Xarici ölkələrdə
ümummilli lider Heydər Əliyevin vəfatının
onuncu ildönümü ilə əlaqədar
anım mərasimləri keçirilmişdir
Moskva
Dekabrın
12-də Azərbaycanın Rusiyadakı səfirliyində Heydər
Əliyevin xatirə gününə həsr edilmiş tədbir
keçirilmişdir.
Əvvəlcə
səfirliyin binasında Heydər Əliyevin barelyefi
önünə əklil qoyulmuş, onun xatirəsi bir dəqiqə
sükutla yad edilmişdir.
Azərbaycanın
Rusiyadakı səfiri Polad Bülbüloğlu tədbiri
açaraq Heydər Əliyev şəxsiyyətinin
miqyasını və unikallığını, Azərbaycanın
təşəkkülünə və inkişafına verdiyi
böyük töhfəni, dünya miqyasında Heydər
Əliyevin nüfuzunu, ölkənin milli mənafelərinin
qorunmasında məqsədyönlü mövqeyini, yüksək
insani keyfiyyətlərini qeyd etmişdir.
Səfir
demişdir: "Tale elə gətirdi ki, Heydər Əliyevi
İttifaq rəhbərliyi gözdən saldı, o,
ağır xəstəlikdən sonra öz kiçik vətəni
Naxçıvana qayıtdı. Doğma torpaqdan güc alan Heydər Əliyev
sonradan suveren Azərbaycanın Prezidenti oldu. Bunu xalq,
ziyalılar təkidlə xahiş etdi, çünki o
dövrdə Azərbaycan vətəndaş müharibəsi həddində
idi, qardaş-qardaşın üstünə silah
qaldırırdı. Heydər Əliyev bu cür ağır məqamda,
hadisələrin axarı suveren Azərbaycanın
dağılmasına yönəldiyi bir vaxtda hakimiyyətə
gəldi və onun nüfuzu, bacarığı, təcrübəsi
sayəsində Azərbaycan qısa bir vaxtda inkişaf yoluna qədəm
qoydu".
Səfir
vurğulamışdır ki, ulu öndərin işini
hazırda Azərbaycan Prezidenti İlham Əliyev qətiyyət
və ləyaqətlə davam etdirir. Diplomat demişdir: "Heydər
Əliyevin oğlu atasının ən yaxşı keyfiyyətlərini
- əla yaddaş, natiqlik qabiliyyəti, bütün hadisələri
və onların tarixlərini xatırlamaq, çevik və
düzgün qərar qəbul etmək xüsusiyyətlərini
mənimsəmişdir. Bu gün Azərbaycan əsası Heydər
Əliyev tərəfindən qoyulmuş ənənələr
üzrə inkişaf edir".
Ona Heydər
Əliyevin rəhbərliyi ilə işləmək xoşbəxtliyi
nəsib olduğunu vurğulayan səfir ulu öndərlə
görüşləri haqda xatirələrini bölüşərək
demişdir: "Elmira Axundovanın kitabında mənim
"Dünyanın heç bir universitetində verilməyən
diplom. 10 il Heydər
Əliyevlə yanaşı" adlı məqaləm də
var. Bu, həqiqətən böyük məktəb idi".
Sonra Qafqaz
Müsəlmanları İdarəsi sədrinin müavini
hacı Fuad Nurullayev müqəddəs Qurani-Kərimdən surələr
oxumuşdur.
Rusiya
Federal Məclisinin Federasiya Şurası sədrinin müavini
İlyas Umaxanov qeyd etmişdir ki, bu gün həm hüzn
günü, həm də Azərbaycanın hüdudlarından
çox-çox uzaqlarda da tanınmış dahi insanın, əfsanəvi
şəxsiyyətin möhtəşəmliyinin
xatırlandığı gündür. Heydər Əliyev öz
dahiyanə qərarları ilə yadda qalmışdır. Bu qərarlar
sayəsində Azərbaycan dünyada ən qabaqcıl, dinamik
inkişaf edən ölkələrdən birinə
çevrilmişdir. Heydər Əliyev yaddaşlarda Azərbaycan
cəmiyyətində sülhü, sabitliyi və həmrəyliyi
bərpa etmiş siyasətçi kimi qalmışdır.
