Həyatda iz qoyan insan

Kamran Hüseynov-100

Hər bir dövrün istedad və qabiliyyət ilə seçilən, ömrünü xalq işinə həsr edən şəxsiyyətləri formalaşır. Belə insanlar başqalarından seçilən keyfiyyətləri ilə cəmiyyətdə özləri nüfuz qazanır, illər, qərinələr keçsə də, xeyirxah əməlləri ilə xatirələrdə yaşayırlar.

Yüz yaşı tamam olan tanınmış dövlət xadimi Kamran Əsəd oğlu Hüseynov da belə insanlardandır.

K.Ə.Hüseynovun 100 illik yubileyinin keçirilməsi haqqında Azərbaycan Respublikasının Prezidenti İlham Əliyevin imzaladığı sərəncamda deyilir: "Kamran Hüseynov respublikada dövlət idarəçiliyi və iqtisadiyyatın müxtəlif sahələrində səmərəli fəaliyyət göstərmiş, uzun illər təqdirəlayiq xidmətləri ilə ölkənin ictimai-siyasi həyatına layiqli töhvələr vermişdir". Yaşının müdrik çağında qələmə aldığı xatirələrində Kamran Hüseynov qazandığı uğurların mənbəyini doğma xalqında, aldığı tərbiyədə görür: "Taleyim elə gətirdi ki, özüm də gözləmədən narahat sularda yelkənim dalğaların üstündə ora-bura çıpına-çırpına Yer üzünü gəzib dolaşdım. Minnətdaram ulu Tanrıya ki, bütün sınaqlardan üzü ağ çıxardı məni. Bütün uğurlarımın səbəbini həmişə doğma xalqımda, onun mənə verdiyi tərbiyədə görmüşəm..."

Kamran Hüseynov 1913-cü il dekabrın 15-də Qubadlı rayonunun Çərəli kəndində anadan olub. Əzəmətli Hərtiz dağının ətəklərində yerləşən əsrarəngiz təbiətli bu kənd məhsuldar, bərəkətli torpaqları, saf havalı meşə və biçənəkləri, buz bulaqları ilə seçilərdi. Atası Əsəd kişi əkin-biçin adamı olub, ailəsini əlinin zəhməti ilə dolandırıb.

K.Hüseynovun uşaqlıq illəri əzab-əziyyətli keçib. Özünün yazdığına görə 8-9 yaşlarından işləməyə başlayıb. Hər bir kənd üçün xarakterik olan ot biçmək, çəpər çəkmək, mal-davarla məşğul olmaq və s. kimi kəndin məişət işləri onun da ilk məşğuliyyəti olub. Yazıb-oxumağı isə məktəbə gedən qardaşından öyrənib.

16 yaşında ilk dəfə rayondan kənara çıxan Kamran həmkəndlilərinə qoşulub Naxçıvana gedib. Sonralar bu səfəri xatırlayaraq deyirdi: "İlk dəfəydi başqa şəhərdə olurdum. Ordan özümə üçburun çarıq aldım. Tay-tuşlarım o çarığın tamaşasına gəlirdilər. Sonralar dünyanın harasında səfərdə olurdumsa, ordan aldığım ayaqqabılar məni o çarıq qədər sevindirmədi."...

Kamran Hüeynovun Bakıya ilk gəlişi də asan olmur. Qubadlının Çərəli kəndindən Bakıya 50 qəpik pul, dörd büküm çörəklə çıxır. Həkəri stansiyasında vaqonlara yük vurub qazandığı 10 manatın da 5-ni pencəyi ilə birlikdə kənddə atasız, əyin-başı yalın qalmış qardaşına qaytarıb qatara minir. Bakıda neft sənayesində fəhlə işləyərək, həm də kənddə qalan böyük bir külfəti dolandırırdı.

