
Müvafiq düzəliş və dəyişikliklər aparılaraq
"8.COM 13.d" sənəd layihəsi qəbul olunmuşdur.
Sonra Qeyri-Maddi
Mədəni İrsin
Qorunması üzrə
Konvensiyanın katibi xanım Sesil Düvel qeyri-hökumət
təşkilatları barədə
hesabatla çıxış
etmişdir.
Bildirilmişdir ki, sessiyanın ilk günündə Azərbaycan
paytaxtında qeyri-maddi
mədəni irsin qorunması üzrə Beynəlxalq QHT Forumu təşkil olunmuşdur. Forumda 150-dən artıq Beynəlxalq qeyri-hökumət təşkilatının
təmsilçiləri iştirak
etmişlər.
Vurğulanmışdır ki, UNESCO-nun 2003-cü il Konvensiyasının iştirakçı dövlətlərinin ali məclislərində indiyədək 156 QHT akkreditə olunmuşdur. Onların bəziləri qeyri-maddi mədəni irsin əsas daşıyıcıları ilə sıx əlaqə saxlayır, digərləri sadəcə mədəni vasitəçi kimi fəaliyyət göstərirlər.
Diqqətə çatdırılmışdır ki, QHT-lər konvensiyanın işində mühüm rol oynamaq niyyətindədirlər. Buna görə də QHT-lər üçün akkreditasiya prosesi dəyişdirilməli və onların qeydiyyat məsələsinə yenidən baxılmalıdır.
Hesabat ətrafında fikir mübadiləsi aparan iştirakçılar vurğulamışlar ki, qeyri-maddi mədəni irsin qorunmasında iştirakçı dövlətlərlə yanaşı, qeyri-hökumət təşkilatlarının da rolu əvəzsizdir. Bu səbəbdən də QHT-lər üçün meyarlar dəyişdirilməlidir.
Müvafiq sahə üzrə siyahıya salınmış elementin genişləndirilməsi və ya ixtisara salınması proseduru müzakirə edilmiş və sənəd layihələri ("8.COM 14.a" və "8.COM 14.b ") qəbul edilmişdir.
Qərara alınmışdır ki, UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin 9-cu sessiyası 2014-cü il noyabrın 24-dən 28-dək Parisdə keçirilsin.
Dekabrın 7-də sessiya işini davam etdirəcəkdir.
Azərbaycan.-2013.-7 dekabr.-S.6.