İlyas Umaxanov demişdir: "Mənə Heydər
Əliyevlə dəfələrlə görüşmək nəsib
olmuşdur. Mən rəhmətlik atamla onun
görüşünün şahidiyəm. Bu böyük
insanın işlərini onun oğlu - Prezident İlham Heydər
oğlu Əliyevin necə uğurla davam etdirdiyini bilirəm.
İlham Əliyev növbəti prezident seçkilərində
parlaq qələbə qazandı. Fürsətdən istifadə
edib Azərbaycan Prezidentini təbrik etmək, İlham Heydər
oğlunun öz fəaliyyətində, fikirlərində və
işlərində atasının böyük
amallarını layiqli bir varis kimi davam etdirəcəyinə əmin
olduğumu bildirmək istəyirəm. Bu gün həqiqi
dostlarınız sizin yanınızdadır və mənə
Heydər Əliyevin xatirəsini Azərbaycan səfirliyində
ehtiramla yad etmək imkanı verilmişdir".
Rusiya
Prezidentinin səlahiyyətli nümayəndəsi Aleksandr
Beqlov Bakıda keçmiş uşaqlıq illəri
haqqında xatirələrini bölüşərək qeyd
etmişdir ki, Azərbaycan həmişə beynəlmiləl
ölkə olmuşdur. Burada bütün millətlərin nümayəndələri
həmişə dost kimi yaşamışlar. A.Beqlov Heydər
Əliyevlə görüşlərini xatırlayaraq
demişdir: "Heydər Əliyev ədalətli adam idi, ona
görə də bu qədər yüksək zirvələrə
çatmışdır. Hər hansı hakimiyyətdə ən
başlıca məsələ ədalətli olmaqdır. Heydər
Əliyev müharibənin bərbad vəziyyətə
saldığı ölkəsinə qayıdanda xalq ona
inandı, çünki o, genetik mənada ədalətli insan
idi. O, bütün hərəkətlərində ədalətlilik
prinsipini üstün tuturdu. Hesab edirəm ki, biz hamımız
bu insandan nümunə götürməliyik.
Rusiyanın
əməkdar rəssamı Nikas Safronov ulu öndərlə
ilk görüşünü, Heydər Əliyevin portreti
üçün eskiz çəkməsini
xatırlamışdır. O, portretin eskizini səfirliyə hədiyyə
edərək demişdir: "Mən Heydər Əliyevin sayəsində
Azərbaycanı özüm üçün kəşf
etdim. Mən bu rəsmi Azərbaycan Prezidenti İlham Əliyevə
hədiyyə etmək və bildirmək istəyirəm ki,
Rusiyada Heydər Əliyevi həmişə xatırlayır və
sevirlər".
Tədbirin rəsmi hissəsi başa çatandan sonra ehsan verilmişdir.
Vaşinqton
Azərbaycan
xalqının ümummilli lideri Heydər Əliyevin vəfatının
onuncu ildönümü ilə əlaqədar onun əziz xatirəsi
ABŞ-ın paytaxtı Vaşinqton şəhərində də
anılmışdır.
Azərbaycan
Respublikasının ABŞ-dakı səfirliyinin inzibati
binasında - ümummilli liderin büstü önündə
baş tutmuş anma mərasimində müasir Azərbaycan
dövlətinin memarı və qurucusu Heydər Əliyevin
keçdiyi zəngin və şərəfli həyat yoluna nəzər
salınmış, Azərbaycan dövlətçiliyi və
xalqımızın rifahı naminə gördüyü
misilsiz işlər minnətdarlıq hissi ilə xatırlanmışdır.
