Almaniya Bundestaqının Solçular
fraksiyası mövcud sərhədlərin
birtərəfli və zorakılıq yolu
ilə dəyişdirilməsinin yolverilməz olduğunu
bildirir
Azərbaycan Tələbə Şəbəkəsi
gənclər təşkilatının
baş katibi Elşən İsmayılov
Almaniyanın aparıcı
siyasi xadimlərinə
məktub göndərərək,
Azərbaycan gənclərinin
Ermənistanın Gümrü
şəhərində yerləşən
Rusiya hərbi bazasının komandirinin təcavüzkar bəyanatından
narahatlığını ifadə
etmiş və Almaniyanı Ermənistan-Azərbaycan,
Dağlıq Qarabağ
münaqişəsinin həlli
məsələsində səylərini
artırmağa çağırmışdır.
Məktubda Dağlıq Qarabağın
Azərbaycanın tarixi
torpağı olduğu
və Rusiya ilə Ermənistan arasında mövcud kollektiv təhlükəsizlik
müqaviləsinin bu bölgəyə şamil
olunmadığı diqqətə
çatdırılmışdır. Bundan əlavə,
Ermənistan hakimiyyətinin Azərbaycanda bir
milyon qaçqın və məcburi köçkünün hüquqlarını tapdamaqla yanaşı, Ermənistanın
özündə də insan
hüquqlarına məhəl qoymaması və xüsusilə
də, son prezident
seçkilərinin nəticələrinə etiraz
edənlərin hüquqlarını ağır şəkildə
pozması faktları vurğulanmışdır.
Almaniya Bundestaqında Solçular
fraksiyasının rəhbəri
Qreqor Qizinin mətbuat katibi Diter Lihmanın Azərbaycan Tələbə
Şəbəkəsinə ünvanladığı məktubda
deyilir:
"Rusiya və Ermənistan arasında imzalanan hərbi sazişlə nəzərdə
tutulan hərbi yardımın göstərilməsi
haqqında öhdəlik
yalnız Ermənistan
Respublikasının ərazisində
qüvvədədir. Həmin saziş
beynəlxalq aləm tərəfindən tanınmamış
separatçı "Dağlıq Qarabağ
Respublikası"nın ərazisinə şamil
olunmur. Rusiya
Federasiyasının indiki Prezidenti
V.Putin və keçmiş
Prezidenti D.Medvedyev öz şərhlərində bu
faktı dəfələrlə təsdiqləmişlər. Buna görə də hər hansısa bir rus hərbçisinin
sözlərinə əsaslanaraq Rusiya rəhbərliyinin
siyasətinin dəyişdiyi qənaətinə gəlmək
yanlış olardı. Bununla belə, biz bölgədə hədə-qorxu dilində
danışmağın əleyhinəyik".
Məktubda daha sonra deyilir:
"Solçular ötən
illərdə Cənubi
Qafqazda gedən prosesləri həm Ermənistan ilə Azərbaycan arasında olan ərazi münaqişəsi nöqteyi-nəzərindən,
həm də hər üç Cənubi Qafqaz ölkəsində olan insan haqlarının vəziyyəti baxımından
diqqətlə izləmişlər.
Bizim parlamentin
16-cı çağırışında təqdim etdiyimiz qətnamə layihəsindən
görmək olar ki, Solçular münaqişənin beynəlxalq hüquq normaları çərçivəsində
sülh yolu ilə həllini
dəstəkləyir. Bu həll özündə hər iki
tərəfin zorakılıqdan imtinasını, beynəlxalq
səviyyədə tanınmış dövlət sərhədlərinə
hörmətlə yanaşılmasını, habelə bütün qaçqın və məcburi
köçkünlərin məhdudiyyətsiz olaraq
öz torpaqlarına geri
qayıtmasını birləşdirməlidir.
Birtərəfli və zorakılıq
yolu ilə ayrılmanı və bu yolla mövcud
sərhədlərin dəyişdirilməsini
Solçular rədd edirlər. Bu, beynəlxalq hüquq
prinsiplərinə ziddir. Solçular
xarici siyasətdə xalqlararası anlaşma prizmasından çıxış
edirlər və etnik
qruplar arasında yeni süni sərhədlərin
yaradılmasının əleyhinədirlər. Dünyanın
əksər ölkələrinin əhalisinin etnik
cəhətdən heteroqen olduğunu
nəzərə alaraq, etnik
azlıqların müdafiəsini və onların daxildə öz müqəddəratını təyinetmə
hüququnu səmərəli təmin edən
mümkün qədər demokratik
və yüksək insan
hüquqları standartlarından çox şey asılıdır."
D.Lihman bildirmişdir ki, münaqişələrin həllində
mütləq hər iki tərəfin razılaşmasına nail olmaq
lazımdır və sərhədlər heç
bir halda birtərəfli qaydada dəyişdirilə bilməz. "Belə münaqişələrdə
hər zaman tərəflər arasında
razılaşma əldə olunmalıdır, məsələn,
mədəni və siyasi muxtariyyətin
razılaşdırılmış səviyyəsi. Bu, həm də ölkənin beynəlxalq səviyyədə
tanınmış sərhədləri çərçivəsində
milli azlıqların öz
ərazisinin müəyyən olunmasını da
əhatə edə bilər. Başqa yol yoxdur. Bunlar
ATƏT-in Minsk qrupunda
aparılan sülh
danışıqları çərçivəsində
Dağlıq Qarabağın gələcək statusunun
müəyyənləşdirilməsinə də aiddir.
Ermənistan tərəfindən hərbi
yolla işğal olunmuş və keçmiş Dağlıq
Qarabağ muxtar vilayəti ətrafındakı
digər ərazilər
gələcək statusun
müəyyənləşməsindən
kənarda qalmalıdır. Bu ərazilərdə
müharibədən öncə azərbaycanlılar
yaşayırdı. Məcburi köçkünlərin öz torpaqlarına və
yaşadıqları evlərinə qayıtmaqla bağlı
hüquqları şərtsiz və məhdudiyyətsiz həyata
keçirilməlidir. Ermənistan qeyd edilən ərazilərin
işğalına dərhal son qoymalı
və bu ərazilərdə erməni əhalisinin
qanunsuz olaraq məskunlaşdırılması
fəaliyyətini dayandırmalıdır ki,
məcburi köçkünlər tezliklə öz
torpaqlarına geri qayıda bilsinlər."
Vüqar SEYİDOV,
AzərTAc-ın xüsusi
müxbiri
Berlin
Azərbaycan.-2013.-14
dekabr.-S.5.