Kamran Hüseynov ömrünün hər bir mərhələsi, özünün ifadəsi ilə desək, taleyin onu sınaqlara çəkməsi ilə yaddaqalandır. Ancaq sərt kənd mühitində formalaşan, həyatın ağır yükünə çiyin verməyi elə uşaqlıq yaşından vərdiş edən 20 yaşlı gənci heç bir çətinlik qorxutmur. Öhdəsinə düşən hər bir vəzifəni böyük səy və bacarıqla yerinə yetirir. "Duda" zavodunda dəmirçi və çilingər işlərkən, yenə də tikintidə müstəqil briqadir kimi çalışanda da daim irəliyə can atması onu işlədiyi kollektivlərdə də sevdirmişdir. Oxumağa güclü həvəsi olan gənc Kamran dörd sinfi bir ildə başa vurur. Istehsalat qabaqcılı olması Sənaye Akademiyasına təhsil almağa göndərilməsinə zəmin yaradır. Təhsil dalınca Xarkova üz tutur. 1938-40- cı illərdə Xarkov İnşaat Mühəndislər institutunda təhsil alır. Sonra Bakıda Neft Sənaye Akademiyasının açılması ilə əlaqədar Azərbaycana qayıdır və burada təhsilini başa vurur. O, həmçinin 1949-cu ildə Azərbaycan Dövlət Pedoqoji İnstitutunun tarix fakultəsini, eyni zamanda respublika Ali Partiya məktəbini bitirmişdir. Ömrünün bu mərhələsi Kamran Hüseynov üçün dövrün tələblərinə uyğun hərtərəfli təhsil alma, istehsalatda püxtələşmə, möhkəm, inadkar, qətiyyətli və çalışqan xarakter formalaşması illəri kimi səciyyələnir. Sinəsini sənaye qabaqcılı döş nişanı, "Əmək rəşadəti" medalı bəzəyir.

Doqquzuncu zavodda - Yeni Bakı Neftayırma zavodunda işlədiyi vaxt Sumqayıt şəhərində zavodlar tikmək məqsədi ilə "Zaqafqaziya Sənaye Tikinti" Trestinin formalaşdırılması üçün Mərkəzi Komitənin tapşırığı ilə Sumqayıta göndərilir. Lakin 1941-45-ci illər müharibəsinin başlaması bu işləri yarımçıq qoyur. Əslində bununla da Kamran Hüseynovun həyatında daha məsul sınaqlar dövrü başlanır. Dövlət Müdafiə Komitəsinin qərarı ilə 6 min nəfərədək adamın işlədiyi Sumqayıt tikintilərinin dayandırılması istehsalat avadanlıqlarının burada işləyənlərlə birlikdə Şimali Urala, Novotagilskə köçürülməsi ilə əlaqədar Kamran Hüseynova mühüm tapşırıq verilir. Bütün çətinliklərə baxmayaraq o, bu tapşırığın öhdəsindən uğurla gəlir. Insan təlafatına və heç bir qəzaya yol verilmədən ona həvalə edilmiş eşalon mənzil başına sağ-salamat çatdırılır.

Gənc olmasına baxmayaraq, Kamran Hüseynov hansı sahəyə təhkim olunurdusa, orada bir canlanma yarada bilir, tapşırılan işi ya uğurla başa çatdırır, yaxud, geridə qalmış sahənin dirçəldilməsinə nail olduqdan sonra başqa daha vacib işə göndərilirdi.

1944-cü ildə Kamran Hüseynov öz taleyini ikinci dəfə Sumqayıta bağlayır. 1944-45-ci illərdə Sumqayıt rayon Partiya Komitəsinin sənaye və kadr işləri üzrə katibi vəzifəsində işləməyə başlayıb...

Faşist Almaniyası üzərində qələbədən sonrakı dövr ölkədə müharibənin yarımçıq qoyduğu işlərin bərpası, dinc quruculuq və inkişafın təmin edilməsi illəridir. Bu nəhəng quruculuq işlərində Kamran Hüseynovun da əməyi az olmayıb. Hələ 31 yaşında məsul rəhbər vəzifəyə təyin edilən Kamran Hüseynovun həyatında idarəçilik məharətini, rəhbərlik üslubunu, inkişafa mane ola biləcək maneələri cəsarətlə aşmaq qabiliyyətini göstərmək üçün yeni üfüqlər açılır. O, 1958-ci ilədək Binəqədi, Sumqayıt və Neftçalada Partiya Komitəsinin birinci katibi kimi özünü əsl təşkilatçı, ədalətli rəhbər, nöqsanlarla barışmağı bacarmayan qurucu kimi təsdiq etmişdir. Tutduğu vəzifələrdən, gördüyü işlərdən asılı olmayaraq, mövqeyi daim seçilmişdir.

