Gəncədə sosial infrastruktur layihələri uğurla icra olunur

Qədim Gəncə sürətli inkişafı ilə gələn qonaqları heyran edir. Tikinti-quruculuq, abadlıq işləri bütün şəhəri əhatə edir. Gəncə həyata keçirilən tədbirlər, gerçəkləşdirilən layihələr nəticəsində dəyişə-dəyişə daha da müasirləşir, gözəlləşir. Onu da qeyd edək ki, heç bir yeni layihə Gəncənin milli-memarlıq özəlliyini kölgədə qoymur, əksinə, millilik və müasirlik vəhdətdə təqdim olunur. Buna görə də şəhərin bu cür yenilənməsi sakinlərin də ürəyincədir. Söhbət etdiyimiz gəncəlilər görülən işlərlə bağlı razılıqlarını bildirməklə yanaşı, şəhər icra hakimiyyəti rəhbərliyinin təşəbbüskarlığını da yüksək qiymətləndirirlər.

Gəncədə həyata keçirilən yenidənqurma layihələri tikinti-quruculuq, abadlıq işləri ilə yekunlaşmır. Şəhər əhalisinin həyat səviyyəsinin yüksəldilməsinə, infrastruktur və kommunal xidmətlərin inkişaf etdirilməsinə diqqət artırılır. Elektrik enerjisi, təbii qaz və içməli su təminatının yaxşılaşdırılması üçün gərəkli tədbirlər görülür. Bu tədbirlər sırasında əhali abonentlərinin və digər istehlakçıların normal və təhlükəsiz qaz təchizatı ilə təmin edilməsini, yeni salınmış qəsəbələrin qazlaşdırılmasını, qaz təchizatı şəbəkəsinin əsaslı təmir işlərini qeyd etmək olar.

Qaza olan tələbatın yetərli ödənilməsi üçün ilin əvvəlindən 25 yeni qaztənzimləyici şkaf quraşdırılıb, 7-si isə yenisi ilə əvəz edilib. Şəhərin ayrı-ayrı prospekt və küçələrində 40 min 680 paqonmetr orta təzyiqli, 9 min 411 paqonmetr aşağı təzyiqli, ümumilikdə isə 50 min 91 paqonmetr qaz xətti çəkilib. İşlər indi də davam etdirilir. Əhalinin və digər istehlakçıların standarta uyğun və fasiləsiz təbii qazla təmin edilməsi üçün il başlayandan 28 min 138 paqonmetr əlavə qaz xətti də çəkilib. 30 min 660 paqonmetr uzunluğunda polad borularla çəkilən qaz xətti isə yeni yaradılmış Cavad xan və Məhsəti qəsəbə sakinlərini sevindirib. Digər bir qəsəbədə - Hacıkənddə qazlaşdırma işləri başa çatdırılıb, 142 ailə məişət qazı ilə təmin edilib və hər bir abonent üçün qaz sayğacı quraşdırılıb.

Məlumdur ki, həyətlərdən keçən qaz xətləri həm də təhlükə mənbəyi sayılır. Bu məqsədlə şəhərin Məhsəti qəsəbəsində, həmçinin Qərb küçəsində müvafiq tədbirlər görülərək məhəllədaxili orta təzyiqli qaz xətləri daha təhlükəsiz yerə köçürülüb. Bəzi yaşayış sahələrində isə istismara yararsız qaztənzimləyici şkaf dəyişdirilib və polad borular polietilen borularla əvəz edilib.

Aldığımız məlumata görə, Gəncə Qaz İstismar Sahəsi tərəfindən ilin əvvəlindən 1993 ədəd qaz sayğacı quraşdırılıb. İstehlak olunmuş qaza görə ödəniş də qaydasındadır - 105,5 faiz təşkil edir. Öyrəndik ki, bu göstərici bir əvvəl də belə olub.

Gəncədə əhalinin keyfiyyətli və dayanıqlı elektrik enerjisi ilə təmin edilməsi istiqamətində də müəyyən işlər görülür. "Gəncə Regional Elektrik Şəbəkəsi" MMC tərəfindən yarımstansiyalarda, transformatorlarda təmir işləri davam etdirilir, yeniləri quraşdırılaraq istismara verilir. Elektrik şəbəkəsində aparılan yenidənqurma işləri çərçivəsində dəmir-beton dayaqlar quraşdırılır, yeni "SİP" kabel xətləri çəkilir və bu xətlər yeni dirəklər üzərinə köçürülür. Bütün bu işlər elektrik enerjisi ilə təminatın etibarlılığına da müsbət təsir edib. Onu da qeyd edək ki, ilin əvvəlindən quraşdırılmış 1389 sayğacdan 1313-ü "Smart-kart" tipli sayğacdır.

Gəncə şəhər əhalisinin keyfiyyətli içməli su ilə təminatı və kanalizasiya şəbəkəsinin yenidən qurulması ilə bağlı "Açıq Kommunal İnfrastruktur Proqramı II" çərçivəsində işlər davam edir. Layihəyə uyğun diametri 500 mm, uzunluğu 26,5 km olan Göygöl-Gəncə magistral su kəməri xətti, həmçinin 4 min kubmetrlik su anbarı və diametri 500 mm, uzunluğu 2,2 km olan Qızılqaya-Gəncə magistral su kəməri xətti hazırdır. Diametri 1400 mm, uzunluğu 27 km Şəmkirçay-Gəncə magistral su kəməri xəttinin 24 kilometrlik hissəsində də işlər tamamlanıb.

Məhsəti qəsəbəsində 2 yeni subartezian quyusu qazılıb, istismarda olan əvvəlki quyu isə təmir edilib. Qəsəbədə, həmçinin 60 kubmetrlik su çəni, 38 siyirtmə quraşdırılıb, 20220 paqonmetrə yaxın qəsəbədaxili su xətti çəkilib və 1275 abonent su ilə təmin olunub.

Şəhərin magistral su kəmərlərində və şəhərdaxili su şəbəkəsində boruların dəyişdirilməsi, nasosların quraşdırılması davam edir. Digər cari və əsaslı təmir işləri də görülür.

"Toxuculuq" kombinatı massivində yaşayan sakinlər uzun illər su sarıdan korluq çəkiblər. Nəhayət, burada da subartezian quyusu qazılaraq istifadəyə verilib.

Şəhərin ayrı-ayrı küçələrində su və kanalizasiya xətlərinin çəkilişi və yenidən qurulması davam edir. Mövcud infrastruktur layihələrinin icrası başa çatandan sonra, şübhəsiz ki, gəncəlilərin həyat şəraiti daha da yaxşılaşacaq.

Telman NƏZƏRLİ,

Azərbaycan.-2013.- 8 dekabr.- S.6.