Mərasim
iştirakçıları qarşısında
çıxış edən səfir Elin Süleymanov əbədiyaşar
lider Heydər Əliyevin Azərbaycana rəhbərlik etdiyi
müxtəlif dönəmlərdə verdiyi taleyüklü qərarlar
və atdığı tarixi addımlar haqqında söz
açaraq onun Azərbaycan xalqına qoyub getdiyi ən
böyük mirasın məhz müasir, müstəqil və
suveren Azərbaycan dövlətinin olduğunu bəyan
etmişdir. Diplomat sonrakı nəsillərin ümdə vəzifəsinin
son dərəcə dəyərli mirası qoruyub saxlamaq
olduğunu demişdir. O həmçinin şəxsi xatirələrini
bölüşərək bu dahi şəxsiyyətlə təmasda
olduğu hər bir anı böyük qürurla
xatırladığını söyləmişdir.
Səfir
Süleymanov həmçinin ümummilli liderin cismən
aramızda olmadığı son 10 ildə onun ən layiqli
davamçısı Prezident İlham Əliyevin
yürütdüyü qətiyyətli siyasət sayəsində
Azərbaycan dövlətçiliyinin daha da gücləndiyini,
xalqımızın inanılmaz tərəqqiyə şahid
olduğunu və Azərbaycanın malik olduğu geosiyasi
qüdrətin real gücə arxalandığını qeyd
etmişdir.
Azərbaycanın ABŞ-dakı hərbi
attaşesi, polkovnik Ağaverdi Quliyev milli ordumuzun
yaradılması, xüsusilə ulu öndər Heydər
Əliyevin uzaqgörən siyasəti nəticəsində hələ
sovet dövründən etibarən hərbi kadrların
hazırlanması sahəsində əldə olunmuş
uğurlar barədə danışmışdır.
ABŞ-dakı
Azərbaycan icmasının təmsilçisi Həbib Azərsina
ümummilli lider Heydər Əliyev ilə şəxsi təmaslarına
istinadla qəlbində yaşatdığı xatirələri
təbdir iştirakçıları ilə
bölüşmüşdür. O, Azərbaycan
xalqının həmişə Heydər Əliyev kimi qüdrətli
dövlət xadiminə malik olmasından qürur hissi
keçirdiyini bildirmiş və onun əziz xatirəsinin Azərbaycanda,
eləcə də ölkəmizin hüdudlarından kənarda
daim dərin hörmətlə anılacağını
bildirmişdir.
Azərbaycan
xalqının ümummilli lideri Heydər Əliyevin xatirəsini
anma günü çərçivəsində, həmçinin
Merilend ştatının ən böyük xeyriyyəçilik
təşkilatı olan və yoxsulları qida ilə təchiz
edən Merilend Qida Bankına ianə verilmişdir. Qida
Bankının hökumətlə əlaqələr üzrə
direktoru Nensi Smitə Azərbaycanın ABŞ-dakı səfirliyi
tərəfindən təqdim olunmuş rəsmi məktubda bu
xeyriyyəçilik aktının Azərbaycan xalqının
ümummilli lideri Heydər Əliyevin xatirəsi ilə əlaqədar
həyata keçirilməsinin təsadüfi
olmadığı qeyd edilərək ulu öndərin sosial vəziyyəti
çətin olan təbəqələrə daim böyük
qayğı göstərdiyi bildirilmişdir.
N.Smit Azərbaycan
hökumətinə təmsil etdiyi təşkilat adından dərin
minnətdarlığını ifadə edərək bu
addımın çox yüksək qiymətləndirildiyini
söyləmişdir. Nəhayət, səfirliyin müraciəti
əsasında Vaşinqton şəhərində yerləşən
İslam Mərkəzində ulu öndər Heydər
Əliyevin ruhuna dualar oxunmuş və Allahdan rəhmət dilənmişdir.
Cümə
günü isə səfirlik tərəfindən İslam Mərkəzində
cümə namazının ardınca ehsan verilmişdir.