1945-ci il fevralın 5-də Binəqədi rayon Partiya Komitəsinin birinci katibi vəzifəsinə göndərilən Kamran Hüseynov burada 1947-ci ilədək işləyir. O, neft-qaz hasilatı ilə tanınan bu rayona rəhbərlik edəndə hələ müharibə qurtarmamışdı. Qarşıda birinci növbədə neft-qaz istehsalında olan geriliyi aradan qaldırmaq vəzifəsi dururdu. Odur ki, Sulutəpədə, Çaxmaqlarla yeni quyular qazılır, dayanan quyuların işə salınmasını təmin edir. Rayona iki illik rəhbərliyi dövründə Kamran Hüseynovun "Şərəf nişanı" ordeni ilə təltif edilməsi, Ali Sovetin Deputatı seçilməsi gənc raykom katibinin yaxşı işinin göstəricisi idi.

Sumqayıtın və Mingəçevirin tarixi taleyində bir bağlılıq var. Çünki bunların hər ikisi ölkənin inkişafının stateji məqsədləri ilə əlaqəli olmuşdur. Qəribədir ki, Kamran Hüseynov ömrünün cavan, ən enejili dövründə bu iki şəhərdə, həyata keçirilən nəhəng layihələrdə iştirak etmişdir. 1948-ci ilin axırından onun həyatının Mingəçevir dövrü başlayır. Kamran Hüseynov böyük Mingəçevir tikintisinin- Sənaye Energetika şəhərinin yaradılmasına rəhbərlik edənlərdən biri olur. Mingəçevirə göndərilməsini belə xatırlayırdı: "1945-ci il iyulun 6-da Stalin Azərbaycan hökumətinin, AK (b)P MK-nın təşəbbüsü ilə hazırlanmış Mingəçevirə dair tədbirlər planına qol çəkdi. Nazirlər Soveti sədrinin birinci müavini İslam İslamzadə bütün hüquqları saxlanılmaq şərti ilə tikintiyə rəhbər təyin edildi. Tikintiyə 45 mindən çox adam, 20 minədək dustaq gətirilmişdi. Azərbaycan xalqı üzünü Mingəçevirə tutmuşdu. Kimin nəyə imkanı, bacarığı çatırdısa, əsirgəmirdi". Mingəçevirdəki işlərə rəhbərlikdən narazı qalan Mircəfər Bağırov çox keçmədən Kamran Hüseynovu ora göndərmək qərarına gəlir. Beləliklə, 1948-ci ilin axırlarından Kamran Hüseynovun həyatının Mingəçevir dövrü başlayır.

Kamran Hüseynov bu nəhəng ümumittifaq tikintisinin problemlərinin kompleks həllinə girişir. Moskvada həlli vacib məsələləri cəsarətlə qaldırır, təkliflərinin qəbul edilməsinə nail olur.

Mingəçevir tikintiləri uğurla başa çatandan sonra Kamran Hüseynovu Neftçalaya birinci katib göndərirlər. Ömür yolunu səhifələyən Kamran Hüseynov yazırdı: ..."Özbəkistandan Mərkəzi Komitə katibinin başçılığı ilə böyük nümayəndə heyəti gəlmişdi. Qonaqlar gedəndə etiraf etdilər ki, Mingəçevir Azərbaycan xalqı üçün İnqilabi bir hadisədir. Bakıya qayıdandan sonra nümayəndə heyətinin başçısı iclasda Mircəfər Bağırovdan xahiş edir ki, Mingəçevirdə işləyən Kamran Hüseynovu bizə verin, Özbəkistana aparaq..." M.Bağırov ona heç bir cavab vermir. Ertəsi gün tapşırır ki, "Hüseynovun şəxsi işini mənə verin. O, özümüzə burada lazımdır".

1952-53-cü illərdə Neftçala rayon Partiya Komitəsinin birinci katibi işləyən Kamran Hüseynov burada da öz dəst-xəttinə sadiq qalır. Quruculuq işlərinə vüsət verir. Rayon mərkəzində çoxmərtəbəli binaların planlı tikintisinə, asfalt yollar çəkilməsinə, çörək kombinatı, mədəniyyət sarayı, stadion, yeni tipli məktəb, xəstəxana və digər obyektlərin tikintisinə nail olub.

1953-cü ildə Kamran Hüseynov üçüncü dəfə Sumqayıta işə göndərilir. Yenidən Sumqayıta qaytarılmasını yada salan K.Hüseynov yazırdı: "Birinci dəfə Sumqayıtda çox böyük, təmtəraqla, başımda geniş planlar tutmaqla işə girişmişdimsə, ikinci dəfə müharibə araya düşmüşdü. Bu dəfə öz-özümə dedim: "Sumqayıt, mən səninlə indi daha ciddi məşğul olmalıyam. Səndən bir qədər aralaşmağıma baxmayaraq, mən daim səninlə olmuşam".

