«Eko Rəsm Gündəliyi-2013» Beynəlxalq müsabiqəsinin

milli mərhələsinin qalib və finalçıları mükafatlandırılmışlar

Dekabrın 10-da Heydər Əliyev Mərkəzində Azərbaycanda ilk dəfə məktəblilər arasında keçirilən "Eko Rəsm Gündəliyi-2013" ("Eco Picture Diary-2013") Beynəlxalq müsabiqəsinin milli mərhələsinin qalib və finalçılarının mükafatlandırılması mərasimi keçirilmişdir.

Bu möhtəşəm müsabiqə əsası Heydər Əliyev Fondunun vitse-prezidenti Leyla xanım Əliyeva tərəfindən qoyulmuş IDEA (International Dialogue for Environmental Action) İctimai Birliyinin təşəbbüsü, UNESCO-nun himayəsi, Heydər Əliyev Mərkəzinin və "Panasonic Marketing MDB"nin (PMCIS) dəstəyi ilə təşkil olunmuşdur.

Tədbirdə IDEA-nın layihə direktoru Anara İsmayılova və Heydər Əliyev Mərkəzinin humanitar və sosial layihələr departamentinin direktoru, professor Vüqar Məmmədov çıxış edərək müsabiqənin əhəmiyyətindən söz açmışlar.

Bildirilmişdir ki, 2008-ci ildən etibarən hər il həyata keçirilən və 50-dən çox ölkəni əhatə edən müsabiqənin məqsədi gənc nəsildə təbiətə sevgi hissinin formalaşdırılması və inkişafı, onlar arasında ekoloji təbliğat işinin gücləndirilməsi və məktəblilərin ətraf mühitin qorunması işinə səfərbər edilməsidir. Ekologiya sahəsində məktəblilərin biliklərinin artırılması və bu istiqamətdə maarifləndirmə işlərinin gücləndirilməsi baxımından bu layihə uğurlu addım kimi dəyərləndirilə bilər.

Ümumilikdə, müsabiqəyə Bakı şəhəri üzrə 314 məktəbdən 2403, Gəncə şəhəri üzrə isə 49 məktəbdən 629 gündəlik daxil olmuşdur. Layihə üçün xüsusi olaraq hazırlanmış, şagird sayına uyğun olaraq orta ümumtəhsil məktəblərinə paylanılmış 5000 ekoloji gündəlikdən 3032-si tam şəkildə doldurularaq təhvil verilmişdir. Bu beynəlxalq müsabiqədə iştirak edən 51 ölkə arasında ən yüksək göstərici hesab oluna bilər. Müsabiqədə aşağı yaş qrupu (6-11) üzrə 1299, yuxarı (12-15) yaş qrupu üzrə isə 1733 şagird iştirak etmişdir.

Layihənin milli turunun iştirakçıları olmuş məktəblilər müəyyən edilmiş müddət ərzində yarışma üçün hazırlanmış xüsusi "Gündəlik"lərdə mövcud qlobal ekoloji problemləri və ətraf mühitin qorunmasının vacibliyini əks etdirən rəsmlər çəkmiş və onların ideyalarının qısa təsvirini əks etdirən mətnlər əlavə etmişlər.

Diqqətə çatdırılmışdır ki, IDEA bundan sonra da uğurlu layihələrin reallaşdırılmasına öz dəstəyini verəcəkdir.

Vurğulanmışdır ki, Bakı və Gəncə şəhərlərini əhatə edən 363 məktəbin qoşulduğu beynəlxalq layihənin milli müsabiqə turunun final mərhələsinin qalibi Bakı Avropa liseyinin şagirdi, 11 yaşlı Fuad Soltanov olmuşdur. O, anası ilə birlikdə Parisdə beynəlxalq müsabiqənin qaliblərinin mükafatlandırılması mərasimində Azərbaycanı təmsil etmişdir.

Tədbirdə IDEA tərəfindən hazırlanmış videoçarx nümayiş olunmuşdur. Videoçarxda müsabiqənin qalibləri haqqında dolğun məlumatlar öz əksini tapmışdır.

Təqdimat mərasimində Yaponiyanın ölkəmizdəki səfiri Tsuquo Takahaşi və PMCIS-in direktoru Koji Taracima çıxış edərək müsabiqənin əhəmiyyətindən söz açmış və məktəblilərin ekoloji problemlərin həllinə yeni yanaşmalarını müsbət dəyərləndirmişlər.

Mərasimdə PMCIS-in nümayəndəsi təqdimatla çıxış etmişdir.

Sonra münsiflər heyətinin qərarı ilə milli qalib seçilmiş Fuad Soltanova, eləcə də 19 finalçıya sertifikat və qiymətli hədiyyələr təqdim olunmuşdur.

Müsabiqənin finalçıları arasında Bakı şəhərindən Zərifə Əliyeva adına lisey, "Ankara məktəbi" məktəb-liseyi, İncəsənət Gimnaziyası, 59, 99, 262, 271, 276, 290, 28, 98, 132-134, 301, 304 nömrəli, Gəncə şəhərindən isə 4, 28, 11, 25 nömrəli orta ümumtəhsil məktəblərinin şagirdləri yer almışlar.

Münsiflər heyəti adından bütün qalibləri təbrik edən Azərbaycan Milli Elmlər Akademiyasının Zoologiya İnstitutunun şöbə müdiri Elman Yusifov onlara yeni-yeni uğurlar arzulamışdır.

Sonda müsabiqənin milli mərhələsinin qalib və finalçıları Heydər Əliyev Mərkəzi ilə yaxından tanış olmuşlar.

AzərTAc

Azərbaycan.-2013.-11 dekabr.-S.7.