Tarixi və sənəti yaşadan ocaq

Qədim zamanlardan Azərbaycan xalqının zövqünü və istedadını, istəklərini və mübarizəsini özündə yaşadan sənət növlərindən biri də xalçaçılıqdır. Maraqlıdır ki, yurdumuzun hər bölgəsinin öz xalçaları var. Qarabağ, Quba, Şamaxı, Qazax və digər coğrafi məkanlara aid xalçaların müxtəlif çeşniləri nənələrimizin zərif əllərində bəslənə-bəslənə bizim günlərədək gəlib çatmışdır.

İstər ölkəmizin paytaxtında, istərsə də rayonlarında fəaliyyət göstərən xalça muzeyləri bu xəzinəni yaşatmaqla böyük əhəmiyyət daşıyan bir iş görürlər. Xaçmaz Xalça Muzeyi tarixi və sənəti yaşadan belə ocaqlar sırasındadır.

Xaçmaz Xalça Muzeyində yurdumuzun təkcə şimal zonasında deyil, digər bölgələrində də yaranmış çeşnilərdə toxunan əsl sənət nümunələri nümayiş etdirilir. Xalçaya belə ciddi, eyni zamanda, incə münasibətin nəticəsidir ki, bu zonanın qız-gəlinləri indi də xalça toxumağı çox sevirlər.

Azərbaycan.-2013.- 8 dekabr.- S.8.