Sumqayıtda iş əvvəldən başlasa da, şəhərin salınması, zavodların tikilməsi problemi həllini gözləyirdi. Moskvaya, ümumittifaq nazirliklərinə tabe olan bu nəhəng tikinti zavodlarının, istehsalat sahələrinin yaradılmasını, burada işləyəcək adamların kazarma tipli yataqxanalarda yerləşdirilməsini nəzərdə tuturdu.

Lakin şəhər Partiya Komitəsinin uzaqgörən və inadkar birinci katibinin qətiyyətli mövqeyi Sumqayıt layihəsinin yönünü indiki, hazırda mövcud olan istiqamətə yönəltməyi bacardı. Tikiləcək zavodların, salınacaq yeni sənaye kompleksinin yaxınlığında müasir tipli şəhər salınması ideyası nəhayət Moskvada qəbul olunub. Kamran Hüseynovun inadlı mübarizəsi Sumqayıt şəhər Partiya Komitəsinin təklifinin tamamilə məqsədəuyğun olduğunu sübuta yetirdi. Şəhərin baş plan əsasında tikilməsi qərara alındı. Bu qərar təsdiqləndikdən sonra "barak" tipli kiçik "posyolkalar" sökülüb, bütün infrastrukturu ilə birlikdə yeni tipli şəhər salınmasına başlanıb. Qısa müddətdə Sumqayıtda böyük strateji əhəmiyyətə malik zavodlar tikilib, sənaye mərkəzi yaranıb. İlk mərhələdə Sintetik Kauçuk, Alminium, Boruyayma zavodlarının inşasına başlanıb.

Bacarıqlı istehsalat və inşaat təşkilatçısı Kamran Hüseynov sənaye kompleksinin yaradılması və genişləndirilməsi vəzifəsini, məharətlə şəhərsalma vəzifələri ilə uzlaşdırırdı. Həm sənaye üçün kadr potensialının formalaşdırılmasını, həm də gənc şəhərdə yaşayanların təhsilini, sağlamlığını, mədəni səviyyəsinin yüksəldilməsini təmin edən tədbirlər görürdü.

Sumqayıt ərazisində yerləşən indiki Saray qəsəbəsinin də bünövrəsi Kamran Hüseynov tərəfindən qoyulmuşdur.

O, 1958-61- ci illərdə Respublika Həmkarlar İttifaqları Şurasının sədri, 1961-68-ci illərdə Moskvada Ümumittifaq Həmkarlar İttifaqı Mərkəzi Şurasının katibi vəzifələrində çalışmışdir.

Qısa müddətdə AHİŞ-i üzvlərinin hüquqlarını müdafiə edən hörmətli bir təşkilata çevirməyə nail olan sədr, həm də Azərbaycanın kurort-sanatoriya və turizm ölkəsi kimi tanınması istiqamətində geniş miqyaslı işə girişir. Tezliklə İstisuda, Naftalanda, Şuşada, Masallıda və Lənkəranda sanatoriya, istirahət ocaqları tikintisinə başlanılır. Bakıda üç mehmanxananın - "Abşeron", "Azərbaycan", "Turist" mehmanxanalarının təməli qoyulub.

AHİŞ-ə rəhbərlik etdiyi dövrdə Kamran Hüseynovun ictimai fəaliyyəti beynəlxalq əhəmiyyət kəsb edir. Ayrı-ayrı nümayəndə heyətlərinin üzvü, yaxud nümayəndə heyətinə rəhbərlik edən şəxs kimi xarici səfərlərdə olur.

1961-ci ilin mart ayında Ümumittifaq Həmkarlar İttifaqları Mərkəzi Şurasının Afrikaya- Mali Respublikasına göndərilən nümayəndə heyətinə də AHİŞ-nin sədri Kamran Hüseynov başçılıq edirdi. Uğurlu keçən bu səfərdən dərhal sonra Kamran Hüseynov Moskvaya ÜİHİMŞ-nin katibi vəzifəsinə aparılıb.

Burada neft-kimya, inşaat, şəhər təsərrüfatları, əməyin mühafizəsi, təhlükəsizlik xidməti kimi ağır sahələr onun nəzarətində idi. Bu sahələrə Kamran Hüseynov bacarıqla rəhbərlik edirdi.