Ankara
Azərbaycanın
Türkiyədəki səfirliyi ulu öndər Heydər
Əliyevin vəfatının onuncu ildönümü ilə əlaqədar
Ankarada anım tədbirləri keçirmişdir.
Türkiyə
paytaxtında Heydər Əliyevin adını daşıyan
parka gələn səfirliyin əməkdaşları, tələbə
və müdavimlər ulu öndərin abidəsinin
önünə əklil və çiçəklər
qoymuş, əziz xatirəsini bir dəqiqəlik sükutla yad
etmişlər.
Ankaradakı
"Ramada Plaza" hotelində ümummilli liderin ruhuna ehsan
verilmişdir.
Hakim
Ədalət və İnkişaf Partiyasının sədr
müavini Mehmet Necati Çetinkaya, millət vəkilləri
Əli Özgündüz və Sinan Oğan, sabiq mədəniyyət
və turizm naziri Ərtoğrul Günay, TÜRKSOY-un baş
katibi Düsen Kaseinov, Ankarada akkreditə olunmuş diplomatik
nümayəndəliklərin rəhbərləri və təmsilçiləri,
burada təhsil alan müdavim və tələbələrimiz,
tanınmış elm və mədəniyyət xadimləri,
diaspor və mətbuat nümayəndələri tədbirdə
iştirak etmişlər.
Salona toplaşanlar Azərbaycan və
Türkiyə respublikalarının baniləri Mustafa Kamal Atatürkün və
Heydər Əliyev xatirələrini bir dəqiqəlik
sükutla yad etmişlər.
Azərbaycanın
və Türkiyənin dövlət himnləri səslənmişdir.
Səfir
Faiq Bağırovun, Türkiyə-Azərbaycan parlamentlərarası
dostluq qrupunun üzvləri Əli Özgündüz və
Sinan Oğanın, Bilkent Universitetinin professoru Əmrulla Məmmədovun, tələbələrin
və polis akademiyasında təhsil alan gənclərimizin
çıxışlarında Heydər Əliyevin
xilaskarlıq missiyası, Türkiyə-Azərbaycan əlaqələrinin
möhkəmlənməsi, türk dünyasının həmrəyliyi
istiqamətində gərgin səylərindən və misilsiz
xidmətlərindən geniş şəkildə söz
açılmışdır. Natiqlər
vurğulamışlar ki, Türkiyənin şəhər və
qəsəbələrində türk dünyasının dahi
şəxsiyyətinin xatirəsinə ucaldılmış
heykəllər, onun adına verilmiş prospekt və parklar
qardaş ölkədə Heydər Əliyevə olan yüksək
ehtiramın təzahürüdür.
Ümummilli
liderin zəngin və mənalı həyat və fəaliyyətindən,
eləcə də qardaş Türkiyə ilə olan
münasibətlərimizin inkişafındakı müstəsna
rolundan bəhs edən sənədli film nümayiş
etdirilmişdir.
Tədbir
iştirakçılarına xalq artisti Arif Məlikovun ulu
öndərə həsr etdiyi "Əbədiyyət"
adlı 8-ci simfoniyasının diski hədiyyə
edilmişdir.
Ulu öndər
Heydər Əliyevin vəfatının
onuncu ildönümü ilə əlaqədar Azərbaycanın
Türkiyədəki səfirliyinin təşkilatçılığı
ilə Türkiyədəki Balıkesir, Fırat,
İnönü, Qafqaz, Ərdahan və Bilkent universitetlərində
konfranslar, İğdır şəhərindəki Heydər
Əliyev məktəbində "Heydər Əliyev və Azərbaycan-Türkiyə
dostluğu" mövzusunda inşa yazı müsabiqəsi
keçirilmişdir.
Sankt-Peterburq
Dekabrın
12-də Sankt-Peterburqda Azərbaycan
xalqının ümummilli lideri Heydər Əliyevin 1949-1950-ci
illərdə SSRİ Dövlət Təhlükəsizliyi
Komitəsinin Ali məktəbində təhsil aldığı
Qoroxova küçəsindəki 6 nömrəli binanın
qarşısında onun xatirəsi yad edilmişdir.
