Moskvada «Heydər Əliyev: Şəxsiyyət və zaman»

roman-tədqiqatının təqdimat mərasimi keçirilmişdir

Moskvada, M.İ.Rudomino adına Ümumrusiya Dövlət Xarici Ədəbiyyat Kitabxanasında yazıçı-publisist, Azərbaycan Milli Məclisinin deputatı Elmira Axundovanın "Heydər Əliyev: Şəxsiyyət və zaman" roman-tədqiqatının V və VI cildlərinin təqdimat mərasimi keçirilmişdir.

Bu çoxcildlik arxiv materialları və rəsmi sənədlər, Azərbaycan xalqının ümummilli lideri Heydər Əliyevin dostları, qohumları və məsləkdaşları ilə müəllifin yüzlərlə müsahibəsi əsasında yazılmışdır. 2012-ci ilin sonunda tamamlanmış roman-tədqiqat həm Azərbaycanda, həm də respublikanın hüdudlarından kənarda oxucular arasında böyük əks-səda doğurmuşdur.

Təqdimat mərasimi Azərbaycanın Rusiyadakı səfirliyi, Heydər Əliyev Fondunun Rusiyadakı nümayəndəliyi və Ümumrusiya Azərbaycanlılar Konqresi tərəfindən təşkil edilmişdir.

Heydər Əliyev Fondunun Rusiyadakı nümayəndəliyi tərəfindən kitabxananın foyesində təşkil olunmuş, Azərbaycan xalqının ümummilli lideri Heydər Əliyevə həsr edilmiş fotosərgi təqdimat mərasiminin iştirakçılarının böyük marağına səbəb olmuşdur.

Çoxcildliyin müəllifi Elmira Axundova tədbiri açaraq qeyd etmişdir ki, Azərbaycan Respublikası Prezidenti yanında Qeyri-Hökumət Təşkilatlarına Dəstək Fondu bu il may ayında Heydər Əliyev haqqında ən yaxşı publisistik əsər üçün beynəlxalq müsabiqə təşkil etmişdir.

Gecədə həmin beynəlxalq müsabiqənin qaliblərinə - "Heydər Əliyev. İnsan-epoxa" məqaləsinin müəllifi Oleq Kuznetsova, "Öz ölkəsini xilas etmiş insan" məqaləsinin müəllifi Valeri Calaqoniyaya və "Qorxu bilməyən insan" məqaləsinin müəllifi Aleksandr Budberqə Heydər Əliyev haqqında ən yaxşı publisistik əsər üçün mükafatlar təqdim edilmişdir.

Sonra Azərbaycanın Rusiyadakı səfiri Polad Bülbüloğlu çıxış etmişdir. Səfir vurğulamışdır ki, Elmira Axundovanın kitabları yeni, qeyri-adi janrda yazılmışdır. P.Bülbüloğlu demişdir: "Əlbəttə, Heydər Əliyev o qədər hərtərəfli, görkəmli şəxsiyyətdir ki, onun haqqında hələ cild-cild əsərlər yazılacaq, filmlər çəkiləcək, müxtəlif janrlı pyeslər tamaşaya qoyulacaqdır".

Fəlsəfə elmləri doktoru, professor Konstantin Dolqov ulu öndər Heydər Əliyev haqqında xatirələrini söyləmişdir. K.Dolqovun sözlərinə görə, azərbaycanlılar dünyada ən qabiliyyətli, istedadlı, heyrətamiz dərəcədə xeyirxah və səmimi xalqlardan biridir. Bu xalqın tarixində ən müxtəlif sahələrdə çox dəyərli xidmətlər göstərmiş görkəmli insanlar çox olmuşdur. Azərbaycan xalqının görkəmli şəxsiyyətlərindən biri də Heydər Əliyevdir. K.Dolqov bu dahi siyasi xadimi xatırlayaraq demişdir: "Əsl şəxsiyyət mahiyyət etibarilə sərhədsiz olur. Heydər Əliyev məhz bu cür şəxsiyyət idi. Onun həyat və fəaliyyəti haqqında burada təqdim olunan çoxcildlik nəşr Azərbaycan xalqının bu böyük oğluna ən yaxşı abidələrdən biridir".

Milli Məclisin deputatı Arif Rəhimzadənin sözlərinə görə, Elmira Axundovanın kitabları Heydər Əliyevlə işləmiş çoxsaylı insanların müsahibələri əsasında tərtib edilmişdir. Buna baxmayaraq, onun əsərləri fraqmentar xarakter daşımır. A.Rəhimzadə demişdir: "Elmira Axundovanın kitabları Heydər Əliyevin həyat və fəaliyyəti haqqında dolğun mənzərə yaradır. Elmira Axundova Heydər Əliyevin xatirəsinin əbədiləşdirilməsinə çox böyük töhfə vermişdir".

Moskva Dövlət Beynəlxalq Münasibətlər Universitetinin professoru, 1990-cı illərin əvvəllərində Rusiyanın Azərbaycandakı səfirliyində işləmiş Stanislav Çernyavski ulu öndər Heydər Əliyevin Azərbaycan rəhbərliyinə qayıdış dövrü haqqında söhbət açmışdır. S.Çernyavski demişdir: "Heydər Əliyev hərtərəfli şəxsiyyətdir və yaxşı ki, bu şəxsiyyətin həyat və fəaliyyətini Elmira Axundova qələmə almışdır".

Jurnalist Valeri Calaqoniya demişdir: "Mənə bir neçə il Heydər Əliyevlə işləmək, ölkə daxilində və xaricdə səfərlərində onu müşayiət etmək xoşbəxtliyi nəsib olmuşdur. Bu, Sovet İttifaqının dərin tənəzzülü dövrü idi. Heydər Əliyev öz işində fəth olunmalı zirvələri müəyyən etmək və irəliyə doğru hərəkət etmək üçün fədakarcasına səy göstərirdi".

Çoxcildliyin müəllifi Elmira Axundova təqdimat mərasiminin təşkilatçılarına və iştirakçılarına təşəkkürünü bildirərək demişdir: "Artıq 10 ildir ki, mən öz qəhrəmanımla daxili monoloq aparıram. Öz hisslərimi və duyğularımı xəyalən onunla razılaşdırıram. Ona necə böyük ehtiyacım olduğunu hər gün, hər il hiss edirəm. Heydər Əliyev gözəl insan idi".

Tədbirdə Milli Məclisin deputatları, Azərbaycanın Rusiyadakı səfirliyinin, Heydər Əliyev Fondunun Rusiyadakı nümayəndəliyinin, Ümumrusiya Azərbaycanlılar Konqresinin, Rusiya Azərbaycanlı Gənclər Birliyinin və Rusiya ictimaiyyətinin nümayəndələri iştirak edirdi.

AzərTAc

Azərbaycan.-2013.-13 dekabr.-S.5.