Aldığı hərtərəfli təhsil, elmi ad, geniş dünya görüşü və idarəçilik məharəti mərkəzi hökumətdə özünü tam sərbəst hiss etməsinə, fəallıqla müzakirələrə qoşulmasına imkan verdi. Məhz buna görə də Nazirlər Sovetinin iclaslarında ÜİHİMŞ rəhbərliyi adından iştirak etmək ona həvalə edilirdi.

Moskvada işlədiyi dövrdə Kamran Hüseynov elmi araşdırmalarını da davam etdirməyi unutmur. 1963-cü ildə namizədlik, 1967-ci ildə doktorluq dissertasiyalarını müvəffəqiyyətlə müdafiə edib.

1968-ci ilin fevral ayında Respublika Nazirlər Sovetinin sədr müavini təyin edilən Kamran Hüseynov Azərbaycana qayıdır. Burada elm, mədəniyyət və səhiyyə məsələlərinə baxan müavin vəzifəsində çalışıb. O vaxt bu sahələrin maddi-texniki bazasının möhkəmləndirilməsi üçün obyektlər mütləq plana salınmalı, bundan sonra mərkəzdən maliyyə vəsaiti ayrılmalı idi. Moskvada mərkəzi aparatlarda işə bələdliyi, orada qazandığı şəxsi hörmət və nüfuzu sayəsində Kamran Hüseynov respublikada yüzlərlə mədəniyyət evləri, xəstəxanalar, idman sarayları və digər sosial obyektləri plana saldırıb.

Kamran Hüseynovun Nazirlər Sovetinin sədr müavini işlədiyi 1968-80-cı illər ulu öndər Heydər Əliyevin Azərbaycana rəhbərlik etdiyi dövrə təsadüf edir. Onun respublikada yaratdığı sağlam işgüzar şərait müxtəlif sahələrə cavab verən kadrlar qarşısında yaxşı perspektivlər açır. Geniş quruculuq illəri kimi tarixə düşən bu dövrü xatırlayan Kamran Hüseynov xatırələrində yazırdı: "Respublikada inkişaf qibtə edilməli bir sürətlə gedirdi. Elə bir sahə yox idi ki, ona diqqət verilməsin. Və onun qayğısına qalınmasın. Ona görə də deyirdilər ki, Azərbaycan böyük addımlarla qabağa gedir. Elə doğrudan da belə idi. Təkcə onu qeyd etmək kifayətdir ki, Heydər Əliyevin respublikaya rəhbərlik etdiyi 13 il ərzində 1 milyon 5 yüz min uşaq 1 miyon yüz mini təzə tikilmiş məktəblərdə təhsil alırdı. O məktəblər ən müasir tipli məktəblər idi - özünün akt zalı, idman zalı bütün şəraiti ilə".

Kamran Hüseynov 1980-93-cü illərdə Respublika Ticarət və Sənaye Palatasının sədri işlədiyi dövrdə bu təşkilatın fəaliyyətinin canlandırılması və nüfuzunun artırılması üçün də çox iş görmüşdür.

Kamran Hüseynov Azərbaycanın ictimai-siyasi həyatında uzun illər səmərəli fəaliyyət göstərən şəxsiyyətlərdən biri, ölkəsini və xalqını keçmiş İttifaq miqyasında və beynəlxalq səviyyədə ləyaqətlə təmsil edən dövlət və ictimai-siyasi xadim idi. O, sıravi fəhləlikdən başlamış strateji əhəmiyyətli mühüm dövlət obyektlərinin tikilib istismara verilməsinə qədər çalışdığı bütün sahələrdə yüksək peşəkarlıq, fədakarlıq və təşkilatçılıq qabiliyyəti nümayiş etdirmişdir. Uzun illər Azərbaycan respublikası Ali Sovetinin, eləcə də RSFSR Ali Sovetinin deputati kimi səmərəli fəaliyyət göstərmişdir.

Kamran Hüseynovun xidmətləri həmişə yüksək qiymətləndirilmiş, bir sıra dövlətlərin orden və medallarına layiq görülmüşdür. Bunların arasında ömrünün ixtiyar çağında aldığı Rusiya Federasiyasının "Xalqlar dostluğu" və müstəqil Azərbaycan Respublikasının ali mükafatı olan "Şöhrət ordeni" xüsusi yer tuturdu.