Azərbaycan
Respublikasının Sankt-Peterburqdakı baş konsulluğunun
mətbuat xidmətindən bildirmişlər ki, tədbirdə
Azərbaycan Respublikasının Sankt-Peterburqdakı baş
konsulluğunun əməkdaşları,
"Naxçıvan" Azərbaycanlıların Dostları
Cəmiyyətinin nümayəndələri, habelə
Sankt-Peterburq şəhərinin Azərbaycan diasporunun fəal
üzvləri iştirak etmişlər.
Çıxış
edənlər Heydər Əliyevin
xaricdə yaşayan azərbaycanlılara
böyük diqqət yetirdiyini və dünyanın müxtəlif
ölkələrində yaşayan Azərbaycan diasporu
nümayəndələrinin sıx birləşməsində
mühüm rolunu qeyd etmişlər.
Azərbaycan
Respublikasının Sankt-Peterburqdakı baş konsulu Elşad
Qulamov iştirakçılara
Heydər Əliyevin düşünülmüş, məqsədyönlü
fəaliyyətindən və ümummilli liderin müdrik rəhbərliyi
altında Azərbaycanın müstəqil dövlətə
çevrilməsindən danışmışdır.
"Naxçıvan"
Azərbaycanlıların Dostları Cəmiyyətinin sədri
İdris Qəhrəmanov xaricdə yaşayan azərbaycanlıların
Heydər Əliyevin müəllifi olduğu azərbaycançılıq
ideyası ətrafında birləşməsinin vacibliyini
bildirmişdir.
Sankt-Peterburqda
keçirilən "Azərbaycan xalçaları" sərgisinin
iştirakçısı, Azərbaycan Respublikası Mədəniyyət
və Turizm Nazirliyinin Mədəniyyətşünaslıq
üzrə Elmi-Metodik Mərkəzinin direktoru Vilayət
İsmayılov qeyd etmişdir ki, Heydər Əliyev müasir
Azərbaycanın banisidir, respublikamızın dinamik
inkişafı bilavasitə onun adı ilə
bağlıdır.
Tədbirin
sonunda Azərbaycan xalqının ümummilli liderinin barelyefi
önünə tər çiçəklər
düzülmüşdür.
Belqrad
Dekabrın
12-də Serbiyanın paytaxtı Belqradda ümummilli lider Heydər
Əliyevin vəfatının onuncu ildönümü ilə əlaqədar
anım mərasimi keçirilmişdir.
Tədbirdə
Azərbaycan səfirliyinin əməkdaşları, bu ölkənin
dövlət rəsmiləri, deputatları, müsəlman
icmasının nümayəndələri, Belqradda fəaliyyət
göstərən Azərbaycan Mədəniyyət Mərkəzinin
və Serbiya-Azərbaycan Ticarət Palatasının üzvləri,
KİV-lərin təmsilçiləri və başqaları
iştirak etmişlər.
Tədbir
iştirakçıları əvvəlcə
"Taşmaydan" parkına gələrək görkəmli
dövlət xadimi Heydər Əliyevin heykəli önünə
gül-çiçək dəstələri qoymuş və
ulu öndərin xatirəsini bir dəqiqəlik sükutla yad
etmişlər.
Sonra
iştirakçılar görkəmli serb
yazıçısı Milorad Paviçin həmin parkdakı
heykəlini və 1999-cu ildə Belqrad şəhərinin
bombalanması zamanı parkda həlak olmuş uşaqların
xatirəsinə ucaldılmış "Biz sadəcə
uşaqlar idik" abidəsini ziyarət etmişlər.
