İslam Əməkdaşlıq Təşkilatının
Xarici İşlər Nazirləri
Şurası Xocalı faciəsini
soyqırımı aktı
kimi tanıdığını
bir daha bəyan etmişdir
Xəbər verdiyimiz kimi, dekabrın 9-11-də Qvineyanın
paytaxtı Konakridə
57 ölkənin üzv
olduğu İslam Əməkdaşlıq Təşkilatı
Xarici İşlər
Nazirləri Şurasının
(İƏT XİNŞ) 40-cı sessiyası
keçirilmişdir.
İƏT-lə sıx əməkdaşlıq edən
Dialoq və Əməkdaşlıq Uğrunda
İslam Konfransı Gənclər Forumu da (DƏ-İKGF) sessiyada təmsil olunmuşdur.
DƏ-İKGF
tərəfindən sessiyaya
Xocalı faciəsini soyqırımı aktı
kimi tanımaq barədə qətnamə
layihəsi təqdim edilmişdir.
Forumun İstanbulda yerləşən
baş qərargahından
bildirmişlər ki,
İƏT XİNŞ həmin qətnaməni qəbul etməklə Xocalı faciəsini soyqırımı
aktı kimi tanıdığını bir
daha bəyan etmişdir.
DƏ-İKGF
nümayəndə heyətinin
rəhbəri kimi sessiyada iştirak edən Elməddin Mehdiyev bildirmişdir ki, forum tərəfindən
təqdim edilən qətnamə layihəsində
DƏ-İKGF-nin mədəniyyətlərarası
dialoq üzrə baş əlaqələndiricisi
Leyla Əliyevanın təşəbbüsü ilə
həyata keçirilən
"Xocalıya ədalət"
kampaniyasına dair xüsusi bənd yer almışdır. Həmin bənddə deyilir: "İƏT
XİNŞ "Xocalıya ədalət" beynəlxalq məlumat
kampaniyasını alqışlayır və üzv
dövlətlərdən bu
soyqırımı aktını milli və
beynəlxalq səviyyədə insanlığa qarşı
cinayət kimi tanınması üçün kampaniyanın işində fəal
iştirak etməyə və lazımi səylər
göstərməyə çağırır".
E.Mehdiyev qeyd etmişdir ki, kampaniya çərçivəsində
DƏ-İKGF-nin apardığı
iş nəticəsində
ilk dəfə olaraq Xocalı faciəsi
İƏT Parlamentlər İttifaqı
tərəfindən insanlığa
qarşı cinayət
və soyqırımı
aktı kimi tanınmışdır. İƏT XİNŞ isə
faciəni soyqırımı aktı kimi ilk dəfə 2012-ci ilin
noyabrında Cibutidə keçirilən 39-cu sessiyasında
tanımışdır. Görülən
işlərin nəticəsində 2013-cü ilin
fevralında Qahirədə keçirilən İƏT-in ali orqanı olan dövlət
başçılarının zirvə görüşündə
Xocalı faciəsi insanlığa qarşı cinayət və
soyqırımı aktı kimi
tanınmışdır.
Sözügedən qətnamədə həmçinin
DƏ-İKGF tərəfindən həyata keçirilən
"Dünyanı dəyişə
biləcək 10 gənc
müsəlman" beynəlxalq
mükafat layihəsi alqışlanmış və
üzv dövlətlər
bu sahədə
DƏ-İKGF ilə əməkdaşlıq
etməyə çağırılmışdır.
Həmin
mükafat layihəsinə 2011-ci ilin noyabrında Bakıda DƏ-İKGF-nin və
Azərbaycan hökumətinin birgə təşkil etdiyi İslam Əməkdaşlıq
Təşkilatı Gənc Sahibkarlar Şəbəkəsinin
(ICYEN) təsis konfransı zamanı start verilmişdir və ilk
mükafatlandırma mərasiminin beynəlxalq səviyyədə
təşkil edilməsi qərara alınmışdır. İƏT XİNŞ-in 40-cı sessiyasında
DƏ-İKGF-yə 2014-cü ildə İƏT ölkələri
gənclər və idman nazirlərinin
konfransını təşkil etmək həvalə olunmuşdur.
AzərTAc
Azərbaycan.-2013.-13
dekabr.-S.7.