Kamran Hüseynov şəxsiyyətini qiymətləndirən tanınmış siyasi və ictimai xadimlər onun cəsarət və qorxmazlığını, insanlara və hadisələrə münasibətdə ədalətə arxalanmasını daim ön plana çəkmişlər. Kamran Hüseynov şəxsiyyətinin gücünü də məhz bunda aramışlar.

Azərbaycanın, keçmiş İttifaqın və dünyanın çox yerində olmuş Kamran Hüseynov həmişə doğma el obası ilə nəfəs almışdır. O yazırdı: "Neçə yaşa çatsan da, ömründə nə qədər əyri -dolama yollardan keçsən də, ilk növbədə anadan olduğun yerlər, həmin mühit, oradakı insanlar sənə hər şeydən əzizdir. Doğulduğun yerlərin coğrafi iqlimi, təbiətin gözəlliyi ömür boyu xatirələrindən silinmir".

İşlədiyi müddətdə Qubadlının inkişafına, əhalinin güzəranının yaxşılaşdırılmasına həmişə diqqət yetirmişdir. Bir çox körpülərin, ictimai binaların, məktəblərin, kənd təsərrüfatı və sosial obyektlərin inşası Kamran Hüseynovun xeyir duası ilə başa gəlmişdir.

Kamran Hüseynov elmə, təhsilə marağı olan yüzlərlə həmyerlisinə dayaq olmuş, onların istehsalatda möhkəmlənməsinə yardım göstərmişdir.

Sumqayıtın inşası zamanı həmyerlilərini də tikinti işlərinə cəlb etmişdir. İndi Sumqayıtda yaşayan qubadlıların çoxu elə o zamandan buranı özlərinə yurd sanmış, yaşayıb işləmiş, ev-eşik, ailə- uşaq sahibi olmuşlar.

Qarabağda separatçı hərəkata rəvac veriləndən sonra Ermənistan Respublikasının Azərbaycana qarşı torpaq tələbi ilə bağlı başladığı işğalçılıq müharibəsi ahıl yaşında olan Kamran Hüseynovu da dərindən narahat edirdi. 5 il müddətində dəfələrlə Qubadlıya gəlmiş, həmyerlilərinin torpaqlarımızın müdafiəsinə səfərbər edilməsində çox iş görmüşdü.

Rayonun işğalından sonra mütəmadi olaraq yurd-yuvalarından didərgin düşmüş həmyerlilərinin problemləri ilə maraqlanır, onların həlli ilə əlaqədar əlindən gələni əsirgəmirdi. Köçkün soydaşlarımız ümid yeri kimi ona müraciət edir, ondan müşgüllərinin çözülməsində yardım alırdılar.

Qubadlılar onu özlərinə həmişə güvənc yeri bilirdilər...

Qubadlılar Kamran Hüseynovun 100 illik yubileyinin keçirilməsi ilə bağlı Azərbaycan Respublikasının Prezidenti İlham Əliyevin sərəncamını sonsuz razılıq və minnətdarlıq hissi ilə qarşılamışlar. Əslində bu sənəd həyatını xalq işinə, Azərbaycanın inkişafına, tərəqqisinə həsr edən ictimai və dövlət xadiminin əməyinə verilən qiymətdir.

Qubadlı rayonunun bütün ictimaiyyəti sərəncamı həm də, onlara, Kamran Hüseynovun daim dövlətə və dövlətçiliyə sadiq olan həmyerlilərinə göstərilən diqqət və qayğının əlaməti kimi qəbul edir, Azərbaycan Respublikasının prezidenti İlham Əliyevə dərin minnətdarlıqlarını bildirirlər.

Kamran Hüseynov cismən bizdən ayrılsa da, bu gün də qubadlıların xatırəsini əziz tutduqları Vətən oğlu, el ağsaqqalı kimi yaddaşlarda yaşamaqdadır.

2006-cı il aprelin 20-də 93 yaşında haqq dünyasına qovuşan, Bakıda Fəxri Xiyabanda uyuyan müdrik bir insanın - Kamran Hüseynovun qəbri onu həmişə hörmət və ehtiramla yad edənlərin ziyarət yeridir.

İllər keçsə də, Kamran Hüseynov şəxsiyyəti nəsillərə nümunə kimi yaddaşlarda qalacaqdır...

Malik İSAQOV,

Qubadlı Rayon İcra Hakimiyyətinin başçısı

Azərbaycan.-2013.-14 dekabr.-S.7.