Azərbaycanın
Serbiyadakı səfirliyində davam etdirilən tədbirdə
ümummilli lider Heydər Əliyevin həyat və fəaliyyətindən
bəhs edilmişdir. Qeyd edilmişdir ki, ölkəmizin
müstəqilliyinin möhkəmləndirilməsində,
demokratik, hüquqi, dünyəvi dövlət quruculuğunda,
Azərbaycan Respublikasının Konstitusiyasının qəbulunda
və beynəlxalq əhəmiyyət kəsb edən neft
strategiyasının işlənib hazırlanmasında ulu
öndərin misilsiz xidmətləri olmuşdur. Diqqətə
çatdırılmışdır ki, Azərbaycanda sabitliyin
bərqərar edilməsi, xalqımızın qədim
tarixinin və zəngin mədəni irsinin beynəlxalq aləmdə
tanıdılması, eləcə də Azərbaycan elminin
inkişafı ümummilli liderin adı ilə
bağlıdır.
Sonda ulu
öndər Heydər Əliyevin həyat və fəaliyyətindən
bəhs edən sənədli film nümayiş olunmuşdur.
Stokholm
Stokholmda Azərbaycan
xalqının ümummilli lideri Heydər Əliyevin xatirəsinə
həsr edilmiş anım mərasimi keçirilmişdir.
Azərbaycanın
İsveçdəki səfirliyinin təşkil etdiyi mərasimdə
Türkiyənin bu ölkədəki səfirliyinin əməkdaşları,
Azərbaycan və türk diaspor təşkilatlarının rəhbərləri,
Stokholmda yaşayan soydaşlarımız və şəhər
ictimaiyyətinin nümayəndələri iştirak etmişlər.
Azərbaycanın
İsveçdəki səfiri Adış Məmmədov mərasimi
açaraq ulu öndərin şərəfli həyat yolu və
zəngin dövlətçilik fəaliyyəti ilə
bağlı geniş məlumat vermişdir. Ümummilli liderin
müasir müstəqil Azərbaycanın memarı və
qurucusu kimi titanik fəaliyyətindən danışan səfir
demişdir ki, ulu öndər böyük dövlət xadimi
kimi təkcə bu günün deyil, sabahın qüdrətli
Azərbaycanının inkişaf istiqamətlərini müəyyənləşdirmişdir.
Bildirilmişdir
ki, Heydər Əliyev ucalığının əsasında
Azərbaycan xalqına olan sonsuz və təmənnasız məhəbbəti
dayanır.
Sonra mərasimdə
Qurani-Kərimdən ayələr oxunmuş, ehsan süfrəsi
açılmışdır.
London
Azərbaycanın
Böyük Britaniyadakı səfirliyində ümummilli lider
Heydər Əliyevin xatirəsinə həsr olunmuş anım
mərasimi keçirilmişdir.
Tədbirdə
Azərbaycanın Böyük Britaniyadakı səfirliyinin, eləcə
də səfirliyin nəzdindəki hərbi attaşe
aparatının əməkdaşları, diaspor təşkilatlarının,
ictimaiyyətin nümayəndələri iştirak etmişlər.
Mərasim
iştirakçıları əvvəlcə səfirliyin
binasında ulu öndərin büstü önünə
gül dəstələri qoymuşlar.
Mərasimdə
ulu öndərin xatirəsi bir dəqiqəlik sükutla yad
edilmişdir.
Azərbaycanın
Böyük Britaniyadakı səfiri Fəxrəddin Qurbanov
ümummilli lider Heydər Əliyevin həyat və fəaliyyəti
haqqında danışmışdır.
Səfir
müasir müstəqil Azərbaycan dövlətinin memarı
və qurucusu, xalqımızın müdrik rəhbəri,
dünya şöhrətli siyasi xadim Heydər Əliyevin
ölkəmizdə demokratik, hüquqi dövlət
quruculuğu istiqamətində həyata keçirdiyi
uğurlu siyasət barədə ətraflı məlumat vermişdir.
Xüsusi vurğulanmışdır ki, şərəfli və
mənalı ömür yolunun böyük hissəsini ölkəmizin
rəhbəri kimi xalqının tərəqqisinə həsr
etmiş ulu öndər Heydər Əliyev müasir Azərbaycan
dövlətçiliyinin ideoloji-siyasi əsaslarını
yaratmış, xalqı həqiqi müstəqilliyə qovuşduraraq
ictimai şüurda əbədiyaşarlıq hüququ
qazanmışdır.
