UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin 8-ci sessiyasının yekunları müzakirə edilmişdir

Dekabrın 10-da Mədəniyyət və Turizm Nazirliyində UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin Bakıda keçirilmiş 8-ci sessiyasının yekunlarına həsr olunmuş iclas keçirilmişdir.

Nazirliyin mətbuat xidmətindən AzərTAc-a bildirmişlər ki, əlaqədar dövlət qurumları və təşkilatlarının nümayəndələrinin iştirak etdikləri iclasda çıxış edən mədəniyyət və turizm naziri Əbülfəs Qarayev belə genişmiqyaslı, beynəlxalq səviyyəli tədbirə ölkəmizin ev sahibliyi etməsinin Azərbaycan Respublikasının Prezidenti İlham Əliyevin rəhbərliyi ilə həyata keçirilən məqsədyönlü siyasətin nəticəsi, ölkəmizin beynəlxalq miqyasda artan nüfuzunun göstəricisi olduğunu diqqətə çatdırmışdır. Bildirmişdir ki, tədbirdən sonra qonaqlar, UNESCO Komitəsi, katiblik sessiyanın çox yüksək səviyyədə təşkil olunduğunu, ölkəmizdə böyük qonaqpərvərliklə qarşılandıqlarını söyləmiş, yüksək səviyyədə təşkilatçılığa görə Azərbaycan Respublikasının rəhbərliyinə təşəkkür etmişlər.

Nazir xüsusi vurğulamışdır ki, Azərbaycanda keçirilən silsilə beynəlxalq tədbirlər ölkəmizi dünyada tolerantlıq və mədəniyyətlərarası dialoq mərkəzinə çevirmişdir.

Qeyd olunmuşdur ki, UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin 8-ci sessiyasında iştirak etmək üçün 793 nəfər qeydiyyatdan keçmişdir. Bu mötəbər beynəlxalq tədbirdə 116 ölkədən 611 nəfər (katibliklə birlikdə) iştirak etmişdir. Ümumilikdə tədbirin iştirakçılarının ümumi sayı (Azərbaycan tərəfi ilə birlikdə) 900-ə yaxın olmuş və budəfəki sessiya UNESCO-nun Qeyri-Maddi Mədəni İrsin Qorunması üzrə Hökumətlərarası Komitənin tarixinə ən çox iştirakçı sayı olan iclas kimi düşmüşdür.

Bildirilmişdir ki, sessiyada Təcili Qorunmaya Ehtiyacı Olan Qeyri-Maddi Mədəni İrs Siyahısına salınmaq üçün 12 nominasiya irəli sürülmüş və cəmi 4 ölkənin - Azərbaycan, Qvatemala, Monqolustan və Uqandanın nominasiyaları siyahıya salınmışdır.

Bəşəriyyətin Qeyri-Maddi Mədəni İrsinin Reprezentativ Siyahısına salınmaq üçün 31 nominasiya irəli sürülmüş və onlardan 25-i qəbul olunmuşdur.

Hökumətlərarası Komitənin Bakı sessiyası, həmçinin təşkilatın Qeyri-Maddi Mədəni İrsin Qorunması üzrə Konvensiyasının 10 illik yubileyinə təsadüf etməsi ilə əlamətdardır.

Sessiya Azərbaycanda internet vasitəsilə onlayn yayımlanan ilk beynəlxalq tədbirdir və gündəlik izləyicilərinin sayı UNESCO Hökumətlərarası Komitəsinin əvvəlki sessiyalarından iki dəfə artıq - gün ərzində 14300 nəfər olmuşdur.

Nazir çıxışında xüsusi olaraq qeyd etmişdir ki, UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin Bakıda keçirilmiş 8-ci sessiyasının ölkəmiz üçün ən mühüm nəticələrindən biri xalqımızın qeyri-maddi mədəni irsində mühüm yeri olan, çövkənin - Azərbaycan Respublikasının ənənəvi Qarabağ atüstü oyununun Təcili Qorunmaya Ehtiyacı Olan Qeyri-Maddi Mədəni İrs Siyahısına daxil edilməsidir.

Sessiyanın ölkəmizin mədəni həyatı, beynəlxalq münasibətləri, o cümlədən UNESCO kimi mötəbər təşkilatla qarşılıqlı səmərəli əməkdaşlığının inkişafı baxımdan mühüm əhəmiyyətini vurğulayan nazir, tədbirin yüksək səviyyədə təşkilində və uğurla həyata keçirilməsində əməyi olan hər kəsə minnətdarlığını bildirmişdir.

Azərbaycan.-2013.-11 dekabr.-S.7.