Ekologiya və təbii sərvətlər naziri Yevlaxda vətəndaşları qəbul etmişdir

Dekabrın 13-də Ekologiya və təbii sərvətlər naziri Hüseynqulu Bağırov Yevlax şəhərindəki Heydər Əliyev Mərkəzində Yevlax, Ucar, Kürdəmir, Ağdaş, Göyçay, Mingəçevir, Şamaxı, Qobustan və Ağsudan olan vətəndaşları qəbul etmişdir.

Nazirliyin idarə və departamentlərinin, həmçinin tabeli qurumlarının rəhbərlərinin iştirak etdikləri qəbulda 40-a qədər vətəndaşın müraciətinə baxılmışdır. Vətəndaşlar əsasən meşələrin qorunması, ətraf mühitin və ekoloji tarazlığın mühafizəsi, biomüxtəliflik, hidrometeorologiya, geologiya, ətraf mühitin monitorinqi və sair məsələlərlə bağlı müraciət etmişlər.

Qəbulda vətəndaşları narahat edən məsələlərin bir qismi elə yerindəcə həllini tapmış, digərlərinin isə həll edilməsi ilə bağlı nazirliyin aidiyyəti qurumlarının rəhbərlərinə müvafiq tapşırıqlar verilmişdir. Nazirliyin strukturuna aid olmayan digər müraciətlər isə müvafiq qurumlara çatdırılması üçün qeydiyyata alınmışdır.

Vətəndaşlar göstərilən diqqət və qayğıya görə dövlətimizin başçısına minnətdarlıqlarını bildirmişlər.

Azərbaycan.-2013.-14 dekabr.-S.3.