Birləşmiş
Krallıq ilə Azərbaycan arasındakı münasibətlərin
əsasının qoyulmasının ulu öndərin adı
ilə bağlı olduğu diqqətə
çatdırılmışdır.
Diplomat ulu
öndərin layiqli davamçısı Prezident İlham Əliyevin
apardığı daxili və xarici siyasət, əhalinin
sosial rifahının yaxşılaşdırılması
istiqamətində gördüyü işlər, o cümlədən
son dövrlər ölkəmizdə bir çox layihələrin
həyata keçirilməsi haqqında məlumat vermişdir.
F.Qurbanov
ümummilli liderin xatirəsinin Azərbaycan xalqının qəlbində
əbədi yaşayacağını
vurğulamışdır.
Tədbirdə
ümummilli lider Heydər Əliyevin ömür yolundan bəhs
edən fotosərgi nümayiş etdirilmişdir.
Kiyev
Dekabrın
12-də Ukrayna paytaxtında Azərbaycan xalqının
ümummilli lideri Heydər Əliyevin adını
daşıyan bağda onun abidəsi yanında müasir Azərbaycan
dövlətinin memarı və qurucusunun vəfatının
10-cu ildönümünə həsr edilmiş tədbir
keçirilmişdir. Tədbir Azərbaycanın Ukraynadakı
səfirliyi tərəfindən təşkil edilmişdir.
Azərbaycan
xalqının ümummilli lideri Heydər Əliyevin anım mərasimi
başlamazdan əvvəl tədbirin təşkilatçıları
və çoxsaylı iştirakçıları Heydər
Əliyevin abidəsi önünə Azərbaycanın
Ukraynadakı səfirliyi, Azərbaycan Respublikası Dövlət
Neft Şirkətinin (ARDNŞ) Kiyevdəki nümayəndəliyi,
Ukrayna Azərbaycanlıların Birləşmiş Diasporu
(UABD), Ukrayna Azərbaycanlıları Konqresinin (UAK) Kiyev şəhər
təşkilatı, "Akkord- Ukrayna" şirkətinin
nümayəndəliyi, Ukrayna Azərbaycanlıları
Ağsaqqallar Şurası adından gül səbətləri,
qızılgül və qərənfil dəstələri
qoyulmuşdur.
Bir dəqiqəlik
sükutdan sonra Azərbaycanın Ukraynadakı səfirliyinin
müşaviri Nazim Əliyev çıxış edərək
vurğulamışdır ki, bu gün dünyanın bir
sıra şəhərlərində olduğu kimi, Kiyevdə
də Azərbaycan xalqının ümummilli lideri Heydər
Əliyevin xatirə gününə həsr edilmiş tədbirlər
keçirilir.
Nazim
Əliyev daha sonra qeyd etmişdir ki, ulu öndər Heydər
Əliyevin Azərbaycan xalqı qarşısında xidmətləri
çox böyükdür. Azərbaycanın müstəqilliyi
bərpa ediləndən sonra xalqın tələbi ilə
hakimiyyətə gəlmiş Heydər Əliyev Azərbaycanın
parçalanmasının qarşısını almış
və ölkəmizin birliyini
dünyaya nümayiş etdirmişdir.
Ümummilli
lider Heydər Əliyev həmişə xalqına və
dövlətinə sadiq olmuşdur. Onun Azərbaycanda hakimiyyətə
gəlişindən sonra ölkəni işıqlı gələcəyə
aparan siyasətin təməli qoyulmuşdur. Bu dahi insan Azərbaycanın
xarici siyasətinin strategiyasını işləyib
hazırlamışdır.
Bu gün
ulu öndərin layiqli varisi, Azərbaycan Respublikasının
Prezidenti İlham Əliyev həmin siyasəti uğurla davam
etdirir. Təməli Heydər Əliyev tərəfindən
qoyulmuş bu siyasət sayəsində Azərbaycan dünyada
tanınan dövlətə çevrilmişdir. İndi
bütün ölkələr Azərbaycanın maraqları ilə
hesablaşır.
Səfirliyin
müşaviri çıxışının sonunda
demişdir ki, Heydər Əliyev yeni tarix
yaratmışdır, bu tarix yaşayır və davam edir. Bu
gün dahi öndər aramızda olmasa da mənəvi cəhətdən
o həmişə bizimlədir!
Sonra Ukrayna
Azərbaycanlıları Ağsaqqallar Şurasının sədri
Firudin Məmmədov, ARDNŞ-in Kiyevdəki nümayəndəliyinin
rəhbəri Elçin Məmmədov, hüquq elmləri
doktoru, Kiyev Milli Aviasiya Universitetinin beynəlxalq hüquq
kafedrasının professoru, Ukraynanın əməkdar təhsil
işçisi Arif Quliyev, UABD-nin rəhbəri Hikmət Cavadov,
Ukrayna Azərbaycanlı Gənclər İttifaqının
(UAGİ) sədri Anar Tahirov, Ukrayna Millətlər
Assambleyasının sədri Rövşən Tağıyev,
Dünya Azərbaycanlıları Konqresinin Ukraynadakı
nümayəndəliyinin rəhbəri Möhlət
Hüseynov çıxış etmişlər. Onlar da əfsanəvi
şəxsiyyət Heydər Əliyevin Azərbaycan
qarşısında, xalqımız qarşısında
müstəsna xidmətlərindən
danışmışlar.
Ukraynanın
tanınmış siyasətçisi, Avropa Şurası
Parlament Assambleyasında yüksək nüfuz sahibi və Azərbaycan
xalqının böyük dostu Anatoli Raxanski zəmanəmizin
görkəmli dövlət və siyasi xadimi Heydər
Əliyev Sov.İKP MK Siyasi Bürosunun üzvü, SSRİ
Nazirlər Soveti sədrinin birinci müavini olduğu dövrdə
onunla görüşləri, Heydər Əliyevin Ukraynaya
köməyi barədə xatirələrini
bölüşmüşdür.
A.Raxanski
demişdir:
- Bu il mən
Azərbaycan Prezidenti seçkilərində beynəlxalq
müşahidəçi olmuşam. Bir daha vurğulayıram, bu seçkilər
demokratik, azad və şəffaf şəraitdə
keçmişdir. Dünyanın nüfuzlu siyasətçilərindən
olan Prezident İlham Əliyevin rəhbərliyi ilə Azərbaycanın
qazandığı möhtəşəm uğurlar, ölkənin
çiçəklənməsi məni yaxşı mənada
heyrətləndirdi.
Mərasimin
sonunda çıxış edən həmvətənimiz
şeyx Şakir (Yəhyayev) xatırlatmışdır ki, dinə
dərin ehtiram bəsləyən ulu öndər Heydər
Əliyev Məkkədə, Həcc ziyarətində
olmuşdur. Sonra
şeyx ümummilli lider Heydər Əliyevin ruhuna Qurandan surə
oxumuşdur.
Tədbirdə
Azərbaycanın Ukraynadakı səfirliyinin əməkdaşları,
"Azərbayçançılıq İnstitutu" Beynəlxalq
İctimai Təşkilatının prezidenti, UAK Kiyev şəhər
təşkilatının sədri, sərbəst güləş
üzrə Əməkdar İdman Ustası, Azərbaycanın
əməkdar məşqçisi Olqe Krapivin, "Akkord -
Ukrayna" şirkətinin direktoru Sahib Məmmədov,
ARDNŞ-in Kiyev ofisinin əməkdaşları, Azərbaycan
diasporunun və Ukrayna ictimaiyyətinin nümayəndələri
iştirak etmişlər.
AzərTAc
Azərbaycan.-2013.-14 dekabr.-S.4.